– Bul ıdeıa aqpan aıynyń basynda týǵan edi. «Naýryz merekesi taıanǵanda bir-birimizge ózimiz ósirgen tiri gúl syılaıyq. Ol úshin qazirden bastap óskinderdi tamyrlandyryp, ábden tamyr jaıǵasyn arnaıy ydystarǵa egip, baptaıyq» degen bastama kóterdik. Bul ıdeıany ujymnyń úlken-kishisi túgel qoldady. Negizi, óz qolyńmen ósirgen gúlińdi aınalańdaǵy adamdarǵa syılaý – jerdiń júzin gúldendirip, túrlendiretin Naýryz meıramynyń tabıǵatyna tán ǵoı. Sol sebepti bizdiń ujymnyń bul bastamasy buqaralyq sıpat alady dep senemiz, – deıdi «Oral óńiri» gazetiniń bas redaktory, jazýshy Baýyrjan Ǵubaıdýllın.
Aıta keteıik, shyǵa bastaǵanyna ǵasyrdan asqan baıyrǵy gazette áýelden tatýlyǵy jarasqan tamasha ujym qyzmet etedi. Ár aptanyń juma kúnderi arnaıy dastarhan jaıyp, shelpek pisirip, osy redaksııada qyzmet etken aǵa býyn jýrnalısterdiń arýaǵyna duǵa baǵyshtaıtyn dástúri de kópke úlgi. Álemdi ábigerge salǵan koronavırýs indetine baılanysty tótenshe jaǵdaı kezinde de ujymnyń aýyzbirshiligi arta tústi. Jas tilshi Lázzat Shaǵataı ózi tigip daıyndaǵan betperdeni áriptesterine tegin taratyp, janashyrlyq kórsetti.
Batys Qazaqstan
