Fınalǵa joldama aldy

О́z elimizde ótken báse­kede jerles­te­rimiz Qyzǵal­daqtar elinen kelgen sport­­shylardy merziminen bu­ryn jeńip, qara­sha aıynda Madrıdte (Ispanııa) óte­tin Devıs kýbogynyń fı­naldyq saıysyna joldama aldy. Bir qyzyǵy, Qa­­zaqstan men Nıderland qu­ramalary Devıs kýbo­gynyń byltyrǵy fınal­dyq kezeńinde bir topta oınaǵan bolatyn. Sol kezde de jerlesterimiz qar­­sy­lastarynan basym túsken edi. Eki koman­da arasyndaǵy tartys 2:1 esebimen aıaqtal­ǵan-dy. Jekeleı synda Mı­haıl Kýkýshkın Botık van de Zandshýlpti utsa, Alek­sandr Býblık Robın Haasege ese jiberdi. Al jup­­tyq básekede bizdiń ji­gitter qarsylastarynyń ýy­­synan jeńisti julyp áketti. Alaıda aıtýly ko­man­danyń ekeýi de sheshýshi tusta Uly­brıtanııaǵa jol berip, shırek fınalǵa shyǵa almaǵan bolatyn.

Elordada ótken báse­kede jigitterimiz esh qıyn­dyqsyz jeńiske jetke­nimen, týrnır bizdiń sportshylar úshin asa sát­ti bas­tala qoıǵan joq. Bir kún burynǵy jerebe tartý rásimi ótip, jarys­tyń shymyldyǵyn ashý Mı­haıl Kýkýshkın men Ro­bın Haasege bu­ıyrdy. Jal­py, Haase qazaq ten­nıs­shileri úshin óte yńǵaı­syz qar­sy­­las. Devıs ký­bogy­nyń byltyrǵy fı­nal­­dyq básekesinde dál osy tennısshi biz­diń Alek­sandr Býb­lıkti jeńip ket­ken bolatyn. Bul joly da Nı­derland sportshysy Mıhaıl Kýkýshkındi qa­py qaldyrdy. Tartysqa toly ótken kezdesýde Ro­bın Haase 4:6, 7;6, 3:6 esebimen je­ńiske jetti.

Kýkýshkınnen keıin kort­qa shyqqan Aleksandr Býblık jankúıerlerdiń jáne quramadaǵy jigitter­diń jeńiske degen senimin oıatty. Degenmen otandasy­myz jeńis úshin kortta biraz ter tógýge týra kel­di. Álemdik reıtıngte 199-satyǵa taban tiregen Grıkspýr Qazaqstanǵa je­ńis úshin kelgenin anyq ańǵartyp, jerlesimizge biraz qarsylyq kórsetkenin aıta keteıik. Býblık 23 jas­taǵy qarsylasy Tallon Grıkspýrdi eki sette 7:6, 7:6 ese­bimen je­ńip, tarazy ba­syn teńestirdi.

Ekinshi jarys kúnindegi juptyq básekede Andreı Golýbev pen Aleksandr Ne­­dovesov tandemine Jan-Jýlen Roıer men Robın Haase esh qarsylyq kórsete almady. Eki setke sozylǵan básekede jer­lesterimiz 6:3, 6:3 nátıjesimen basym tústi. Jalpy esepte alǵa shyq­­qannan keıin bar úmit elimizdiń birinshi raketkasy Aleksandr Býblıkke artyldy. О́ıtkeni Býblık j­eńiske jetetin bolsa, jer­lesterimiz merziminen bu­ryn Madrıd joldamasyn ıelenedi. Eger teń tússe, máseleni sońǵy kezdesýde sheshýge týra keledi.

Osyndaı jaýapkershi­likti arqalaǵan Aleksandr Býblıktiń je­ńilýge ha­qysy joq edi. Onyń ústi­ne qar­sylasy – Robın Haa­se. Byltyr ketken ese­ni qaı­tarýǵa tamasha múmkindik. Jáne Býblık ol múmkindigin qoldan ber­gen joq. Birinshi sette otandasymyz azdaǵan ba­symdyqpen, ıaǵnı 7:6 ese­bi­men jeńiske jetti. Ekin­­shi sette qar­qynyna qar­qyn qosyp, qar­sylasyn 6:1 esebimen shań qap­ty­ryp, Qazaq­stan qurama­syna je­ńis syılady.

Nıder­land qur­masyn 3:1 esebimen jeń­gen jerles­te­rimiz ekinshi jyl qa­tarynan Devıs kýbogynyń fınal­dyq kezeńinde oı­naýǵa múm­kindik aldy.