Eldegi tótenshe jaǵdaıdyń engizilýine baılanysty qaýipsizdik sharalary barynsha kúsheıtilgen. Buǵan deıin temirjol vokzalynda 40 poıyz qatynaıtyn, qazir olardyń 33-i toqtatylǵan. Al, jolaýshylardyń sany táýligine 1 myńnan asyp jyǵylatyn. Iаǵnı, áýe qatynasy, temirjol, avto vokzaldardaǵy qaýipsizdik basty nazarda. Nursultan men Almaty qalalarynan, sondaı-aq halyqaralyq baǵyttaǵy qatynaıtyn poıyzdar toqtatylǵan. Júk poıyzdaryna shekteý joq.
–Temirjol vokzalyndaǵy koronavırýstyń aldyn-alý maqsatynda kire beris aýmaǵynda 3 birdeı dıspenser ornatylǵan. Jolaýshylar qolyn tazartady. Barlyq qyzmetkerler betperdemen júredi. 3 qabatta da aýrý belgileri men odan saqtaný amaldary týraly kórneki aqparattar ilingen. Saǵat saıyn barlyq temirjol aýmaǵynda tazalyq jumystary júrgiziledi. Ásirese, bankomat, termınal, kassa, kire beris pen qalaǵa shyǵatyn esiktiń tutqalary barlyǵy muqııat tazartylady. Árbir 5 mınýt saıyn daýysty habarlama arqyly qaýipsizdik sharalary týraly aqparat beremiz,–deıdi Kókshetaý temirjol vokzalynyń bastyǵy Roza Arystanqyzy.
Sanıtarlyq-epıdemıologııalyq qyzmet salasynyń ókilderi ózge stansııalardan kelgen jolaýshylarǵa tutas monıtorıng júrgizedi. Teplovızorlar jetkilikti. Tehnıkalyq qyzmetkerler ár saǵat saıyn vokzaldardyń ishin hlor qosylǵan eritindimen jýyp shyǵady. Al mekeme qyzmetkerlerine medısınalyq maska, sý ótkizbeıtin qolǵaptar men antıseptıkter taratylǵan.
–25-shi naýyzdan bastap temirjol vokzalynda sanıtarlyq baqylaý beketteri uıymdastyrylǵan. Máselen, 1 b sanaty boıynsha mindetti túrde 1 kún zerthanalyq saraptama alý úshin karantınge jatqyzylady. Eger teris nátıje kórsetse, 13 kún úıdegi karantınge jabylyp, qaralatyn bolady,–deıdi oblystyq taýarlar men kórsetiletin qyzmettiń sapasy men qaýipsizdigin baqylaý departamentiniń jetekshisi Aınagúl Mýsına.
О́ńirde koronavırýstyń aldyn-alý sharalaryna erekshe basymdyq berilgen. Áıtse de, quzyrly organdar azamattardy asa qajetti jaǵdaılar bolmasa, múmkindiginshe úıde bolýlaryn suraıdy. Sonymen qatar, adam kóp jınalatyn jerge barmaı, naýqas adamdarmen qarym-qatynasty barynsha shektegen abzal.
