«Topan» JShS munaı-gaz salasyna qajetti qural-jabdyqtar óndirisinde 20 jyldan beri tabysty eńbek etip kele jatqan kásiporyn. Onyń 50-den asa túrli ónimin otandyq jáne sheteldik munaı-gaz óndirýshi kompanııalar qatar paıdalanyp keledi. Olardyń ishinde áıgili Qarashyǵanaq Petroleým Opereıtıng b.v. halyqaralyq alıansy da bar. Osy kezge deıin jergilikti jáne sheteldik 50-den asa ken óndirýshilermen tyǵyz áriptestik ornatqan «Topan» JShS endi óndiris aıasyn odan ári ulǵaıtyp, jylyna 20 myń tonnaǵa deıin ónim óndirip, jańadan 50 adamǵa jumys taýyp bergeli otyr. Aıta keteıik, buǵan deıin elimizdegi munaı-gaz kompanııalary hımııalyq reagentterdi Qytaı men Reseıden alyp kelgen kórinedi.
- Qazaqstannyń batys aımaǵynda munaı-gaz óndirisi jaqsy damyǵan. Sondyqtan osy saladaǵy ár kompanııaǵa da «Topan» shyǵaratyn hımııalyq reagentter kerek. Buryn ol shetelden ákelinetin bolsa, endi ózimizdiń Oral qalasynda shyǵarylatyn bolady. Osy arqyly keminde 20 mln AQSh dollary kóleminde ımportty almastyrǵaly otyrmyz. Oǵan qosa jańa jumys oryndary ashylady, salyq túsimi kóbeıedi. Munyń bári bizdiń halqymyzdyń ıgiligi úshin jasalyp otyr. Memleket tarapynan biz «Topan» kompanııasynyń nesıesin sýbsıdııalaýǵa kómek berip jatyrmyz, - dedi jańa sehtyń ashylýyna oraı ótken saltanatty sharaǵa arnaıy qatysqan Batys Qazaqstan oblysynyń ákimi Ǵalı Esqalıev.
Quryltaıshylardyń aıtýynsha, jańa jobaǵa bas-aıaǵy 4 mlrd teńge qarjy jumsalǵan. Al «Bıznestiń jol kartasy» biryńǵaı baǵdarlamasy boıynsha nesıeniń paıyzdyq mólsherlemesin sýbsıdııalaý úshin memleket tarapynan 726 mln teńge kómek kórsetilgen. Jańa zaýyt 4 gektar aýmaqqa ornalasqan. Birneshe óndiristik bólikke bólingen sehtyń daıyn ónim saqtalatyn qoımasy da bar.
- Dál osyndaı qıyn kezeńde Prezıdent Qasym-Jomart Toqaev jumys oryndaryn barynsha saqtaýǵa tapsyrma bergen bolatyn. Sizder ony saqtap qana qoımaı, qosymsha 50 jumys ornyn ashýǵa qol jetkizip otyrsyzdar. Bul óte jaqsy jańalyq. Qazaqstannyń ekologııalyq tazalyǵy, óndiristik qaýipsizdigi úshin qajetti kásiporynnyń ashylýymen quttyqtaımyn. Jańa seh Batys Qazaqstannyń ǵana emes, búkil elimizdiń odan ári damýyna úles qosady dep oılaımyn, - dedi óńir basshysy.
- Jańa sehtyń qýaty táýligine 70 tekshemetr hımııalyq reagent shyǵarýǵa jetedi. Biz óndirgen arnaıy hımııalyq qospalardy munaıgaz óndirýshi jáne óńdeýshi kompanııalar tutynady. Osy arqyly shetelden ımporttalatyn ónim túrlerin azaıtyp, qazaqstandyq mazmundy baıyta túsemiz, – deıdi «Topan» JShS-nyń damý jónindegi dırektory Ǵaısa Jumalıev.
Jańa sehta qorshaǵan ortaǵa zııany joq zamanaýı qural-jabdyq ornatylǵan. Mamandar Birikken Arab ámirlikterinde, Lıverpýlda, AQSh-ta bilimin jetildirgen eken. Bolashaqta Qazaqstanda óndirilgen hımııalyq reagent ónimi TMD elderimen qatar alys shetelderge de eksporttalýy múmkin.
Sýretti túsirgen Elvıra MEŃDIǴALI
Batys Qazaqstan
