Qazirge deıin belgili bolǵan derekterge júginsek, 42 500 teńge kólemindegi ótemaqy buıyratyndar úlesi 300 myńnan astam adam shamasynda eken. Onyń ishinde 3100 tulǵa juqpaly indetke qarsy kúres sharalarynyń kúsheıýine oraı jumystan qol úzýge májbúr bolǵandar qatarynda. Sondaı-aq, ózin ózi jumyspen qamtyǵandar 265 myń adam men 48 myń jumyssyz da ótemaqydan úmitti. Al Memleket basshysy Qasym-Jomart Toqaev óz úndeýinde «Tótenshe jaǵdaı kezinde tabysynan aıyrylǵandarǵa eń tómengi jalaqy mólsheri ıaǵnı, 42 500 teńge kóleminde aı saıynǵy tólem engizýdi tapsyramyn. Jalpy bul kómekti keminde 1,5 mıllıonnan astam azamat ala alady» degen bolatyn. Jalpy, 42 500 teńge ótemaqyny tóleý úshin 6 túrli sanat belgilengen. Jumysqa qoldaý kórsetý úshin Eńbek jáne halyqty áleýmettik qorǵaý mınıstrligi tarapynan áleýmettik tólemder alý erejesi ázirlendi. Bul jumys Almaty obylysynda da qolǵa alynǵan.
-Osy jerde atalǵan tólemniń eń aldymen mindetti áleýmettik saqtandyrý júıesine qatysýshylar úshin beriletinin atap aıtqym keledi. Bul máseleni naqtylaýmen oblys boıynsha qurylǵan 22 shtab aınalysyp jatyr. Derek boıynsha, shtabqa 142 jumys berýshiden jáne 201 qyzmetkerden ótinish túsken. Al shtabtyń qaraýynan ótken ótinishterge qatysty sheshim «Azamattarǵa arnalǵan úkimet» memlekettik korporasııasynyń bólimshelerine joldanady. Qazirge deıin 126 adam 42 500 teńge kólemindegi áleýmettik tólemdi aldy, - deıdi Almaty oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Zaıda Ilimjanova.
