Oılamaǵan jerden, tipti tutqıyldan dese de bolǵandaı, jer júzi úshinshi dúnıejúzilik soǵysqa telip jatqan bul surapyl indet – «Covid-19» pandemııasy búginde, búkil álemniń júzdegen elin jaılady. Ár ǵasyrda ártúrli indettiń túri kezdesken. Biraq ol zamandarda el damymaǵan, bálkim, tazalyqtyń joqtyǵynan dermiz de... biraq búgingideı tamaqtyń toqtyǵy men órkenıettiń sharyqtap damyp ketken kezeńinde de aty jaman indettiń osy bir túri adamzat balasyna aýyz salyp otyr.
Elimiz egemendik alyp, táýelsizdikke qol jetkizip, memleket retinde tuǵyrly orynnan kórinip, álemniń eń ozyq órkenıetke qol jetkizgen, damyǵan elderi qatarynan boı kórsetti. Bizdiń memleketimizben búkil Batys, Shyǵys elderi sanasatyn deńgeıge jettik. Mádenıetimiz ben ádebıetimiz, ekonomıka men eldiń áleýeti aıtarlyqtaı alǵa ozdy. Kún sanap qyzý da qarqyndy sharýalarymyzdy jumystap, jarqyn kúı keship jattyq. Bári de tamasha! Tek, tek...
Tek osyndaı jaıdary shaqta el basyna naqty emi tabyla qoımaǵan belgisiz indetten qater keledi dep úsh uıyqtasaq túsimizge de kirmegen edi... Biraq «etikpen sý kesher» erlerimiz bary dátke qýat, kóńilge medeý. Olar: Bizdiń Prezıdentimiz Qasym-Jomart Kemeluly Toqaev pen onyń kóshine ergen kóptegen erler. Sondaı-aq dál osy shaqta ataly oı aıtyp, barsha qazaqstandyqtarǵa «Birlese bilgen el bárin jeńedi» atty maqalasyn joldaǵan Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń halyqty sabyrlyqqa, baısaldylyqqa shaqyryp, baıbalamǵa boı aldyrmaı, indettiń qaterin birlese jeńýge úndeýi erlikke para-par, naǵyz kóshbasshyǵa tán is.
Elimizdiń Prezıdenti Qasym-Jomart Kemeluly Toqaevty kún saıyn ottyń ishinde júrgen áskerbasy, qolbasy deýge bolady. Onyń aty óshkir indetten kelgen ekonomıkalyq, áleýmettik jaǵdaılardy turaqtandyrý men ustap turý turǵysyndaǵy kúndelikti ár salanyń basy-qasyna baryp, kózimen kórip, kóńilimen toqyp, tıisti jáne tıimdi tapsyrmalardy berip, onyń ústine, ál-aýqaty, turmysy tómen otbasylar men jumysy ýaqytsha turalaǵan kásipkerlerge materıaldyq jáne qarjylaı qoldaý kórsetý máselesin jolǵa qoıýy, qazirgi jaǵdaıda halyqqa jasalǵan úlken qamqorlyq.
Biz mádenıet salasynyń qyzmetkerleri de óz kezegimizde onlaın bolsa da el turǵyndaryn sabyrǵa shaqyryp, sondaı-aq áleýmettik jeliler arqyly qoıylymdarymyzdy kórsetip, onlaın-suhbattar jasap, qam-qareketimizdi jasaýdamyz.
Birlese bilsek, elim degen erlerimizdiń isine qoldaý tanytyp, tártipke baǵynyp, bir alaqannyń aıasynda jumyla, jymdasa bilsek, almaıtyn qamalymyz bolmaıdy, kez kelgen indetti joıýǵa qaýqarymyz jetedi degen oıdamyz.
Gúljamal QAZAQBAEVA,
Qazaqstan Respýblıkasynyń eńbek sińirgen ártisi, Memlekettik syılyqtyń laýreaty, «Qurmet», «Parasat» ordenderiniń ıegeri
