«Elimizde qalyptasqan tótenshe jaǵdaıǵa jáne qalamyzda karantın jarııalaýǵa baılanysty Májilistiń de jumys rejımi ózgeretin bolady. Erteńnen bastap Májilis jumysynyń basym bóligi basqa formatqa kóshedi. Bul - árbir azamattyń qaýipsizdigin saqtaý úshin jasalyp jatqan sharalar. Oǵan bárimiz túsinistikpen jáne joǵary jaýapkershilikpen qaraýymyz qajet, - dedi N. Nyǵmatýlın.
Jalpy otyrystar, komıtetter men zań jobalary boıynsha jumys toptarynyń otyrystary kezinde ǵana depýtattar Májilis ǵımaratynda bolady. Májilis Spıkeri atap ótkendeı, basqa kúnderi telekommýnıkasııanyń zamanaýı túrlerin paıdalaný arqyly qashyqtan jumys isteıdi.
Zań jobasyna qatysy bar taraptardyń úzdiksiz jumysyn qamtamasyz etý úshin zamanaýı ınternet-tehnologııany paıdalana otyryp, qashyqtan jumys isteý ádisi engiziledi. Múddeli memlekettik organdardyń, parlamenttik emes saıası partııalardyń, saraptamalyq qaýymdastyqtyń usynys-pikirlerin jınap, pozısııalardy kelisý boıynsha jumystar beınekonferensııa, skaıp, selektorlyq jınalys, basqa da kommýnıkasııa túrlerin qoldaný arqyly júzege asyrylady. Zańdardy jobalyq baqylaý boıynsha jumys toptarynyń otyrystary olardyń músheleri men ázirleýshi organ ókilderiniń ǵana qatysýymen ótedi.
Májilis Spıkeri negizgi jumys toptary, jalpy otyrystar jáne beıindi komıtetter jıyndary burynǵydaı onlaın-rejımde Májilis saıty (www.parlam.kz) arqyly taratylatynyn aıtty. Parlamenttik tyńdaýlar men úkimettik saǵattar keıinge shegeriledi. Májilis ǵımaratynda jınalystar, jumys kezdesýleri, azamattardy qabyldaý ótkizýge shekteý qoıylady.
Depýtattar men Apparat qyzmetkerleri úshin issaparlar, basqa da qyzmettik jáne jeke saparlarǵa tyıym salynady.
Sonymen qatar Májilis Apparaty qyzmetkerleriniń 70% paıyzy jalaqysy saqtala otyryp, qashyqtan jumys isteý formatyna kóshiriledi. Qalǵan bóligi qysqartylǵan jumys ýaqyty boıynsha qyzmet atqarady. Jańa jumys tártibin alǵa tarta otyryp, Májilis Tóraǵasy zań shyǵarý jumysynyń qarqyny men sapasyn tómendetpeýge aıryqsha nazar aýdardy.
