«Birinshiden, atalǵan ózgeris Nur-Sultan men Almaty qalalarynda bir ýaqytta engizilgenmen, eki qaladaǵy jumys prosesinde aıyrmashylyq bolýy múmkin. Onyń sebebi osy qalalardyń epıdemıologııalyq jaǵdaıynyń jáne ekonomıkasynyń aıyrmashylyǵyna baılanysty. Sondyqtan barlyq nıýanstardy ákimdikter turǵyndarǵa aldyn ala habarlap, túsindirip otyrady. Ekinshiden, karantın talaptarynyń ózgerisi birden emes, kezeń-kezeńmen júzege asyrylady. Ár kezeńde Densaýlyq saqtaý mınıstrliginiń qorytyndysy esepke alynady» degen mınıstr qazir tek birinshi kezeń týraly aıtylyp otyrǵanyn túsindirdi.
Onyń aıtýynsha, bul kezeńde aýrý juqtyrý qaýpi eń az degen kásiporyndar ǵana iske qosylady. Mundaı kásiporyndarǵa sanıtarlyq normalardy saqtaý boıynsha arnaıy hattamalar daıyndalyp, onyń oryndalýy turaqty túrde tekseriledi. Eger kásiporyn talaptardy buzsa qatań shekteý sharalary qoldanylady.
Keshe Nur-Sultan qalasynyń ákimi 20 sáýirden bastap jumysyn jalǵastyratyn kásiporyndardyń tizimin usynǵan. Atap aıtqanda, olar: ónerkásiptik jáne ındýstrııalyq kásiporyndar, qurylys salasyndaǵy kásiporyndar, qystan keıin joldardy jóndeıtin asfalt-beton zaýyttary, zeınetaqy men járdemaqy berý úshin ekinshi deńgeıdegi bankter. Dáýren Abaev olardyń saǵat 16:00-ge deıin qysqa jumys kestesimen jumys isteıtinin atap ótti.
Sondaı-aq bul tizimge jeke qosalqy qyzmet kórsetý sektorynyń keıbir uıymdary da kiredi. Iаǵnı hımııalyq tazalaý jáne kir jýý oryndary, shınomontaj, arnaıy tehnıkalardy jóndeý jáne kólik jýý stansalary. Buǵan qosa qoǵamdyq tamaqtaný ornynan tamaq jetkizý múmkindigin keshki saǵat 10-ǵa deıin uzartý usynylǵan. Osylaısha atalǵan kásiporyndar boıynsha 90-100 myńǵa jýyq adam jumysyn jalǵastyrady. Bul elordada jumys isteıtin halyqtyń shamamen 20%-y.
Mınıstr Almaty qalasynda sáýirdiń úshinshi dekadasynda (sońǵy on kúninde) ónerkásiptiń barlyq salalary – qoımalaý, qurylys, ekinshi deńgeıdegi bank qyzmetkerleriniń 50%-ǵa deıin, qyzmet kórsetý salasynyń keıbir sektorlary tolyq jumys kúni rejimine kóshetinin habarlady. Nátıjesinde bul qalada 128 myń adam jumysyn jalǵastyrady.
