jol apatynan qaza tapqandardyń sany ósip barady
Qazaqstan Respýblıkasynyń Ishki ister mınıstrligi «ótken apta ishinde (19-25 tamyz aralyǵynda) elimizde 547 jol-kólik oqıǵasy bolyp, 108 adam kóz jumdy, 719 adam túrli jaraqat aldy», dep habarlady.
jol apatynan qaza tapqandardyń sany ósip barady
Qazaqstan Respýblıkasynyń Ishki ister mınıstrligi «ótken apta ishinde (19-25 tamyz aralyǵynda) elimizde 547 jol-kólik oqıǵasy bolyp, 108 adam kóz jumdy, 719 adam túrli jaraqat aldy», dep habarlady.
Jambyl oblysynyń «Almaty-Tashkent» tas jolynda 10 adamnyń ómirin qıǵan iri jol apaty boldy. Eki «Aýdı» avtokóligi soqtyǵysyp, jolaýshylardyń barlyǵy kóz jumǵan. Taǵy bir jantúrshigerlik oqıǵa Qostanaı oblysynyń Amangeldi aýdanynda oryn aldy. «Arqalyq-Torǵaı» avtojolynyń 54-shi shaqyrymynda «Folksvagen» kóliginiń júrgizýshisi jol jıegine shyǵyp ketip, ishinde otyrǵan 7 adam qaza boldy. Apattan tek 13 jasar bala ǵana aman qalǵan kórinedi. Ol qazir túrli jaraqattarymen aýrýhanada jatyr. Dál osy kúni Batys Qazaqstan oblysy, Aqjaıyq aýdany «Chapaev-Jalpaqtal» avtojolynyń 22-shi shaqyrymynda ÝAZ jáne VAZ markaly avtokólikter soqtyǵysyp, nátıjesinde 6 adam qaza tapqan.
31 tamyz kúni saǵat 11.30-da «Almaty-Uzynaǵash» avtojolynyń 55-shaqyrymynda Fabrıchnyı kentiniń mańynda Almaty oblysynyń ákimi Ańsar Musahanov jol apatyna ushyrady. Ol kezde aımaq basshysy Konstıtýsııa kúnine oraı ulttyq at sporty túrlerinen Qazaqstan Prezıdenti kýbogy úshin dástúrli jarys ótken «Kók bastaý» ıppodromynan qaıtyp kele jatqan. Apat saldarynan oblys ákimi Ańsar Musahanov, onyń orynbasary Serik Muqanov, Jambyl aýdanynyń ákimi Mahabbat Bıgeldıev zardap shekti. Qazirgi tańda japa shekkenderdiń barlyǵy da №4 qalalyq aýrýhanaǵa jatqyzylǵan. Aldyn-ala málimetterge qaraǵanda, olarmen soqtyǵysqan «Toyota Camry» avtokóligi joldyń qarsy baǵytyna shyǵyp ketken kórinedi.
Shynynda da, elimizde kólik apaty jıileı tústi. Beıbit zamanda munshama adamnyń ajal qushýy alańdatpaı qoımaıtyn jaıt. Polıseıler muny «júrgizýshilerdiń jol erejesin saqtamaýynan» kórse, mamandar «sapasyz joldyń da áseri bar» deıdi.
«Júrgizýshilerdiń jol qozǵalysy erejesin eskermeýi, jyldamdyqty asyrýy, qarsy baǵytqa shyǵyp ketýi kóbine jol apattaryna negiz bolýda. Sondaı-aq júrgizýshilerdiń balalarǵa qaýipsizdik beldigin taqpaýy, arnaıy avtokresloǵa otyrǵyzbaýy da alańdatady», deıdi Ishki ister mınıstrligi jol polısııasy komıtetiniń baspasóz hatshysy Irına Lýkıanına.
Aıdar О́RISBAEV,
«Egemen Qazaqstan».
