Sýret «Egemen Qazaqstannyń» arhıvinen alyndy
Búginde aımaqta tótenshe jaǵdaı talabyna saı indettiń aldyn alý men saldaryn joıýǵa qatysty keshendi jumys júzege asyp jatyr. Mysaly, koronavırýspen kúresýge jumylǵan jetisýlyq dárigerler eńbegin baǵalaýdyń jańa sharasy jasaldy. Bul baǵyttaǵy jumystar koronavırýs ınfeksııasymen kúreske tartylǵan medısına mamandarymen qosa, quqyq qorǵaý salasynyń qyzmetkerlerine syıaqy berý máselesin de qarastyrady. Osy maqsatta jumsalatyn qarjy kózin esepteý Almaty oblysynda da júrgizilýde. О́ńirdegi dárigerler men tártip saqshylaryn qarjylaı qoldaý úshin oblystyq bıýdjetten 137 mln teńge bólinedi.
– Qazirgi tańda koronavırýs juqtyrǵandardyń qasynda kúni-túni medısına qyzmetkerleri júr. Olar óz ómirlerine qaýip tónse de, antynan attamaı, syrqattardy saýyqtyrý úshin barlyq qajyr-qaırattaryn jumsaýda. Halyq ta aqjarma alǵysyn jetkizip, dárigerlerge qoldaý kórsetýde. Bul da birlik pen berekeniń bir kórinisi dep bilemin. Elbasy da óz maqalasynda kez kelgen tyǵyryqtan shyǵýdyń joly tatýlyqta jatqandyǵyn, táýelsiz tarıhymyzdyń ár tarmaǵyna zer salsaq uıymshyldyqtyń arqasynda talaı belesterdi baǵyndyrǵanymyzdy kórsetti. Al búgingi tótenshe jaǵdaıda tatýlyq tarazysynyń teńselmeýi eń aldymen halyqtyń sabyrlyǵy men tózimdiligine baılanysty bolmaq, – deıdi Alakól aýdandyq ortalyq aýrýhanasynyń dırektory Ashat Butabaev.
Sondaı-aq óńirde kóktemgi dala jumystary qyzý júrip jatyr. Bul erteńgi kúnniń qamyn kúıttegen sharýalardyń eren eńbeginiń bir kórinisi. Iаǵnı, Jetisý eńbekkerleri daǵdarysty eńserýge naqty ispen jaýap qatyp otyr. Árıne memlekettiń qoldaýymen. Oblysta sharýashylyqtardy qoldaý maqsatynda 2011 jyldan beri jalpy sany 45 servıstik-daıyndaý ortalyǵy qurylǵan. Ortalyqta jyl saıyn 850-900 shaǵyn jáne orta sanattaǵy sharýa qojalyqtaryna qyzmet kórsetip, aýdandardaǵy 2800 gektar egis alqabyn óńdeýge úles qosyp otyr eken.
– «Birlik bar jerde, tirlik bar» degendeı, biz biriksek baǵyndyrmaıtyn beles pen alynbaıtyn qamal joq. Elbasy eli men jurtynyń búgini men keleshegin oılaıtyn janashyr azamat ekeni bárimizge belgili. Aýyl sharýashylyǵyn qoldap, kásipkerlerge barlyq jaǵynan jaǵdaı jasady. Biz de Elbasy úndeýine ún qosyp, elimizge qoldan kelgenshe kómek qolyn sozýdamyz. «Biz birgemiz!», – deıdi Aqsý aýdanyndaǵy «Darına» sharýa qojalyǵynyń ıesi Baýyrjan Baımuhanov.
Jetisýlyqtardyń aýyz birligin kórsetetin bir mysaldy «Biz birgemiz!» aksııasy aıasynda jasalǵan qaıyrymdylyq isterinen aıtýǵa bolady. Ásirese jastardan quralǵan volonterler toby tótenshe jaǵdaıda jumys isteýge kóshken bolatyn. Qazir oblystaǵy 17 aýdan men 3 qalada qaıyrymdylyq sharalary toqtaýsyz júrip jatyr. Jastar búginge deıin myńnan astam arnaıy aksııa uıymdastyryp úlgergen. «Biz birgemiz!» aksııasy bastaý alǵaly aımaqtaǵy myńdaǵan muqtaj janǵa tegin kómek kórsetildi. Izgi iske alǵashqy bolyp qoldaý bildirgender qatarynda óńir kásipkerleriniń úlken shoǵyry tur. Qazir de olar az qamtylǵan otbasylardy azyq-túlik taýarlarymen tegin qamtamasyz etýde.
– Bizdiń tarıhymyzda qasiretti sátter men qaıǵyly oqıǵalar, surapyl soǵystar men qaqtyǵystar, áleýmettik turǵydan qaýipti synaqtar men saıası qýǵyn-súrginder az bolmady. Muny umytýǵa haqymyz joq. Bizdiń qaısar halyq ne bir zulmat zamandy bastan ótkergende synbady, kerisinshe birligi bekemdeldi, irgesi nyǵaıdy, aýyrlyqty birge kóterdi. «Tar jol taıǵaq keshýde» aıaǵynan tabandap tik turǵan el bolsa, ol biz edik. О́tkenin maqtan tutyp, búginin naqty baǵalaı bilý jáne bolashaqqa oń kózqaras tanytý – elimizdiń tabysty bolýynyń kepili. Álemdik órkenıettiń úzdik jetistikterin, basqa halyqtardyń rýhanı qazynalaryn boıymyzǵa sińirý qansha mańyzdy bolsa, bizdiń árqaısymyz ózimizdiń tereń tamyrymyz – týǵan jerimiz týraly este ustap, qaı eldiń azamattary ekenimizge esep berýimiz qajet. Bul oraıda bizge úlken jumystar júkteledi. Ony abyroımen atqarý bizdiń basty mindetimiz, – deıdi Almaty oblysy ákimi apparatynyń Ádep jónindegi ýákili Ǵalıasqar Sarybaev.
Almaty oblysy
