Aımaqtar • 25 Naýryz, 2020

Tarazdyqtardyń qoǵamdyq kólik jumysyna kóńili tolmaıdy

21 retkórsetildi

Taraz qalasynyń turǵyndary úshin qoǵamdyq kólik áli de ózekti máselelerdiń biri. Berdibek Saparbaev Jambyl oblysyna ákim bolyp kelgen sátte qoǵamdyq kólikterdiń júrý kestesin túngi saǵat onǵa deıin uzartýdy tapsyrǵan edi. Biraq ol talap oryndalmady. Sol sııaqty, tarazdyqtardan búginde avtobýs marshrýttaryna qatysty kóptegen shaǵym túsýde. Ásirese, turǵyndar áleýmettik jeliler arqyly mereke kúnderi qoǵamdyq kólik qozǵalysynyń aıtarlyqtaı sıregenin jetkizgen.

Oblys ortalyǵyndaǵy marshrýttardyń 40 paıyzyna «Áýlıeatranspass» JShS qyzmet kórsetedi. Kún saıyn seriktestikke tıesili 162 avtobýs 17 baǵyt boıynsha qatynaıdy. Munda jyl saıyn jańa tehnıkalar qatary tolyqtyrylyp, GPS júıesi engizilgen. Alaıda kórsetilip otyrǵan qyzmetterdiń sapasyna turǵyndardyń kóńili tolmaıdy eken. Bul ákim Berdibek Saparbaev osy máselege qatysty tekserý júrgizgende belgili boldy.

«Sońǵy birneshe kún ishinde azamattardan shaǵymdar kóp túsýde. Avtobýstardyń óte sırek júrgeni mereke kúnderi turǵyndarǵa aıtarlyqtaı qıyndyqtar týǵyzǵan. Avtoparkter Taraz qalasy ákimdigimen jasalǵan shartqa qol qoıǵan. Ol sizderdi qoǵamdyq kólikti taza ustaýǵa, tasymal kestesin  jáne halyqpen qarym-qatynas jasasý mádenıetin barynsha saqtaýǵa mindetteıdi. Búgingi tańda avtobýs parkiniń barlyq pýnktteri boıynsha narazylyq bar» degen Berdibek Saparbaev.

Sondaı-aq, ákim endi bul sekildi keleńsizdikter  qaıtalanatyn bolsa, tasymaldaýshy kompanııalarǵa qatań sharalar qabyldanatynyn aıtty. Degenmen, «Áýlıeatranspass» JShS dırektory Rashıd Pirmanovtyń aıtýynsha, ujymmen túsindirý jumystary júrgizilgen. Budan basqa da tasymal máselesinde birqatar másele bar. Máselen, búginde avtobýstardyń tozýy ótkir máselege aınalǵan. Nashar joldardyń saldarynan qoldaǵy bar tehnıkalar jaramsyz kúıge túsýde. Bul rette Taraz qalasynyń ákimi Aıtqazy Qarabalaev oblys ortalyǵynyń kóshelerin jóndeý jumystary kóp uzamaı bastalatynyn aıtty. Al, «SaparTrans 2012» JShS dırektory Baýyrjan Ádilov «Taǵy bir ózekti másele – kásibı júrgizýshilerdiń jetispeýshiligi bolyp otyr. Bizge jumys isteýge kóp adamdar kele bermeıdi» deıdi. Sondyqtan tasymaldaýshy kompanııalar óz jumystarynyń sapasyn jaqsartý úshin jergilikti bılikten tarıfti kóterýdi nemese sýbsıdııalaý arqyly kómek berýdi surap otyr. Bul máselege Berdibek Saparbaev «Tarıfti kóterý máselesi muqııat qaraýdy talap etedi. Sebebi ol qala turǵyndary úshin, ásirese, áleýmettik jaǵynan osal toptaǵy azamattar úshin ońaı soqpasy anyq. Meniń oıymsha, qyzmet kórsetý sapasyn arttyrýǵa qol jetkizbeı turyp, tarıfti arttyrǵan durys emes. Onyń ústine mynandaı qıyn ýaqytta oǵan jiti mán berý kerek» dep jaýap berdi.

Aıta keteıik, búginde avtobýstardy dezınfeksııalaý sharalary júrgizilýde. Taraz qalasynda koronavırýspen kúresý úshin sanıtarlyq jumystarmen aınalysatyn tórt kompanııa bar. Bul rette qoǵamdyq kólik pen aıaldamalar kúnine eki ret dezınfeksııalanýda.

 

Jambyl oblysy

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar