Olaı bolsa, karantın kezinde ashyq ýnıversıtetterdi ashyńyz. Qazir úıde otyryp, sonaý AQSh-taǵy nemese Anglııadaǵy joǵary oqý ornynyń leksııasyn tyńdaýǵa bolady. Biz álemdegi úzdik ýnıversıtetterdiń tegin dárisin aldyńǵy materıalymyzdyń birinde jazǵanbyz. Endi ashyq ýnıversıtetterge kezek keldi.
Jalpy bul uǵym 1969 jyly Ulybrıtanııadaǵy Ashyq ýnıversıtettiń (Open University) qurylýynan bastap paıda boldy. Alǵash ret 1971 jyly talapkerlerin qabyldaǵan bul ýnıversıtettiń qazirgi tańda dúnıe júzindegi 50-dan asa elde stýdentteri bar. Iаǵnı qazirgi qoǵamǵa, ınternettiń zamanyna jańalyq emes. Sonyń negizinde jasaqtalǵan tegin kýrstardyń qory da kóp. Aıtalyq, Ashyq ýnıversıtet arqyly bilim beretin www.open.edu platformasynda «Densaýlyq, sport, fızıologııa», «Bilim berý jáne damytý», «Tarıh pen óner», «Tilder», «Aqsha jáne bıznes», «Tabıǵat pen qorshaǵan orta», «Ǵylym, matematıka jáne tehnologııa», «Áleýmet, saıasat, quqyq» atty bólimderge jiktelgen 900-ge jýyq tegin kýrstarǵa qol jetkizýge múmkindik bar.
Osy úlgide jasalǵan «Qazaqstannyń ashyq ýnıversıteti» baryn oqyrmandardyń biri bilse, biri bile bermes. О́ıtkeni elimizdiń jetekshi JOO-lary men mamandary birlese ázirlegen onlaın-kýrstarǵa tegin qol jetkizý múmkindigin usynatyn bul bilim berý platformasy 2017 jyly qurylǵan Ulttyq aýdarma bıýrosynyń bastamasymen iske asyryldy. Otandyq beldi ýnıversıtetter men túrli halyqaralyq kompanııalar qoldaǵan «Qazaqstannyń ashyq ýnıversıteti» qoldanýshylaryna «Aqparattyq tehnologııalar», «Bıznes», «Gýmanıtarlyq ǵylymdar», «Jaratylystaný ǵylymy» sanattary boıynsha túrli tegin kýrstardy, álemge tanymal ýnıversıtetter mamandaryn daıarlaǵan oqýlyqtardy, paıdaly TED vıdeolaryn qazaq tilinde usynady. Jumystan demalys alǵan barlyq sala qyzmetkerleri ózin kásibı turǵyda damytatyn materıaldardy taba alady jáne eń bastysy tegin paıdalanady. Tek ınternetke qosylǵan qurylǵyńyz bolýy jáne platformaǵa tirkelý kerek.
Máselen, ózimiz belgili jýrnalıst Qaınar Oljaı júrgizetin «Televızııa, radıo jáne jańa medıaǵa mátin jazý» atty tegin kýrsyn bastap kettik.
