Parlament • 12 Naýryz, 2020

Kóshi-qon jáne poshta qyzmeti talqylandy

33 retkórsetildi

Senat Tóraǵasy Darıǵa Nazarbaevanyń tóraǵalyǵymen Palatanyń jalpy otyrysy ótti. Onda depýtattar Joǵarǵy sot sýdıalaryn saılap, birqatar zań qabyldady.

Daýys berý nátıjesinde Nurǵazy Ábdiqanov, Marǵulan Bekturǵanov jáne Sholpan Danııarova Joǵarǵy sot sýdıasy qyzmetine taǵaıyndaldy. Otyrysqa qatysqan Joǵary Sot Keńesiniń tóraǵasy Talǵat Donaqov «Memleket basshysy atalǵan azamattardy Joǵarǵy sot sýdıasy qyzmetine saılaý týraly usynymdy engizdi. Tanystyrylǵan bul adamdardyń kóp jyldyq sýdıalyq eńbek ótili bar», dedi. Sonymen qatar Konstıtýsııalyq Keńestiń múshesi Únzıla Shapaqtyń ókilettik merziminiń aıaqtalýyna baılanysty ony qaıta taǵaıyndaý úshin kandıdatýrasy usynylyp, atalǵan laýazymǵa qaıta saılandy. Jańa saılanǵan sýdıalar Senat otyrysynda saltanatty túrde ant berdi. Sonymen qatar senatorlar Ortalyq saılaý komıssııasy múshesi Baqyt Meldeshevtiń ókilettigin toqtatý jáne qyzmetinen bosatý týraly qaýly qabyldady.

Ári qaraı otyrystyń kún tártibine sáıkes depýtattar «Qazaqstan Respýb­lı­kasynyń Úkimeti men Reseı Federa­sııasynyń Úkimeti arasyndaǵy «Baı­qońyr» keshenin gazben jabdyqtaý týraly kelisimdi ratıfıkasııalaý týraly» zań jobasyn talqylap, ony bir aýyzdan qabyldady. Zań jobasyn Energetıka mınıstri Nurlan Noǵaev tanystyrdy. Mınıstrdiń aıtýynsha, Kelisim «Baıqońyr» keshenin gazben qamtamasyz etýdiń quqyqtyq negizderin aıqyndaýǵa baǵyttalǵan jáne tutynýshylardy suıytylǵan munaı gazynan tabıǵı gazǵa kóshirýdi kózdeıdi. «Búginde Baıqońyr qalasynda 328 kóppáterli turǵyn úı, 45 jeke turǵyn úı, 5 mektep, 3 bala­baq­sha jáne kópsalaly aýrýhana tabıǵı gazǵa qosylǵan. Suıytylǵan munaı gazynyń baǵasy bir kılosyna 343 teńge nemese tekshe metrge shaqqanda 714 teń­geni quraıdy. Al Baıqońyr qalasy jáne Qy­zylorda oblysyndaǵy tabıǵı gazdyń bólshek baǵasy turǵyndar úshin qosymsha qun salyǵyn eseptemegende bir tekshe metrge 18,6 teńge, zańdy tulǵalar já­ne bıýdjettik uıymdar úshin bir tekshe metri 18,9 teńge. Osy kelisim turǵyndar úshin kommýnaldyq qyzmet shyǵyndaryn azaıtýǵa múmkindik beredi. Sebebi suıy­tylǵan gazǵa qaraǵanda, tabıǵı gazdyń quny aıtarlyqtaı arzan. Budan basqa, Baıqońyr qalasynda gazdy bólý ınfraqurylymy salystyrmaly túrde jańa bolyp esepteledi», dedi Energetıka mınıstri.

Odan keıin Qazaqstan Respýblı­ka­synyń Úkimeti men О́zbekstan Res­pýb­­lıkasynyń Úkimeti arasyndaǵy Zańsyz kóshi-qonǵa qarsy kúrestegi ynty­maqtastyq týraly kelisim ratıfıkasııalandy. Qujatty tanystyrǵan Ishki ister mınıstri Erlan Turǵymbaev bul zań qabyldanǵanda qos azamattyq jáne zańsyz kóshi-qonǵa qatysty máselelerdi retteýge múmkindik beretinin aıtty. «Statıstıka boıynsha 2019 jyly shekara arqyly 6 mln azamat kirgen, onyń ishinde 2,5 mıllıony О́zbekstan azamaty. 1,5 mıllıony tranzıt arqyly basqa elge ketse, 1 mıllıon azamat elimizde tir­kelgen, onyń ishinde 500 myńnan asta­my ýaqytsha jumys istegen. Osy keli­sim arqyly qos azamattyqty joıyp, ult­tyq qaýipsizdikti qamtamasyz etemiz. Negizi, Qazaqstan men О́zbekstan memle­ketterinde zań boıynsha qos azamattyq joq», dedi Ishki ister mınıstri Erlan Turǵymbaev.

