Aqbota Májıtqyzymen telefon arqyly sóılesýdiń ózi ońaıǵa túspeı, ázer degende qysqa ǵana qaıyryp áńgimelestik. О́ıtkeni dárigerdiń ár ýaqyty qymbat. Joǵary oqý ornyn bitirgen 10 jyldyń ishinde dáriger-ınfeksıonıst retinde eńbek etip kele jatqan Aqbota qazir dárigerlerdiń ǵana emes, búkil otandastarynyń syn saǵatta otyrǵanyn aıqyn sezinedi. О́ıtpegende she, kún-tún qatyp jumysta júrgen joldasy, áskerı qyzmettegi maıor Nurbolat Qaımaqbaevty aıtpaǵanda, sonaý Qyzylordanyń Qarmaqshy aýdanyndaǵy enesi, zeınetker Altyn Syzdyqova bulardyń eń úlkeni 10, al eń kishisi 2 jastaǵy 3 balasyn baǵyp-qaǵyp, elge kómegin tıgizip otyr. «Ekeýmizdiń de jumysymyzǵa baılanysty balalardy aýylǵa aparyp tastadyq. Onda ınternet birde bar, birde joq, qosylǵan ýaqytynda apam balalardyń sýretin salady, daýysyn da estı almaı, saǵynyp júrmiz, áıteýir myna qıyndyqtan aman-esen shyǵyp, otbasymen qaýyshýdy armandaımyz», deıdi ol. Aıtýynsha, alǵashqy kezde shetelge shyǵyp kelgen otandastarymyz karantınge tússe, qazirgi ýaqytta shekara aspaı, elde júrip-aq vırýsty juqtyrǵandar bar. Sosyn aýrý belgileri bilinisimen dárigerge júginbesten, ýaqyt ozdyryp, apta aralatyp, 10 kún, tipti odan da asyryp kelip jatqandar da jeterlik. Kádimgi tumaýǵa uqsaıtyn bolǵandyqtan, syrqatynyń koronavırýs ekenin ajyratý qıyn. Naqty anyqtaý úshin eki túrli saraptama – biri, aýyz ben muryn qýysynan, ekinshisi, qanǵa PTR ádisimen zertteý jasalǵanda ǵana vırýstyń bar-joǵy belgili bolady. Sondyqtan kádýilgi tumaý tárizdi aýyra bastasa dereý dáriger shaqyrǵan jón.
– Biz osy aýrýhananyń ishinde, pasıentterimizben bir qabatta bolǵanymyzben, bólek blokta turamyz. Táýlik boıy osyndamyz, sondyqtan pasıent jaǵdaıyna qaraı árqashan qasynan tabylamyz. Aýrýlarǵa medısınalyq kómekpen qatar psıhologııalyq turǵyda da járdem kerek bolyp jatady, sol sebepti psıholog mamandar da jumys isteıdi. Áıteýir el bolyp jumylatyn ýaqyt bolyp tur, – dep jumysynyń ara-arasynda áriptesteriniń de suraqtaryna jaýap berip úlgerip jatqan dárigerge «sizdiń ýaqytyńyzdy almaıyn, el bilýi tıis nárselerdi ózińiz aıta berińiz» – dedik.
– Aýrý jas talǵap jatqan joq, kádimgi qylshyldap turǵan, qaıratty adamnyń ózi indet tyrnaǵyna ilinýde, sozylmaly dertteri, júrek-qan, ókpe, sýsamyr tárizdi burynnan ilesip júrgen aýrýlary bar adamdarǵa qattyraq tıedi. Sosyn ókpege zııany óte aýqymdy. Al vırýs juqtyrǵanymen pálendeı densaýlyǵyna salmaq salmaı jeńil túrde ótip jatqandar da bar. Birinshiden, jeke bastyń gıgıenasyn saqtaý, sabyndap, durys jýyný, sosyn aralas-quralastyqty meılinshe shekteý qajet. Tamaq alýǵa da úıden aptasyna bir ret shyqqan durys, – dedi dáriger.
Aqbota Májıtqyzynan «osy ýaqyt ishinde 120 medısına qyzmetkerine vırýs juǵypty, sizben birge eńbek etip jatqandar arasynan osy tárizdi oqıǵa kezdesti me?» dep suradyq, «Árıne biz pasıentke bararda aldymen obaǵa qarsy arnaıy jan-jaǵy tuıyqtalǵan qorǵanysh kıimin kıemiz. Odan keıin ekinshi qabat taǵy kıerimiz bar. Bas-aıaǵymyz tegis tumshalanyp, shash tegis oramal astyna jiberilip, onyń syrtynan taǵy jabyndymen oranyp, syrtynan kúláparany kıemiz. Aıaǵymyzda arnaıy obaǵa qarsy rezeńke etik, soǵan qaramastan juqqysh pále juǵyp qalyp jatyr. Shetelder de qanshama dáriger kóz jumdy. Bizde shúkir olaı emes, bolmaı-aq ta qoısyn, biraq «saqtansań – saqtaımyn» degendeı, bárimizge de saqtaný kerek. Halyqtyń ishinde osy indettiń qaýipti ekenine senbeı jatqandar bar degendi estigende kúıip kete jazdaımyz. Biraq qazir kópshilik te uǵynǵan tárizdi, alaıda el ishinde áli de kórshilerge baryp shaı iship, týystarmen qalaı aralaspaı otyramyz deıtinder bolýy múmkin, sondaı jandarǵa: «Ázirge, aralasýdan ýaqytsha tyıyla turyńyzdarshy, myna aýrýdy eńsereıik, sosyn-aq bir-birimizben qýana qaýyshyp, týystyǵymyzdy, kórshiligimizdi, aǵaıyn-baýyrlyǵymyzdy bekite túsemiz degim keledi. Aýrý taralmaý úshin úıde otyrý mańyzdy. Indetpen kúndelikti arpalysyp, otbasyn saǵynyp, janyn shúberekke túıgen dáriger retinde jurtshylyqqa osyny jetkizgim keledi», deıdi Aqbota Májıtqyzy.
Dárigerden surap bilgenimizdeı, aýrýdan aıyqqan jáne 14 kún karantınde bolǵan adamnyń PTR taldaýynda vırýs joǵy anyqtalǵan soń jergilikti emhana boıynsha úıdegi baqylaýǵa jiberiledi.
