Jas memlekettiń jańa júıesinde paıda bolǵan naryq qatynasyn damytyp, el sanasyn soǵan qaraı baǵyttap, órkendeýdiń tıimdi nátıjelerine qol jetkizý úshin bálkim talapshyl bolýyna týra kelgen kezi bolǵan shyǵar, biraq onyń bári qadamyn qaltyldaı basyp, irgesin endi kóterip kele jatqan eldi aıaǵynan nyq turǵyzýǵa arnalǵany belgili.
N.Nazarbaev álemniń qalaı ózgergenin, al onymen birge Qazaqstannyń da kelbeti ózgerýi tıis ekenin, basqarý júıesine jańa kózqaras pen basqa da tásilder qajet ekenin jaqsy baǵamdaǵandyqtan, qoǵamdy jańǵyrtý jolyndaǵy jasampaz isin jalǵastyrý muratyn saıası izbasarlaryna tabystap, ókilettigin toqtatatynyn jarııalaýy arqyly tulǵalyq tuǵyryn bıiktete tústi. Bul – izgilikke toly sheshim.
Halyqtyń tańdaýy men qalaýy negizinde el Prezıdenti bolyp saılanǵan Qasym-Jomart Toqaevqa amanattalǵan bıliktiń turaqtylyqtyń kepili ispetti tynyshtyqpen jalǵasýy el kóńilindegi kúdikti lezde seıilte aldy. El arasyna iritki salmady. Jurt alańdy betke alyp, dúrbeleń týdyryp, soıqandy salǵan joq, áldeqandaı talaptar qoıyp, ákimdik aldynda tabandap jatyp alatyn jat minez kórsetken joq. Kerisinshe, qazaqstandyqtar birneshe til biletin polıglot, tájirıbeli dıplomat, saıasat pen rýhanııatty teń ıgergen ıntellektýal Q.Toqaevtyń esimin jańa basshysy retinde estigende tereń tynys alyp, kóńili tynshydy. Qasym-Jomart Kemelulynyń adaldyǵyna, tazalyǵyna sendi. О́z zamanyndaǵy zııalylardyń aldyńǵy qatarynda bolǵan jazýshy Kemel Toqaevtyń balasynyń basqasha bolýy múmkin de emes. Saıası saýaty joǵary órkenıetti eldegi sarapshylardyń bári de Elbasynyń el úshin jasaǵan sheshimin, memleket basqarýdaǵy bul danalyǵyn bıik baǵalady. Sodan beri de jyl tolǵan ýaqyt ishinde Qasym-Jomart Kemeluly el basqarý isindegi ózindik óneri men tájirıbesin tolyqtaı tanytyp, damýdyń jańa kezeńi úshin tıimdi júıe qalyptastyra alatynyn dáleldep úlgerdi dep nyq senimmen aıta alamyz.
El bıligindegi eleýli ózgeristiń halyq úshin jaǵymdy, jaıly bolýynda Elbasynyń eńbegi zor ekenin kóziqaraqty Qazaqstan jurty joqqa shyǵara almaıdy. Elbasy mártebesindegi rólin joǵary ustap kele jatqan N.Nazarbaev halyqaralyq qoǵamdastyq aldynda Qazaqstan bedelin bıiktetip júretin qyzmetine áli de qylaý túsirgen joq. Jyl aıasynda birneshe ret saıası maqsattaǵy sheteldik saparlarǵa shyǵýy sonyń aıǵaǵy bolsa kerek.
О́kilettigin toqtatyp, el qyzmetinen qoly bosaǵan soń Nurekeń birden týǵan jerine baryp, qarapaıym aýyl turǵyndarymen, aǵaıyn-týysymen kezdesti. Qanshama shaqyrymdarǵa qashyqtap, bıikterge samǵap ketse de, jumyr basty pendeniń árbiriniń týǵan jerimen kindiginiń baılaýly ekenin túsinsek, aýylymen jyly qarym-qatynasyn eshqashan joǵaltpaǵan Elbasy saǵynysh pen ińkár kóńildiń qandaı bolatynyn kópke úlgi etýden jalyqqan emes. Sol qaýyshý men kezdesýlerde qanshama adamgershilik, kishipeıildik, keń minez kórinis taýyp jatady. Adamdy adam etip ustap turǵan da osyndaı tabıǵı taza minez. Dúrmekke toly dúnıe ózgeredi, pyshaqtyń júzindegi saıasat almasady, biraq mundaı minez adamdy bıikke jeteleıtin máńgilik qundylyqtardyń qatarynda bolǵandyqtan, muqalmaıtynyn dáleldegen.
Asanáli ÁShIMOV,
Qazaqstannyń Eńbek Eri,
KSRO halyq ártisi
