Zań jobasy ónerkásiptik qaýipsizdik salasyndaǵy zańnama normalaryn jetildirý, qaýipti obektilerde ónerkásiptik qaýipsizdik salasyndaǵy memlekettik qadaǵalaýdy júzege asyrý tıimdiligin arttyrýǵa, ónerkásiptik qaýipsizdik salasynda jumys isteýge tartylatyn attestattalǵan jáne apattyq-qutqarý jumystaryn júrgizý boıynsha qyzmet kórsetetin uıymdar qyzmetin retteýge, qoldanystaǵy zańnamadaǵy olqylyqtardy joıýǵa baǵyttalǵan.
Kez kelgen kásiporynnyń qaýipsizdigin qamtamasyz etýdiń negizi -qaýipsizdik tehnıkasy jáne tehnologııalyq prosesterdi júrgizý boıynsha barlyq belgilengen normalar men nusqaýlardy saqtaý. Aıtalyq, shıkizatty qoımaǵa qoıý nemese janǵysh zattardy saqtaýdyń belgilengen erejeleriniń buzylýy, tehnıkaǵa sapasyz qyzmet kórsetý sııaqty jaǵdaılar oqys oqıǵaǵa aparyp soǵýy múmkin. Salada atqarylǵan jumystarǵa jáne qadaǵalaý sharalarynyń joǵary kórsetkishterine qaramastan, taldaý qorytyndycy elimizde ónerkásiptik qaýipsizdiktiń jaı-kúıi aıtarlyqtaı kúrdeli ekenin kórsetti. 2019 jyly 28 apat oryn aldy, bul 2018 jylmen salystyrǵanda 1 oqys oqıǵaǵa kóp. Apat saldarynan 24 adam zardap shekti, onyń ishinde 11 adam kóz jumsa, 7 adam aýyr jaraqattanyp, 6 adam jeńil dárejede jaraqat alǵan.
Tekserý aktilerine sáıkes jazataıym oqıǵalardyń negizgi sebebi eskirgen, moraldyq jáne fızıkalyq turǵydan tozǵan, qyzmettiń normatıvtik merzimin ótegen jabdyqtardy paıdalaný bolyp otyr. Tirkelgen oqys oqıǵalardyń taǵy bir sebebi - ónerkásiptik qaýipsizdik talaptary men erejelerin buzý. Úshinshiden, óndiristik baqylaýdyń azdyǵy, ıa bolmasa tipten júrgizilmeýi jáne qyzmetkerler biliktiliginiń tómendigi.
Jumys tobyna qatysýshylardyń pikirinshe, zań jobasy azamattardy zııandy áserden qorǵaý deńgeıin arttyrýǵa jáne óndiristik jaraqattanýdy tómendetýge múmkindik beredi. Sondaı-aq attestattalǵan uıymdar men apattyq-qutqarý qyzmetteri jumysyna profılaktıkalyq qadaǵalaý júrgizý sheńberinde quqyq buzýshylyqtardyń aldyn alý kózdelgen.
Bul túzetýler qaýipti óndiristik obektilerde ónerkásiptik qaýipsizdikti qamtamasyz etý júıesiniń tıimdiligin arttyrýǵa múmkindik beredi.
