Qoǵam • 02 Sáýir, 2020

«Birgemiz» qory muqtaj azamattarǵa qoldaý kórsetý úshin 7,6 mlrd teńge bóledi

62 retkórsetildi

Bul týraly Elbasy Nursultan Nazarbaevtyń bastamasymen koronavırýspen kúres jaǵdaıynda halyqtyń áleýmettik álsiz toptaryna qoldaý kórsetý úshin qurylǵan «Birgemiz» Qoǵamdyq qorynyń Qamqorshylyq keńesiniń otyrysy barysynda belgili boldy.

Qamqorshylyq keńestiń tóraǵasy, «Nur Otan» partııasy Tóraǵasynyń Birinshi orynbasary Baýyrjan Baıbek atap ótkendeı, bastapqyda qor qarajatyn 100 myń muqtaj azamatqa taratý josparlanǵan. Áıtse de, búginde óńirlerden túsken ótinishter sany aıtarlyqtaı ósken, al partııanyń onlaın resýrsyna kómek surap habarlasýshylar sany – eki esege artqan.

«Elbasy Nursultan Nazarbaevtyń tapsyrmasy boıynsha Qor qarajaty qarapaıym qazaqstandyqtarǵa ataýly kómek kórsetýge jumsalady. Bul beriletin kómektiń árbir janǵa derbes belgilenýin qamtamasyz etedi. Memleket basshysy Qasym-Jomart Toqaevtyń bastamasymen qolǵa alynǵan «Biz Birgemiz» aksııasynyń aıasynda Qor halyqtyń áleýmettik álsiz sanatyna kiretin muqtaj jandarǵa 50 myń teńgeden aýdarady. Birinshi kezeńde qarjylyq qoldaýdy 150 myńnan asa muqtaj azamat alady, ol 7,6 mlrd teńgeni quraıdy», - dedi Baýyrjan Baıbek.

Qor tóraǵasy Rýslan Sakeevtiń málimetinshe, materıaldyq kómek ekinshi deńgeıdegi bankter arqyly jeke tulǵalardyń kartochkalaryna nemese aǵymdaǵy esepshottaryna qolma-qol emes aqshalaı túrde aýdarý jolymen kórsetiledi. Qazirgi ýaqytta materıaldyq kómekti aýdarý kezinde odan komıssııa almaý máselesi qarastyrylýda. Sonymen birge bul qarajattyń kredıtteri boıynsha qaryzy bar azamattardyń bereshegin óteý úshin ustalyp qalmaýy da pysyqtalýda.

«Eshqaıda barýdyń, eshqandaı ótinish jazýdyń qajeti joq. Taıaý kúnderde atalǵan qarajat óńirlik qorlarǵa aýdarylyp, ári qaraı ol adamdardyń esepshottaryna túsetin bolady. Bul úshin biz aldyn ala búkil óńirlermen tıisti memorandýmdarǵa qol qoıǵanbyz. Eńbek jáne halyqty áleýmettik qorǵaý mınıstrliginiń usynymdarynyń negizinde kómek qarajatty alýshylardyń 7 sanaty bekitilgen. Ákimder atalǵan sanattar boıynsha kómek alýshylar tizimin usyndy. Olardyń qatarynda turmysy tómen kópbalaly otbasylar, muqtaj múgedekter, múgedek balany tárbıelep otyrǵan otbasylar, eń tómengi zeınetaqy alyp júrgen jáne halyqtyń áleýmettik álsiz tobyna jatatyn zeınetkerler, jetim balalar (tuldyr jetim balalar men asyraýshysynyń birinen aırylǵan balalar), Uly Otan soǵysyna qatysýshylar men solarǵa teńestirilgender, tyl eńbekkerleri bar. Bul rette atalǵan árbir sanatta muqtaj jandar da, sonymen birge kómekti qajet etpeıtinder de bar ekenin atap ótken jón. Sondyqtan biz tizimdi tikeleı jergilikti jaǵdaıdy jaqsy biletin ákimdikterden aldyq. Atalǵan kómek oblys ortalyqtary men koronavırýs taralý qaýpi joǵary iri qalalardyń turǵyndaryna kórsetiledi. Osy jáıtter eskerile otyryp, 23 qala anyqtaldy», - dedi Rýslan Sakeev.

Májilis barysynda Qordyń Qamqorshylyq keńesi Nur-Sultan jáne Almaty qalalarynyń indetke qarsy is-sharalarǵa tartylǵan 2 myńdaı medısına qyzmetkerine materıaldyq qoldaý kórsetý úshin 100 mln teńgeden astam qarajat bólý týraly usynysty qoldady. Taıaý ýaqytta qor basshylyǵy qos qalanyń ákimdikterimen birlesip qarajatty taratý tetikterin tujyrymdaıdy jáne 50 myń teńge kóleminde birjolǵy tólem alatyn medısına qyzmetkerleriniń tizimin ázirleıdi.

Jalpy búgingi kúni «Birgemiz» qoǵamdyq qorynyń esepshotyna 13,2 mlrd teńgeden astam qarajat tústi. Kúni keshe qor úkimettik operator «SK-Farmasııa» kompanııasymen 5 mıllıon maska satyp alý týraly shartqa qol qoıdy. Bul maskalar Nur-Sultan, Almaty jáne Shymkent qalalary turǵyndarynyń áleýmettik jaǵynan eń álsiz toptaryna taratylady. Jınaqtalǵan qarajat týraly aqparatty jáne óńirler boıynsha bólinetin kómekti baqylap otyrý úshin qor birgemiz2020.kz resmı saıtyn ashty.

Sońǵy jańalyqtar

Qazaqtyń kúmis kómeı ánshileri

Rýhanııat • Keshe

Búgin aıt namazy oqyla ma?

Rýhanııat • Keshe

Búgin - Oraza aıt merekesi

Rýhanııat • Keshe

Maıdan dalasynan tabylǵan báki

Aımaqtar • 23 Mamyr, 2020

Jezqazǵanda 13 adam koronavırýs juqtyrdy

Koronavırýs • 23 Mamyr, 2020

Karantınde tıgizgen kómek umytylmaıdy

Aımaqtar • 23 Mamyr, 2020

Uqsas jańalyqtar