Jańa aýrýhana 12 kúnde salynady

Qytaıda jańa tıpti koronavırýsty juqtyrǵan naý­qas­tar­dyń alǵashqy legi anyq­tala bas­taǵanda Ýhan qalasynda bir apta­nyń ishinde emdeý mekemesi saly­nady degen aqparatty bar­ly­ǵymyz oqyp bas shaıqaǵan edik. Árıne áleýeti álemdi mo­ıyn­­datqan Qytaı úshin bul jańa­lyq emes. Indettiń izin kesip, aýyr­ǵandardyń ahýalyn oılap, dene­sindegi dertti der kezinde qu­ryqtaý úshin endi elimizdiń úsh qalasynda da jedel túrde me­dı­sınalyq mekeme salynbaq. Mine, sársenbiniń sátinde bir top elordalyq tilshiler aýrýhana qurylysymen tanysyp qaıtty.

Tańmen talasa jetkende qu­ry­lys alańynda jumys qaýyrt eke­nin birden baıqadyq. Basshysy da, basqasy da bári osynda. Aýa raıynyń salqyndyǵyna qa­ra­maı, jumysqa qyzý kirisken qu­rylysshylar aýqymdy aýrý­ha­na­nyń tezirek bitkenin tilep, sy­r­qattanǵandardyń synaǵy je­ńildese deıdi. Úkimet medı­sı­­nalyq mekemelerdi qysqa mer­­zimde salyp, iske qosýdy BI Group holdıngine tapsyrǵan eken. Qazaqstannyń jyljymaı­tyn múlik naryǵynda jıyrma jyldan astam tájirıbesi bar kóshbasshy kompanııa úmit údesinen shyǵatynyna senim bar. Atalǵan holdıngtiń dırektorlar keńesiniń tóraǵasy Aıdyn Raqymbaev elordadaǵy emdeý mekemesiniń qurylysyn 12 kúnde bitirýdi jos­par­la­ǵan­da­ryn jetkizdi.

«Biz 5 sáýirde 200 tósek-oryn­dyq aýrýhananyń qurylysyn bas­tadyq, irgetasyna 2 myń tekshe metr beton quıdyq. Keshe jeli­lik baılanys, temirbeton blok­taryn montajdaý jáne basqa da jumystar bastaldy. Bizdiń kóptegen bólimshemiz ben merdigerlerden quralǵan 500 adam­nan turatyn komanda úsh aýysymda, ıaǵnı táýlik boıy jumys isteýde. Aýrýhana ýaqytsha emes, temirbeton bu­ıym­­darynan ornatylyp, sol­tús­tiktiń klıma­ty úshin shydamdy, kem degen­de 50 jyl boıy úz­diksiz jumys isteıdi dep aıta ala­myz. Atalǵan qurylysty
12 kúnde bitirýdi josparlap otyrmyz. Dárigerler men aýrýhana qyzmetkerlerinen qalyspaı, biz de kúni-túni jumystamyz. Alda synaq kóp bolǵanymen, alǵan betimizden qaıtpaımyz», deıdi A.Raqymbaev.

Sonymen qatar kompanııa ókil­deri bul qurylys jo­basynan holdıng bir tıyn paıda kór­meı­tinin aıtty.

Bul mańyzdy joba týra­ly sheshimdi Prezıdent janyn­daǵy Tótenshe jaǵdaı reji­min qamtamasyz etý jónindegi mem­le­­ket­tik komıssııa qabyldaǵan. Jańa nysandar dárigerlerdiń re­zer­vtik múmkindikterin keńeı­tip, naý­qas­tar­ǵa ýaqtyly kómek kórsetýge kepildik beredi. Basqa elderdegi jedel salynatyn aýrýhanalarǵa qaraǵanda, elimizdegi úsh mekeme uzaq jumys merzimine josparlanǵan. Atalǵan aýrýhanalar indetten keıin qarapaıym medısınalyq mekeme retinde jumysyn jalǵastyrady. Elorda­da­ǵy ınfeksııalyq aýrýhana 200 oryndy (reanımasııadaǵy 20 oryndy qosqanda) qamtıdy dep josparlanyp otyr. Alma­ty­­daǵy nysan 280 orynǵa esep­tel­­se, Shymkenttegi aýrýhana 200 naýqasty qabyldaı alatyn bolady. Emdeý mekemesiniń syıymdylyǵy qajet bolǵan jaǵdaıda eki eselenýi múmkin. Aýrýhanalarda karantın, qar­qyn­dy terapııa, reanımasııa aı­maq­tary qarastyrylǵan. Olar bıo­hımııalyq zerthanalarmen, rentgen kabınetterimen jáne kom­pıýterlik tomografııamen jab­dyqtalady. Oǵan qosa, aýrýhana palatalaryndaǵy qalypty qysymdy qamtamasyz etetin arnaıy jeldetý júıesiniń ornatylýy óte mańyzdy. Bul medısına qyzmetkerlerine tóndiretin qaýipti seıiltýge múmkindik bere­di.

Elordadaǵy nysannyń jer jumystary aldyn ala júrgizilip, qurylys 5 sáýirde bastalǵanyn aıttyq. Qazirgi ýaqytta ın­jener­lik jelilerdi montajdaý jumystary aıaqtalyp, ne­mis tehnologııasy boıynsha MODEX zaýytynda jasalǵan mo­dýl­dik temirbeton bloktar or­natylýda. Elimizdiń basqa qala­larynda da daıyndyq qyzý júrgizilýde. Almaty qalasynda qurylys búgin bastalady. Al Shymkentte joba parametrlerin túzetý jumystary jasalýda. Kompanııa qyzmetkerleriniń sózine súıensek, ákimdikter men memlekettik organdar qurylysqa arnalǵan qujattamany da­ıyn­dap, óz kezeginde joba úshin qa­jetti qoldaýdy kórsetýde. So­nymen qatar karantın jaǵ­daı­ynda qurylysshylardy, tehnıkany jáne qajetti júk­ter­di jetkizý men olardyń esh ke­dergisiz jumys isteýi úshin to­lyq medısınalyq baqylaý júr­gi­zilip, «jasyl dálizdermen» qam­tamasyz etilgen.