Elbasy N.Nazarbaev sonaý táýelsizdik alǵan kezden jas memlekettiń tizginin ustap, álemdik derjavalardy qarymdy oılarymen aýzyna qaratqan tulǵa. Onyń saıası qaýqarynyń qaınar kózi – halyq únine qulaq asýynda. Tuńǵysh Prezıdent únemi halyqtyń ishki dúnıesin tereńinen túsinip, onyń muń-muqtajyn sheshýmen, durys baǵdar berýmen aınalysty. Ár kezde óz oıyn naqty, halyqqa uǵynyqty etip jetkizip keledi.
Osy joly da, elimiz aýyr indetpen kúreske kirisken kezde qazaqstandyqtarǵa jaqsylyq pen aman-saýlyq tilep, barlyǵymyzdy tózimdi ári sabyrly bolýǵa shaqyrdy. Biz muny onyń: «Táýelsizdik jyldary el ómiriniń eń qıyn da kúrdeli kezeńderinde men kez kelgen máseleni qadirmendi otandastarymmen birge búkpesiz, ashyq talqyǵa salyp, týǵan halqymmen únemi oı bólisip kelemin», degen sózderinen baıqaımyz. Sondaı-aq elimizde osyǵan deıin birtalaı mańyzdy jumys atqaryldy. Úlken ken oryndary men jańa zaýyttar ashyldy.
El ekonomıkasy qaryshtap damydy. Dese de, osy jolǵy daǵdarys osyǵan deıingi bastan keshken qıynshylyqtan kúrdelileý bolatynyn ańǵartyp tur. О́ıtkeni tek bizdiń elde ǵana emes, álem boıynsha kóptegen óńdiris orny jabylyp, adamdar jumyssyz qaldy.
Elimizde osyndaı qıynshylyqtardy eńserý úshin Elbasy aldymen elimizdiń ózindik qasıetine aınalǵan tatýlyq pen birlik, ishki turaqtylyq qajet ekenin qadap aıtty. Prezıdent Qasym-Jomart Toqaevtyń bastamalaryna tolyqtaı qoldaý kórsetýge shaqyrdy. Ol úshin elimizde barlyq múmkindikterdiń bar ekenin jetkizdi. Táýelsizdiktiń alǵashqy sátterinen bastap, uly Abaıdyń «Kimge dostyǵyń bolsa, dostyq shaqyrady» degen dana qaǵıdasyn basshylyqqa alatynyn da aıtyp ótti.
О́z basym Parlament Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi jáne áskerı azamat retinde Elbasy N.Nazarbaevtyń Qarýly Kúshter men quqyq qorǵaý organdaryn qalyptastyrý men damýyndaǵy erekshe ornyn atap ótkim keledi. Nursultan Ábishulynyń salıqaly saıasatynyń jáne eren eńbeginiń arqasynda el ekonomıkasy kóterilip, Qarýly Kúshter men arnaıy organdardyń áleýeti artqany sózsiz. Elbasynyń áskerı saladaǵy reformalaryna basy-qasynda júrip kýá boldyq.
Áskerimiz jasaqtaldy, shekaramyz bekitildi, barlyq eldermen tatý-tátti qarym-qatynas ornattyq. Elimizdi qaýipti indet jaılaǵan kezde barsha kúsh qurylymdary el úshin alǵy shepte abyroıly qyzmet etip júr.
О́zderińiz baıqaǵandaı, aq halatty dárigerlermen qatar indetpen kúrestiń aldyńǵy shebinde kúshtik qurylymdardyń barlyǵy jumyldyrylǵan. Biri blok-beketterde qyzmet atqarsa, biri karantındik rejimdi qadaǵalaýda. Onsyz indetti jeńý múmkin bolmaıdy. Elbasy óz maqalasynda «Búgingi kúres dańqty qolbasshy Baýyrjan Momyshulynyń: «Tártipsiz – el bolmaıdy, tártipke bas ıgen el qul bolmaıdy» degen qanatty sózin eske salady jáne sony bekem ustanýdy talap etedi», dep naqtylap ótti. Osy indetpen kúreste júrgen áskerı qurylymdardyń karantındik rejimdi saqtaýǵa, el densaýlyǵyn nyǵaıtýǵa qosar úlesi mol. Osyndaı qıyn-qystaý kezde halqymyzdy tártipke baǵynýǵa, barynsha dárigerler men quqyq qorǵaý qyzmetkerlerine qoldaý kórsetýge jáne Elbasy men Memleket basshysynyń úndeýlerine qulaq asýǵa shaqyramyn. Birlik saltanat qurǵanda, erlikke jol bar. Birlik bar bolǵanda bereke, yntymaq, jeńis shańyraǵymyzǵa kelip ornyǵady.
Asyl qazynamyz, baǵa jetpes baılyǵymyz – táýelsizdik pen eldigimiz máńgilik, yntymaǵymyz berik bolǵaı! Biz birgemiz!
Abaı TASBOLATOV,
Májilis depýtaty, general-leıtenant
