Jobany júzege asyrý úshin Asia Steel Pipe Corporation Qazaqstan-Qytaı birlesken kásiporny quryldy. Investısııanyń jalpy somasy 33 mlrd teńgeden asady. Atalǵan joba 2015-2019 jyldarǵa arnalǵan respýblıkalyq ındýstrııalandyrý kartasyna engizilgen. Sondaı-aq «Bir beldeý, bir jol» baǵdarlamasy aıasynda Qytaı men Qazaqstan arasyndaǵy negizgi jobalar tizimine kiredi.
Aıta ketý kerek, qubyr zaýyty ornalasatyn jer retinde Almaty qalasy logıstıka jáne bolat oramynyń negizgi jetkizýshisi – Batys Qytaıdaǵy metallýrgııalyq zaýyttarǵa jaqyn bolý úshin tańdap alynǵan.
Otandyq zaýyt jyl saıyn 100 myń tonnaǵa deıin joǵary sapaly qubyr ónimderin shyǵarady dep josparlanýda. Aldaǵy ýaqytta óndiristi 150 myń tonnaǵa deıin keńeıtý kózdelip otyr. Birinshi jeli spıraldy qubyrlar shyǵarady. Keıin úlken dıametrli tik jikti qubyrlar jelisin iske qosý kózdelgen.
Zaýytta dıametri 355 mm-den 1420 mm-ge deıin, uzyndyǵy 8 m-den 12,5 m-ge deıin qubyr ónimderin shyǵarý kózdelgen. Qubyrlardy óndirý kezinde beriktigi joǵary X80, H100 sanatyndaǵy bolat qoldanylady. Al qubyr qabyrǵalarynyń qalyńdyǵy 6,4 mm-den 25,4 mm-ge deıin bolady. Bul dánekerlenetin qubyrlar munaıdy, gazdy, sýdy jáne munaı ónimderin tasymaldaýǵa, sondaı-aq taý-ken, qurylys, hımııalyq ónerkásip, energetıka salalarynda paıdalanýǵa arnalǵan. Osylaısha jańa zaýyt ishki naryq pen taıaý shet elderdi sapaly qubyr ónimderimen qamtamasyz etýge múmkindik beredi. Sonymen qatar kásiporynda 300-den astam turaqty jumys orny qurylady.
Dánekerlengen bolat qubyrlaryn shyǵaratyn zaýyt jobasyn júzege asyrý Tuńǵysh Prezıdent – Elbasy Nursultan Nazarbaev pen QHR Tóraǵasy Sı Szınpınniń 2014 jylǵy kezdesýiniń qorytyndysy boıynsha iske asyryldy. Sol kezdesýde «QazMunaıGaz» UK» AQ men CNPC arasynda munaı-gaz salasyndaǵy keshendi strategııalyq yntymaqtastyq baǵdarlamasyna qol qoıylǵan-dy.
