Jyl basynan beri BJZQ salymshylardyń shottaryna 661,7 mlrd teńge aýdaryldy

Bul rette BJZQ aktıvterin Qazaqstan Respýblıkasynyń Ulttyq Banki basqaryp kele jatqan 2013 jyldyń qyrkúıek aıynan bergi ýaqyt ishinde azamattardyń zeınetaqy jınaqtary qurylymyndaǵy eseptelgen ınvestısııalyq kiris onyń 30% - dan astamyn (nemese 3,9 trln teńge) qurady.

Shetel valıýtalary baǵamdarynyń qubylmalylyǵy jáne qarjy quraldarynyń naryqtyq qunynyń ózgerýi saldarynan bolǵan ınvestısııalyq qyzmet nátıjesinde eseptelgen ınvestısııalyq kiris mólsheri ózgerýi múmkin jáne ony uzaq merzimdi perspektıvada qaraý qajet.

Máselen, ótken 2019 jyly BJZQ salymshylarynyń jeke zeınetaqy shottaryna eseptelgen taza ınvestısııalyq kiris 641,8 mlrd teńge, ıaǵnı tabystylyq 6,57%, al ınflıasııa 5,4% boldy. 2018 jyly salymshylardyń taza ınvestısııalyq kirisi 977,2 mlrd teńgege jetip, 5,3% ınflıasııa kezinde tabystylyq 11,27% kórsetti. Osylaısha kiristilik kórsetkishteri jylyna qaraı erekshelenýi múmkin, alaıda ınflıasııa deńgeıinen árdaıym joǵary bolyp, zeınetaqy aktıvteriniń taza kiristiligi oń nátıje berdi.

2020 jyldyń basynan bastap 1 sáýirdegi jaǵdaı boıynsha salymshylardyń jeke zeınetaqy shottaryna 661,7 mlrd teńgeden astam ınvestısııalyq tabys esepteldi, bul ótken jyldyń osy kezeńimen (96,9 mlrd teńge) salystyrǵanda  564,8 mlrd teńgege artyq. Tutastaı alǵanda ınvestısııalyq kiris – qarjy quraldarynyń qunyna jáne jalpy qarjy naryǵyndaǵy jaǵdaıǵa táýeldi belgilenbegen shama. Jekelegen qarjy quraldary esebinen ınvestısııalyq kiris shamasynyń ýaqytsha tómendeýi zeınetaqy aktıvteriniń barlyq ınvestısııalyq portfelin neǵurlym uzaq kezeń ishinde ártaraptandyrý esebinen óteledi.

Zeınetaqy aqshalaryn ınvestısııalaýdyń basty qaǵıdaty – olardyń saqtalýyn qamtamasyz etý, ıaǵnı qandaı da bolmasyn bir sebepterge baılanysty shyǵynǵa ushyratý táýekelderin azaıtý. Sondyqtan zeınetaqy aktıvteri otandyq jáne sheteldik qor naryqtary usyna alatyn alýan túrli, onyń ishinde eń senimdi qarjy quraldaryna salynady. Kiristilik neǵurlym kóp bolsa – salymdardy joǵaltý táýekelderi soǵurlym joǵary, salymdardy joǵaltý táýekelderi neǵurlym tómen bolsa – kiristilik te soǵurlym az bolady. Zeınetaqy aktıvterin  ınvestısııalaý úshin qarjy quraldaryn tańdaý kezinde Ulttyq Bank táýekel-kiristilik qatynasynda barynsha aqylǵa qonymdy teńgerimdi qamtamasyz etýge umtylady.