Jıynǵa Parlament Májilisiniń depýtaty Maıra Aısına, «Jasyl ekonomıkany» qoldaý jáne G-Global-dy damytý Koalısııasy» ZTB basqarma tóraǵasy Saltanat Rahymbekova, «Áleýmettik dınamıka» qoǵamdyq qorynyń dırektory Elena Ojgo, Eńbek jáne halyqty áleýmettik qorǵaý mınıstrliginiń Jumyspen qamtý departamentiniń dırektory Erbolat Abýlhatın qatysty. Spıkerler aýyl áıelderiniń áleýetin arttyryp, olardyń kásipkerlik múmkindikterin júzege asyrý úshin atqarylyp jatqan jumystarmen tanystyrdy.
– «Coca-Cola belesteri» áleýmettik baǵdarlamasy aıasynda jemisti jumys istep kele jatqanymyzǵa jeti jyl boldy. Osyǵan deıin 13 myńnan astam aýyl áıeline óz kásibin ashýǵa kómektestik. Elimizdiń ártúrli aýyldarynan isker áıelderdi jınap, kásipkerliktiń negizine úırettik. Eń úzdik bıznes-jobalardyń ıeleri arnaıy grant utyp aldy. Búginde naqty 50 bıznes-joba jemisti jumysyn bastap ketti, – dedi M.Aısına. Onyń aıtýynsha, isker áıelder el ekonomıkasyna úlken ózgerister ákelip, óndiris salasynda ózindik qoltańbasyn qaldyra alady.
Odan keıin sóz alǵan E.Abýlhatın «El ónimi» jobasynyń iske asyrylatynyn aıtty. Jańa joba agroónimderdi ósirý jáne óndirýmen birge shetel naryǵyna shyǵýǵa múmkindik beredi. Sol arqyly halyqtyń tabysyn arttyryp, jumyssyzdyq deńgeıin tómendetýge járdemdesedi.
Jıynda S.Rahymbekova «Jeke qosalqy sharýashylyq» onlaın-mektebi arqyly turmystaǵy kelinshekter úıde otyryp-aq mańyzdy aqparattarǵa qanyǵatynyn aıtty. Ári kásipke baılanysty maǵlumattarǵa ońaı qol jetkize alady. Sondaı-aq eldi mekenderdi jumyspen qamtýdan basqa, jeke qosalqy sharýashylyqta aýylsharýashylyq ónimin óndirýdiń kólemin ulǵaıtýdy maqsat etpek. E.Ojgo Úkimet aýyl áıelderi arasyndaǵy kásipkerlikti damytý úshin barlyq jaǵdaı jasap otyrǵanyn nazarǵa alsa, A.Akkırman názik jandylardyń qoǵamǵa ákeler paıdasyn baıandady. Onyń aıtýynsha, aýylda kásip bastaǵan arýlarǵa alǵashqy sátte mindetti túrde qoldaý qajet. Sonda ǵana olardyń isi alǵa basady. Memleket tarapynan kómek bolatynyna kózi jetken basqa áıelder de ynta-jiger bildirip, kásipkerlikke bet bura bastaıdy. Olar ózderiniń otbasynyń ál-aýqatyn jaqsartýmen ǵana shektelip qalmaıdy, el ekonomıkasyn kóterýge de atsalysatyn bolady. Onyń ústine qazir turǵyndardy taza tabıǵı aýylsharýashylyq ónimderimen qamtamasyz etý mańyzdy máselelerdiń biri bolyp otyr. Osyny oıdaǵydaı oryndaýǵa aýyldaǵy áıelderdiń múmkindigi tolyq jetedi.
Muhtar KÚMISBEK,
«Egemen Qazaqstan»
