Aımaqtar • 10 Naýryz, 2020

Batys Qazaqstanda baǵany eriktiler toby baqylaıdy

27 retkórsetildi

Prezıdent Qasym-Jomart Toqaevtyń tapsyrmasymen Batys Qazaqstan oblysynda shuǵyl áreket shtaby quryldy. Shtab jetekshisi – óńir basshysy Ǵalı Esqalıev. Top músheleri qurylyp, búgin alǵashqy jıynyn ótkizdi.

Bul shtabtyń basty mindeti – álemdik ekonomıkadaǵy ózgerister, munaı baǵasynyń túsýi men AQSh dollary baǵamynyń kóterilýi, Reseı rýbli men teńge araqatynasynyń ózgerýi sekildi syrtqy faktorlardyń jaǵymsyz áserinen batysqazaqstandyqtardy qorǵaý.

- Biz osyndaı jaǵdaıda óńir boıynsha qandaı keshendi sharalar atqaratynymyzdy naqtylap, antıkrızıstik josparymyzdy daıyndap jatyrmyz. Shtab músheleri – oblystyq basqarmalar men basqa da memlekettik organdar basshylary. Eń basty mindetimiz – áleýmettik mańyzy bar taýarlardyń baǵasyn ósirmeý. Monıtorıng arqyly taýar óndirýshilermen birlese otyryp, baǵanyń turaqtylyǵyn saqtaımyz. Jumys jasap jatqan kásiporyndarǵa qandaı kómek bolady, eksport-ımporttyń áseri, sonyń bárin talqylaımyz. Batys Qazaqstan oblysy boıynsha memleket tarapynan ýáde etilgen barlyq áleýmettik kómek sol kóleminde jetkiziledi. Bul salada eshqandaı alańdaýshylyqqa negiz joq. Áleýmettik kómek alatyn azamattar úshin jyl sońyna deıin tólenetin járdemaqy mólsheri tolyq qarastyrylǵan, - dedi Batys Qazaqstan oblysy ákiminiń birinshi orynbasary Muhtar Mankeev.

Qazirgi boljam boıynsha shuǵyl áreket shtaby jyl sońyna deıin jumys istemek. Biraq Muhtar Mankeevtiń oıynsha «birneshe aı ishinde ekonomıka óz qalpyna kelýi tıis».

Árıne, ekonomıkalyq daǵdarystan jergilikti kásipkerler de zardap shegýi múmkin. Sondyqtan Batys Qazaqstan oblysy ákimdigi kásipkerlikti qoldaýǵa arnalǵan «Bıznesti qoldaý kartasy», «Qarapaıym zattar ekonomıkasy», «Importty aýystyrý» sekildi memlekettik baǵdarlamalar aıasynda olarǵa da kómek kórsetpek. «Osy atalǵan baǵdarlamalarda nesıeniń sýbsıdııasyn tómendetý, kepildikke jetpeı jatqan qarjynyń 85%-ǵa deıin mólsherin memleket tarapynan berý sekildi naqty quraldar bar, biz olardy qoldanamyz. Bizdiń oblysqa qaı taýar qandaı kólemde kelip jatyr, osyny qarap, sol baǵyttaǵy kásiporyndarmen jumys isteımiz. Árıne, bul jerde bıznestiń búkil salasy qaralmaıdy, halyq eń jıi, kúndelikti tutynatyn áleýmettik taýarlarǵa arnalatyn bolady» deıdi oblys ákiminiń birinshi orynbasary. 

- Biz búgin oblys aýmaǵyndaǵy taýar balansyn zerttep shyqtyq. Qandaı taýardy shetten alamyz, ózimizde qandaı qor bar, eksporttyq mindettemelerimizdiń mólsheri qandaı, sonyń bárin eseptedik. Birden aıta keteıin, dál búgin aımaqtaǵy áleýmettik taýarlar qory da, balans nátıjesi de oń, alańdaýǵa esh negiz joq. Sondyqtan áldebir taýarlar defısıt bolyp, baǵasy kóterilip ketedi degen boljam joq. Al 19 zattan turatyn áleýmettik taýarlar tizimin kún saıyn qarap otyramyz. Bul baǵytta bizdiń tájirıbemiz jeterlik. Oblys aýmaǵynda birneshe jyldan beri turaqtandyrý qory jumys istep keledi. Oral qalasy boıynsha 20 núktede áleýmettik taýarlar saýdasy uıymdastyrylǵan. Buǵan qosa «Altyndar» saýda júıesiniń 17 keshenine turaqtandyrý qorynyń taýarlary qoıylyp jatyr. Turaqtandyrý qorynyń qarjylyq aınalymy 300 mln teńgeden astam, jyldyń ár kezeńine baılanysty defısıtke aınalýy múmkin taýarlar aldyn ala satylyp alynyp, naryqta tapshylyǵy sezile bastaǵan sátte aınalymǵa shyǵady. Qordyń táýelsiz komıssııa músheleri bar, bolashaq josparlardy solarmen talqylaımyz, - deıdi Muhtar Mankeev.

Aıtpaqshy, Batys Qazaqstan oblysy boıynsha áleýmettik taýarlar baǵasyn negizsiz ósirgen oqıǵa kezdesken jaǵdaıda, «109» jedel aqparat nústesine habarlasyp, aqparat berýge bolady. Baǵa monıtorıngin «Smart Oral» mobıldi qosymshasynyń «Praıs skaner» qyzmeti arqyly da retteýge bolady. Sonymen birge bıylǵy eriktiler jyly óńirde qurylyp jatqan volonterler qozǵalysynyń bir toby áleýmettik baǵalardy qadaǵalaýmen aınalyspaq.

Qazaqstanda áleýmettik azyq-túlikke qoıylatyn qosymsha baǵa mólsheri zańmen bekitilgen, eger odan asyp ketse, kásipkerge shara qoldanylady.

Aıta keteıik, Batys Qazaqstan oblysynda 651 myń adam turady, bul halyqtyń jartysynan kóbi Oral qalasynda shoǵyrlanǵan.

 

Batys Qazaqstan

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar