Sulýdan suhbat alsam ba..?
Taıaýda Birikken Arab Ámirliginen elimizdiń 135 azamaty arnaıy ushaqpen Almaty oblysyndaǵy Tekeli shıpajaıyna jetkizildi. Bul otandastarymyzdyń basym bóligi «alma moıyn, arshyn tós» dep aýyzdyń sýy quryp aıtar arýlar bolyp shyqty.
Bulardyń munaı men meımanhana bıznesinen basqa aınaldyrar «ermegi»joq ertegiler elinde ne istep júrgenin bir qudaıym bilsin... Bastysy, shekteýler shekaralardy jaýyp tastaǵan qıyn-qystaý sátte bizdiń el óziniń azamattaryn dalaǵa tastamady.
Árıne, «munaıshy», álde «daıashy» qyzdardy jerden alyp, jerge salyp jatqandar da bar. Koronavırýstiń kesirinen urynarǵa qara tappaı otyrǵan olarǵa túsinistikpen qaraýǵa bolatyn shyǵar... Kim biledi, aralarynda 42500 teńge áleýmettik tólemdi alyp úlgermeı, ashý ústinde aıtyp qalǵandary da bar bolýy múmkin...
Álgi arýlardyń ishinde qaraǵandylyq bir qyz bar eken. Betperdemdi taǵyp alyp, sol bıkeshti izdep taýyp, eksklıýzıvti suhbat alsam ba deımin...
Qý kelinshekterdi qýyp júrip sabasa...
Aýylda úıiniń bir búıirin tesip, shap-shaǵyn dúken jasap alǵan dosym bar. Taýardy buryn aýdan ortalyǵy bolǵan iri temirjol stansasynan tasıdy.
О́zi qyryqqa kelse de, óńin bermegen qyrmasaqal. Bylaısha aıtqanda, bet terisi kelisken jigit. Sodan da bolar, ony kórgen boıda boıdaq kelinshekterdiń kózi kúlimdep, kóktemdeı qulpyryp shyǵa keletini bar...
Jıi habarlasyp turamyz. Keıingi kezde áńgimemiz kóbine koronavırýstyń tóńireginde órbıtin bolǵan.
Kúni keshe meniń saýdagerim taýar alyp júrgen kentten «jaman tumaý» juqtyrǵan bir er adam tabyldy. Dereý ini dosqa habarlastym.
Baıqaımyn, daýysynda abyrjý joq, sap-sabyrly. «Men, – deıdi sol baısaldy qalpy, – eshkimge senbeımin. Poıyzǵa mingen bette maskamdy taǵam, rezeńke qolǵapty kıem, bitti. Taýar alatyn jerge kelgenimde, qý kelinshekter: «Ne boldy sonsha tumashalanyp? Janyń qandaı tátti edi!», dep qaǵytady. Sonda men olarǵa: «Karantındi túsinbeıtin senderdi qýyp júrip sabasa, qoı demes em!», deımin».
Qalaı dese de, dosymnyń sóziniń jany bar...
«Kári» sarbazdardy kóre almaı júrmiz
Keshe Qaraǵandy oblysynyń ákimi arnaıy daıyndyqqa shaqyrylǵan eriktilermen, ıaǵnı «kári» sarbazdarmen kezdesipti. Sýretke qarap tursam, bir sarbaz qolyn shekesine taıap, óńir basshysyna «chest» berip, birdeńeni baıandap jatyr eken. Bizdiń ákim áskerde bolmaǵan-aý deımin, symdaı tartylǵan sarbaz aldynda áskerı «sálem» berip turǵanda, eki qolyn tómen túsirmeı, pápki ustaǵan kúıi qatqan da qalǵan...
Aıtaıyn degenim, álgi sarbazdarymyz qolyna qarý alyp, bizdi qorǵaı ma desek, oblys ákiminiń sózimen aıtsaq: «kórinbeıtin jaýdyń taralýyna qarsy kúresedi» eken. Iаǵnı, olar bir aı ishinde mańyzdy nysandardy sanıtarlyq tazartýmen jáne sanıtarlyq baqylaý pýnktterinde kezekshilikpen aınalysatyn kórinedi. Ol ol ma, olar úsh mezgil tamaqpen qamtamasyz etiledi eken. Barlyǵyna eńbekaqy tólenedi, sonymen qatar zańmen belgilengen jeńildikterge jáne áleýmettik kepildikterge de ıe bolatyn kórinedi.
Eń bastysy, olar biz sııaqty úıde qamalmaı, dalada, kóshede kóktemniń saraıdy ashqan saf aýasymen tynystap, aqsha alatyn paıdaly ispen aınalysady. Joly bolǵysh jigitter, árıne. Men, taǵy keıbir jigitter bar, olarǵa jaqsy maǵynasyndaǵy qyzǵanyshpen qarap, kóre almaı júrgenimiz ras, endi.
Átteń, jasymyz asyp ketti. Áıtpegende bar ǵoı...
