Orynkúl shekteýli múmkindigine qaramastan ómirlik maqsatyna jetken batyl áıel eken. Otbasynda 4 bala ósip keledi. Ismerligin úıretýden sharshamaǵan. О́zi tiginshiliktiń qyr-syryna úıretken 8 shákirti qazir naǵyz sheber bolyp alypty. Sonyń arqasynda sehtyń jumysyn 24 saǵat boıy toqtatpaı, eki aýysymda, kezekpen jumys isteýde.
Biraq aıtarymyz bul jaıynda emes. Jaqynda bizge ózi habarlasqan Orynkúl apaı bir syryn aıtyp, keńes surady. 1998 jyly Qytaı aýmaǵynan oralǵan ismer áıeldiń ákesi 2 jasynda arǵy betke aýǵan jurtpen birge ketken eken. Bul 1930 jyldardaǵy aqtańdaq kezeń bolýy tıis, tárkileýden keıingi ashtyq zulmatymen tuspa-tus keledi. Orynkúldiń biletini, arǵy atalarynyń balalary qazaq jerinde qalǵan.
– Ákemniń atalas týystary osy jaqta qalǵan eken. Úlkenderi qýdalanyp, atylyp ketkeni anyq. Al olardan taraǵan urpaq soǵys jyldarynda Balalar úıine jiberilipti. Aǵaıyndy ul men qyz Qaraǵandy qalasyndaǵy jetimder úıinde ósipti. Ákemiz týystaryn izdeýmen ótti. 1970 jyldary Qazaqstanmen hat-habar almasý jaqsy júrip turǵanda izdeý salǵan, habaryn taýypty. 1978 jyly bolýy kerek, sol kezdegi «Lenınshil jas» gazetine bizdiń áýletti izdegen shaǵyn habarlama basylypty. Ony eldegi aǵaıyn bizge jiberip, ákem týysynan habar alyp, tapqandaı edi. Aǵaıynymyzdan 1980 jyldardyń basyna deıin hat kelip turdy. Keıin ol toqtap qaldy. Bizdiń úıdegi hattar joǵaldy. Ákem qaıtqan soń týys izdeýge múmkindik bolmady. Mekenjaıy saqtalmady. Atyn da umytyppyn. Tursynbek nemese Turysbek bolýy kerek. О́zi Qaraǵandy oblysynda ma, qalasynda ma laýazymdy qyzmet atqarǵany anyq. Ákemiz solaı deıtin, – dep muńaıǵan Orynkúl «Egemen Qazaqstan» gazeti arqyly týysyna izdeý salyp, bir habaryn bilýge qushtar ekenin aıtty.
Qazirgideı aqparat almasý zamanynda Orynkúldiń bul ótinishin jerde qaldyrýǵa bolmas. Osyǵan oraı «Egemen Qazaqstan» gazetiniń redaksııasy 1970-1980 jyldary Qaraǵandy oblysynda turǵan azamattardyń arasynan Orynkúl Baratjannyń týysyn izdeýdi bastaıdy. Oqyrmandardan qandaı da bir aqparat bolsa, redaksııaǵa habarlasýyn suraımyz.
Almaty oblysy
