Oqıǵa Mańǵystaý oblysyndaǵy Qaraqııa aýdanyna qarasty Jetibaı kenti mańynda oryn aldy. Aýyl turǵyny Dáýlet Túıeshıev jumys babymen kentten onshaqty shaqyrym qashyqtyqtaǵy qatty qaldyqtar tógetin oryndy qadaǵalaýǵa keledi.
Buryn quqyq qorǵaý ornynda qyzmet etken Dáýlet keıinen aýyldaǵy «Turmysservıs» kommýnaldyq memlekettik kásipornyna sheber bop qyzmetke kirisedi. Ár jumystyń óz talaby bar degendeı, kúndegisin kúnde kentten syrtqaryraq jatqan qaldyq tógetin orǵa kep, qadaǵalap-baqylap turý jaýapkershiligi moınynda bolsa kerek. Ol álgi orynǵa kelip, kóliginen túse bergeni sol eken, jyrtqysh qarsy aldynan tisin aqsıta aıbat shegip, yryldap tura qalady. Jekip, jasqaǵan munyń tý syrtynan ekpinmen kep jabysa ketedi de, jigittiń jýan tumsyqtan pergilegen judyryǵyn, qolyn, arqasyn tisteleı bastaıdy. О́miriniń qyl ústinde qalǵanyn ańǵarǵan Dáýlet shapshań qımyldap, bir qolymen qasqyrdyń aýyzynan búre ustap, jaǵalasa júrip jerge jyǵady da qylǵyndyryp óltiredi. Jaqyn mańda ornalasqan «Qaısarservıs» JShS jumysshylary kelip, jaraqattanǵan Dáýletti kent aýrýhanasyna jetkizedi.
– Dáýlet jańa ǵana meniń qabyldaýymda boldy. Jaǵdaıy jaqsy. Qaıratty jigit bolǵandyqtan aman qaldy. Onyń ornynda bala-shaǵa nemese qart kisi bolǵanda nege soqtyrary belgisiz edi, – deıdi kenttiń jańa saılanǵan ákimi A.Nuǵymanov. Aýyl turǵyndary jyrtqysh óleksesin órtep jibergen. Qarttar ol ash qasqyr bolýy múmkin degendi aıtady. Áıtpese, kún jyly, jer qarada qasqyrdyń adamǵa shabýy buryn-sońdy kezdespegen. Qaldyqtar men jaqyn mańdaǵy tas karerleriniń ashanalarynan shyǵarylǵan tógindilerdi talǵajý etetin qasqyr týraly «qarań-qurań adamdardan yǵyr bolyp, ashtyqpen birge ashý qysqan bolýy múmkin» degen joramal da bar.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