Senator Ábdáli Nuralıev óz kezeginde syrttan keletin mıgranttar arasynda quqyq qorǵaý organdarynyń izdeýinde júr­gen ári elimizdiń qaýipsizdigine nuq­san keltiretin azamattardyń bolýy múmkin ekenin aıtyp, alańdaýshylyq bil­dirdi. Al Sársenbaı Eńsegenov eki el ara­syndaǵy kelisimniń orys tilinde jazy­latynyna qatysty eskertý jasady.

Palata depýtattary «Dúnıejúzilik poshta odaǵynyń Jarǵysyna Toǵy­zyn­shy qosymsha hattamany ratıfıka­sııalaý týraly» zań jobasyn qarady. Qujatty tanystyrǵan Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıevtiń aıtýyn­sha, zań jobasy poshta qyzmetiniń tıimdi jumys isteýin jáne ýaǵdalasýshy elder úkimetteriniń ókiletti ókil­deriniń mádenı, áleýmettik jáne eko­no­mıkalyq salalardaǵy halyqaralyq ynty­maqtastyq maqsattaryna qol jetkizýge járdemdesý arqyly elder arasyndaǵy baılanystyń damýyn jaqsartady, sondaı-aq sapaly, qoljetimdi, ámbe­bap poshta qyzmetterin damytýdy ynta­lan­dyrýǵa múmkindik beredi. «Qujat qarjy­lyq, quqyqtyq, ekologııalyq ári áleý­mettik-ekonomıkalyq másele­lerge ákelip soqpaıdy, poshta baılany­sy salasyndaǵy halyqaralyq yntymaq­tas­tyqty qoldaý úshin qolaıly jaǵdaılar jasaıdy», dedi A.Jumaǵa­lıev.

Senator Bekmyrza Elamanov zań jo­basyn talqylaý barysynda aýyl­dyq eldi mekenderdi poshta qyzmeti­men qamtamasyz etý máselesine nazar aýdardy. Ol poshtanyń aýyl turǵyn­daryna qarjylyq jáne banktik qyzmet kórsetetinin, zeınetaqy men járdem­aqyny alyp, kommýnaldyq qyzmet aqysyn tóleý de poshta arqyly júzege asatynyn eskerý keregin eske saldy. Senat depýtaty Muhtar Qul-Muhammed búginde gazetterdiń tırajy azaıyp bara jatqanyn aıta kele, ony saqtaý maqsatynda qazaq tilindegi basylymdardy aýyl-aımaqqa jetkizýdiń baǵasyn tómendetý keregin aıtty. Bul turǵyda «Qazposhta» AQ basqarma tóraǵasy Sáken Sársenov gazet-jýrnal tasymalynyń tarıf baǵasyn tómendetý úshin memleket tarapynan sýbsıdııa qajet ekenin jetkizdi.

Depýtattar 2006 jylǵy 6 qarashadaǵy Qazaqstan Respýblıkasynyń Úkimeti men Armenııa Respýblıkasynyń Úkimeti arasyndaǵy Tabys pen múlikke salynatyn salyqtarǵa qatysty qosarlanǵan salyq salýdy boldyrmaý jáne  salyq salýdan jaltarýǵa jol bermeý týraly konvensııa jáne oǵan Hattama sheńberinde Qazaqstan Respýblıkasynyń jáne Armenııa Respýblıkasynyń ýákiletti organdary bergen rezıdenttikti rastaıtyn resmı qujattardy taný tártibi týraly notalar almasý nysanyndaǵy kelisimdi ratıfıkasııalady.

Senat otyrysy barysynda bir­ne­she depýtattyq saýal joldandy. Olar­dyń qatarynda qorshaǵan ortanyń eko­lo­gııalyq qaýipsizdigi, jergilikti polısııa qyzmeti, bilim jáne basqa da salalarǵa qatysty máseleler qozǵaldy.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar