Senatorlar Obamany qoldady
AQSh senatynyń syrtqy ister jónindegi komıtetiniń músheleri Sırııadaǵy ahýalǵa baılanysty kelisim qalyptastyrdy. Qarar jobasyna sáıkes áskerı operasııalarǵa taǵy da 30 kúnge uzartý múmkindigimen 60 kún beriletin boldy.
Senatorlar Obamany qoldady
AQSh senatynyń syrtqy ister jónindegi komıtetiniń músheleri Sırııadaǵy ahýalǵa baılanysty kelisim qalyptastyrdy. Qarar jobasyna sáıkes áskerı operasııalarǵa taǵy da 30 kúnge uzartý múmkindigimen 60 kún beriletin boldy.
Sonymen birge, amerıkalyq áskerılerdiń jerústi operasııalaryna qatysýyna tyıym da engiziledi. Prezıdent ákimshiligi senatorlarǵa Vashıngtonnyń Sırııadaǵy oppozısııalyq toptarǵa ustamdy kómek kórsetkeni jóninde egjeı-tegjeıli esep berýi tıis. Deı turǵanmen, senatorlar Aq úıdiń baǵytyna basym daýyspen qoldaý kórsetti. Olardyń pikirinshe, Barak Obama Bashar Asad rejiminiń hımııalyq qarý qoldanýyna baılanysty kúsh qoldaný sharasyn qabyldaýy kerek.
Sırııalyq bosqyndar kómekke zárý
Sırııanyń kórshileri – Lıvan, Iordanııa, Túrkııa jáne Irak sırııalyq bosqyndar problemalaryn sheshýdi talqylaý úshin Jenevada kezdespek.
Saıasatkerler aýqatty memleketter 2 mıllıonnan astam sırııalyqtardyń elden qashýyna baılanysty týyndaǵan daǵdarysty sheshýge belsendi atsalysady dep esepteıdi. Osy ýaqytqa deıin Sırııanyń kórshileri bosqyndarǵa úlken kómek kórsetip keldi. Máselen, halqy 4 mıllıonnan sál ǵana asatyn Lıvan 750 myń bosqyndy qabyldasa, Iordanııa men Túrkııanyń árqaısysy jarty mıllıonnan bosqyndar qabyldaǵan. Degenmen, bul elderdiń bir de birinde sırııalyqtarǵa jaǵdaı týǵyzatyndaı jetkilikti aqsha da, ınfraqurylym da joq.
Armenııa Keden odaǵyna ótpek
Armenııa Respýblıkasy Keden odaǵyna kirý týraly sheshim qabyldady. El bıligi osy baǵytta naqty sharalarǵa baryp, odan ári Eýrazııalyq ekonomıkalyq odaqty qalyptastyrýǵa atsalyspaq nıette.
Bul týraly Máskeý túbindegi Novo-Ogarevo rezıdensııasynda Reseı prezıdenti Vladımır Pýtınmen kezdesý kezinde Armenııa prezıdenti Serj Sargsıan málimdedi. Kremldiń baspasóz qyzmetiniń habarlaýynsha, Pýtın mundaı sheshimge qoldaý kórsetip, óziniń osy proseske jan-jaqty yqpal etýge daıyn ekenin bildirgen. Keden odaǵyn keńeıtý máselesiniń Kremldiń kún tártibinde aıryqsha mańyzǵa ıe ekenin aıta ketý qajet. Búginde bul odaqqa Reseı, Belarýs jáne Qazaqstan múshe. Keleshekte Qyrǵyzstan men Tájikstan oǵan múshe bolýǵa nıet bildirip otyr.
Kól-kósir baılyqqa keneldi
Altyn izdeýshiler Florıda shtatynyń jaǵalaýynda ıspandardyń qazynasyn taýyp alǵan. Tabylǵan dúnıeler 300 myń dollar dep baǵalanýda.
65 jastaǵy Rık Shmıtt óziniń búkil ǵumyryn qazyna izdeýge arnapty. Aqyry onyń oılaǵan isiniń sáti ońynan týǵan. Kómbe izdeýshiler teńizde úıilip jatqan altyn kúmister men áshekeılerdiń dál ústinen túsipti. Sóıtse, qyrýar baılyq tabylǵan Florıdanyń osy jaǵalaýynda shamamen budan 300 jyldaı ýaqyt buryn altyn tıelgen 11 ıspandyq galeon sýǵa batyp ketken eken. Shmıtter otbasy buǵan deıin de birneshe ret kópshilik kózinen jasyryn jatqan baılyqtardy tapqan kórinedi.
Japondar Olımpıada ótkizýge daıyn
Bizdiń úkimet atom elektr stansasynda týyndaǵan problemalardy sheshý úshin qajetti sharalardyń bárin jasaıtyn bolady. Men bul týraly Halyqaralyq olımpıadalyq komıtetke ózim tikeleı túsindirmek nıettemin, dep atap kórsetken Japonııa premer-mınıstri Sındzo Abe.
Tamyz aıynyń ortasynda «Fýkýsıma-1» stansasynda 2011 jyldyń naýryzynda AES-te apat bolǵan kezeńnen bergi ýaqyttaǵy eń kóp radıoaktıvti sýdyń aǵyp ketýi oryn alǵan edi. Onda jer ústindegi bolat ydystan 300 tonnadaı qatty lastanǵan sý aǵyp ketken. Aıta ketý kerek, 2020 jylǵy Olımpıada astanasy 7 qyrkúıekte atalatyn bolady. Japon astanasymen básekege túskender qatarynda Ystambul men Madrıd bar.
Balalar uıymdastyrǵan úılený toıy
Egıpette on bir jasar kúıeý bala men toǵyz jasar qalyndyq úılený toıyn ótkizgen. Osy toıdan túsirilgen beınekórinis ınternetke salynǵan kórinedi.
Negizgi daý da soǵan baılanysty týyndap otyr. Egıpet zańdary boıynsha 18 jastan keıin ǵana nekege turýǵa bolady. Biraq mundaı shekteý jasóspi rim ǵashyqtardyń ata-analaryna toqtaý sala almasa kerek. Neke qııý rásimi barlyq qaǵıdalar boıynsha ótken. Kúıeý bala – smokıng, al qalyndyq toı kóılegin kıgen. Osy oraıda Pákstandaǵy osyndaı úılený toıy sońynyń 5 jasar qyz ben 7 jasar ul balanyń ata-analarynyń tutqynǵa alynýymen aıaqtalǵanyn da aıta ketý qajet.
Berezovskııdiń anasy qaıtys boldy
Fransııada 88-ge qaraǵan shaǵynda bıyl marqum bolǵan reseılik olıgarh B.Berezovskııdiń anasy Anna Gelman qaıtys boldy.
Anna Gelman tomskilik qurylysshy-ınjener Abram Markovıch Berezovskııge turmysqa shyqqan bolatyn. Kezinde ol KSRO Medısına ǵylymdary akademııasynyń Pedıatrııa ınstıtýtynda aǵa laborant bolyp jumys istegen. Keıin turaqty turý úshin Fransııaǵa qonys aýdarady. Anna Gelman mamyr aıynda 67 jastaǵy uly B.Berezovskııdi jerlegennen keıin jalǵyz qalǵan bolatyn. Jasy ulǵaıǵan áıeldiń qaıtys bolý sebepteri týraly eshqandaı málimet joq.
Áıel urlaýshy qylmysker asylyp qaldy
Úsh áıeldi urlap áketip, on jyl boıy qamaýda ustaǵany úshin ómirlik bas bostandyǵynan aıyrylǵan jáne taǵy da qosymsha 1000 jyl túrmede otyrýǵa kesilgen Arıel Kastro óz kamerasynda óli kúıinde tabyldy.
Kastronyń Ogaıo shtatyndaǵy Orıent túrmesinde asylyp qalǵany týraly túrme ókilderi málimdegen. 53 jastaǵy Arıel Kastro ol eriksiz qamaýda ustaǵan áıelderdiń birine qashyp shyǵýdyń múmkindigi týǵannan keıin ústimizdegi jyldyń mamyr aıynda tutqynǵa alynǵan bolatyn. Ol 2002-2004 jyldary urlanǵan úsh áıeldi óz úıinde ustap, olarǵa zorlyq kórsetip kelgen. Qamaýda otyrǵan áıelderdiń biri birneshe ret júkti bolyp, onyń sońy túsik tastaýǵa aparyp soqtyrǵan kórinedi.
Internet materıaldary negizinde ázirlendi.
