Kompanııa aldyn alý is-sharalar keshenin júıeli túrde iske asyrýda. Jaǵdaıdy turaqty qadaǵalaıtyn jedel shtab quryldy jáne QMG tobynyń qyzmetkerlerin qorǵaý úshin shuǵyl sharalar qabyldandy. Enshiles uıymdarda qatań aldyn alý sharalary qolǵa alyndy. Sonyń ishinde joǵary táýekel sanatyna jatqyzylǵan qyzmetkerlerdi úıden jumys isteýge aýystyrý, qashyqtyqtaǵy jumys tártibin engizý, óndiris pen jobalardaǵy qyzmetkerlerdiń bir bóligin demobılızasııalaý.
Sonymen birge, 2020 jylǵy 2 sáýirde Atyraý qalasy boıynsha taýarlar men kórsetiletin qyzmetterdiń qaýipsizdik sapasyn baqylaý basqarmasy jasaǵan saraptama qorytyndysy boıynsha «Atyraý munaı óńdeý zaýyty» JShS qyzmetkeriniń koronavırýstyq ınfeksııany (COVID-19) juqtyrǵany rastaldy.
Bul qyzmetker 2020 jylǵy 28 naýryzda jumystan tys keshki ýaqytta basqa naýqas adammen baılanysta bolý saldarynan ınfeksııany juqtyrý yqtımaldyǵy týraly habarlady. Bizdiń áriptesimiz qoldanystaǵy erejelerdi basshylyqqa ala otyryp, 2020 jylǵy 29 naýryzda ózi oqshaýlandy. 2020 jylǵy 1 sáýirde baılanysta bolǵan adam koronavırýstyq ınfeksııaǵa shaldyqqany rastalǵannan soń AMО́Z qyzmetkerinen saraptama alyndy. Onyń nátıjeleri búgin belgili boldy.
QMG Atyraý munaı óńdeý zaýytynyń qyzmetkeri óz áriptesterimen baılanysta bolmaǵanyn erekshe atap kórsetedi. Ol sońǵy ret jumys ornynda 2020 jylǵy 28 naýryzda boldy. Atyraý munaı óńdeý zaýytynyń basshylyǵy bekitilgen rásimderge sáıkes onymen baılanysta bolýy múmkin adamdardy tekserip jatyr, memlekettik ýákiletti organdarmen ózara tyǵyz jumys jasaýda, oblystyń sanıtarlyq-epıdemıologııalyq qyzmetimen birlesip sanıtarlyq-epıdemıologııalyq sharalarǵa kiristi.
Qazirgi ýaqytta AMО́Z qalypty rejımde jumys jasap tur, munaı ónimderin óndirý men jóneltý bekitilgen óndiristik josparǵa saı júzege asyrylýda. Ulttyq kompanııanyń basty qundylyǵy men basymdyǵy qyzmetkerleriniń ómiri men densaýlyǵy, sondaı-aq qolaıly ári qaýipsiz eńbek jaǵdaılaryn jasaý men úzdiksiz óndiristik prosesti qamtamasyz etý bolyp tabylatynyn atap kórsetemiz.
