Sýretti túsirgen Erlan Omar, «EQ»
Áli de kún shyqty deımiz. Shyn máninde, kúnge shyǵamyz. Kún batpaıdy, kúnnen batamyz. Sebebi, kún – ornynda, jer aınalyp tur. Aınalyp, kúnge shyǵady. Osydan bes ǵasyr buryn osy úshin Brýnońyz da, Kopernıgińiz de, Galıleıińiz de azap qushyp edi. Birin otqa jaǵyp, birin úıge qamaǵan. Úıde otyrǵandardy oılaǵanda, sol úshin úıqamaqta otyrǵan Galıleıdi de oılap qoıamyz. «Ne deseńiz de, jer aınalady!» degen Kopernıktiń de yshqynǵan úni estile me, qalaı...
Til – tiri organızm, ósedi, ózgeredi, qubylady, óledi. Eýropanyń kóp halqy east, ost deıtin, slavıan tektes halyqtar vostok dep júrgen shyǵys, kúnshyǵysymyz sol baıaǵy kári de ardaqty grektiń anatolē sózi eken. Anadoly, Túrkııadaǵy. Kúnniń shyǵatyn jeri. Tynysh turǵan kúndi qulaıdy dep júrgen de taǵy eski slavıan tili. Zapad – zapadatı – padat. Oǵan qaraǵanda biz qulatpaımyz, jaı ǵana batyryp jiberemiz. Taýdan shyǵady, teńizge batady degendeı. Osydan-aq adamzattyń sanasy alǵashqy qaýymdyq qurylystaǵy, odan keıin ańyzdar, epostar dáýirindegi sábılik túsinikterdi áli de saqtap qalǵanyn ańǵarýǵa bolady. Nesi bar, tym eseıip ketken de jaqsy emes, sábılik, balalyqtan bir belgi qalý kerek.
Úıde qalyńyz dese, úıde qalamyz. Úıde otyryńyz dese, úıde otyramyz. Ata-anamyz bala kúnimizde de solaı aıtpaýshy ma edi. Sodan jaman bolǵan joqpyz. Qańǵymadyq. Kitap oqydyq, óner úırendik.
Betperde kıgen kóktem. Barlyq adamdar bir kezde bala bolǵan. Eseıip ketken balalar. Bir bólmedegi jeti mıllıard bala.
