Parlament • 09 Sáýir, 2020

Darıǵa Nazarbaeva: Elimizdiń eshbir azamaty qamqorlyqsyz qalmaıdy

508 retkórsetildi

Senat Tóraǵasy Elbasynyń koronavırýs pandemııasyna baılanysty búkil álemde oryn alǵan ahýalǵa syndarly taldaý jasaǵan, azamattardyń densaýlyǵyn saqtaý, osyndaı kúrdeli jaǵdaıda halyqty jáne el ekonomıkasyn qoldaý jónindegi memleket tarapynan qolǵa alynǵan sharalarǵa joǵary baǵa berilgen maqalasy jarııalanǵanyn atap ótti. Bul týraly Parlament Senatynyń baspasóz qyzmeti habarlady.

«Tuńǵysh Prezıdent atap ótkendeı, jaǵdaıdy turaqtandyrý jolynda kóp jumys jasaldy, bul baǵytta júıeli jumystar jalǵasyn tabýda. Eń bastysy – osyndaı syn saǵatta birde-bir adam, elimizdiń eshbir azamaty qamqorlyqsyz qalmaıtynyn túsinýimiz kerek. Ol úshin bizdiń memleketimizde qajetti resýrstardyń bári bar», - dep atap ótti D.Nazarbaeva.

Senat basshysy ulaǵatty jáne oń isterdiń osyndaı qıyn-qystaý, daǵdarys kezeńinde aıshyqtala túsetinin atap ótti. Búgin Elbasynyń Ulttyq qordy qurý, ekonomıkamyzdy ártaraptandyrý, aýyl sharýashylyǵy men ınfraqurylymdy damytý jónindegi kóregen saıasaty óz jemisin berip otyrǵanyna kýá bolýdamyz. Elbasynyń asa kóregendikpen qabyldaǵan sheshimderi búgingi tańda daǵdarysty eńserýge múmkindik berip otyrǵan elimizdiń qaýipsizdik qorǵanyshyn, memlekettik, ekonomıkalyq jáne áleýmettik júıemizdiń negizgi turaqtylyǵyn qurdy. «Bizdiń memleketimiz, halqymyz bul daǵdarysty da abyroımen eńserip, odan ári shyńdala túsetinine kámil senemin», - dedi D.Nazarbaeva.

Joǵary Palata basshysy Elbasynyń memleket basshylyǵy tarapynan qabyldanyp jatqan daǵdarysqa qarsy sharalarǵa tolyq qoldaý bildirgenin jáne barsha halyqty Prezıdent Qasym-Jomart Toqaevty jáne Úkimetti qoldaýǵa shaqyrǵanyn atap ótti. «Elbasynyń keshegi úndeýi Ult lıderiniń kóregendigin jáne óz eliniń naǵyz kóshbasshysy ekenin aıqyn kórsetip, bizdiń daǵdarysty eńserý jolyndaǵy is-qımylymyzǵa tyń serpin beredi dep barlyq senatorlardyń atynan aıta alamyn», - dedi ol.

D.Nazarbaevanyń aıtýynsha, eń bastysy búgingi kúni mańyzdy sharalardyń jergilikti jerlerde tıimdi ári naqty oryndalýyn qamtamasyz etý. «О́kinishke oraı, kóbinese tapsyrmalardyń jergilikti jerlerde oryndalýy kóp suraqtardy týyndatyp jatatynyn bárimiz bilemiz, kórip júrmiz. Ásirese, artyq bıýrokratııalyq formalızmge, ákimshilik qulshynysqa nemese jónsizdikke jol berilip jatady. Munyń bárine tıisti baǵa beriletinine senimdimin», - dedi ol.

D.Nazarbaeva sıfrlandyrýǵa jeke toqtalyp, tekseris nátıjesinde memlekettik aqparattyq resýrstardyń jáne elektrondyq qyzmetterdiń jumys isteýinde birqatar problemalardyń bar ekeni belgili bolǵanyn atap ótti. Sondaı-aq, «Sıfrlyq Qazaqstan» memlekettik baǵdarlamasy daǵdarys kezinde beti ashylǵan problemalardy eskere otyryp, dereý qaıta qaraýdy talap etetinin basyp aıtty.

«Depýtattar elimizdiń basqarý júıesi men ekonomıkany sıfrlandyrýda jedel jumystar júrgizýge bıýrokratııanyń múddeli emes ekendigi jaıly, statıstıkany bir retke keltirý týraly birneshe márte aıtqan bolatyn», - atap ótti ol.

Darıǵa Nazarbaeva senatorlardyń jáne óziniń atynan árdaıym, qıyn sátterde yntymaqtasyp, birlik kórsetip otyrǵan Qazaqstan halqyna, túsinistik pen sabyrlyq tanytqan elimizdiń árbir azamatyna zor alǵysynyn bildirdi. Sondaı-aq, D.Nazarbaeva jaqyn týystarynan aırylǵan otbasylarǵa kóńil aıtyp, syrqattanyp jatqan azamattarǵa tez arada aıyǵyp ketýine tilektestigin bildirdi.

Senat basshysy qazirgi qaýyrt rejımde qyzmetterin jalǵastyryp jatqan azamattardyń: medısınalyq, quqyq qorǵaý organdarynyń qyzmetkerleri, áskerıler men volonterlardyń mańyzyn atap ótti. «Bul qyzmetkerlerge qazir ońaı tıip jatqan joq, óıtkeni olar indettiń meńdeýin toqtatýǵa kúsh salyp, aýrýhanalar men ınfeksııalyq bólimshelerde naýqastardy emdep, adam ómirin saqtap, kóshelerde, blokposttarda qoǵamdyq tártip pen qaýipsizdikti qamtamasyz etip, kúndelikti erlik jasap jatyr. Bul kúreste alǵy shepte júrgen azamattarǵa aıtylǵan alǵysyma Qazaqstannyń árbir azamaty qosylatynyna senimdimin. Osyndaı qıyn kezeńde sizderdiń erlikterińizdi barshamyz úlgi tutamyz. Sizder – júrekke senim uıalatyp, jaqsylyqqa degen úmittiń bastaýy ekenderińiz aıqyn», - dedi D.Nazarbaeva.

Senat Tóraǵasy óńirlerde áleýmettik-ekonomıkalyq turaqtylyqty saqtaý jolynda aıanbaı eńbek etip júrgen, jumys oryndaryn jáne eńbekkerlerdiń jalaqylaryn saqtaý sharalaryn uıymdastyrýǵa, kópbalaly otbasylar men múgedekterdi jáne ózge de az qamtylǵan otbasylardy tegin azyq-túlikpen jáne sanıtarııalyq-gıgıenalyq quraldarmen qamtamasyz etýge qomaqty úles qosyp kele jatqan máslıhattar depýtattaryna jeke alǵysyn bildirdi.

D.Nazarbaeva budan basqa qıyn kezeńde muqtaj jandarǵa qaıyrymdylyq jasap, qarjylaı qoldaý kórsetip otyrǵan kásipkerlerge de alǵys aıtty.

Darıǵa Nazarbaeva sózin qorytyndylaı kelip, halqymyz ózine tán danalyǵy men tózimdiliginiń arqasynda bul synaqtan da aman-esen ótetinine senim bildirdi. «Elbasy aıtqandaı, «Birlese bilgen el bárin jeńedi» - dedi ol.

Sońǵy jańalyqtar

Eldik nyshandar tarıhy

Qazaqstan • Keshe

Uqsas jańalyqtar