Mańǵystaý oblysyndaǵy alpaýyt munaı óndirýshi kompanııalarda «qara altynnyń» qaldyǵy quıylǵan qoımalar bar. Olarda 2 mln. astam zııandy zat saqtalǵan. Bul týraly «Qazaqstan» telearnasy habarlady.
Munaı qaldyqtarynyń ozyq tehnologııamen óńdelmeýi sebepti olqylyqtar oryn alý ústinde. Bul jóninde Mańǵystaý oblysy boıynsha qorshaǵan ortany qorǵaý departamentiniń bastyǵy Ermek Omarov bylaı deıdi: «Munaı qaldyqtaryn peshte órtegende, aýaǵa iri kólemde ýly gaz bólinedi. Muny qaldyqtardy joıýdyń utymdy joly deı almaımyz. Zamanaýı qurylǵylardy alý úshin úlken ınvestısııa qajet ekenin bilemiz. Biraq, qorshaǵan ortany qorǵaý odan da qundy ekenin alpaýyt munaı kompanııa ókilderi túsingeni jón».
Taǵy bir derek, osy óńirdiń batys aımaǵynda 1960-1970 jyldary paıdalanylǵan munaı burǵysynyń sý astynda qalý qaýpi bar. Ázirge onyń qanshalyqty ekendigi naqtylanyp jatyr.
Danııar Túımebaı.
