Atyraý oblysy Inder aýdandyq ishki ister bóliminde qyzmet atqarǵan polıseı esirtki saýdasymen aınalysqany úshin 10 jylǵa bas bostandyǵynan aıyryldy.
Atyraý oblysy Inder aýdandyq ishki ister bóliminde qyzmet atqarǵan polıseı esirtki saýdasymen aınalysqany úshin 10 jylǵa bas bostandyǵynan aıyryldy.
Bul týraly habarlaǵan oblystyq sotynyń baspasóz hatshysy Boranbaı Ǵalıevtiń aıtýynsha, ishki ister bóliminiń qyzmetkeri Hamıt Nurymov qylmystyq kodekstiń 259-baby 3- tarmaǵy («Asa iri mólsherde esirtki zattardy ótkizý, daıyndaý, uqsatý, jóneltý maqsatynda zańsyz ıemdenip alý, saqtaý») boıynsha kináli dep tanylǵan.
Aıyptaý úkiminde atap kórsetilgendeı, Inder aýdandyq ishki ister bóliminde jedel ýákiletti qyzmetkeri bolyp jumys istegen Qyzylorda oblysynyń 23 jastaǵy týmasy ótkizý maqsatynda asa iri mólsherde marıhýanany zańsyz ıemdenip, saqtaǵan. Byltyrǵy jyldyń qyrkúıeginde polıseı óz tanysyna bir kılosyn 250-300 myń teńge baǵaǵa marıhýana satyp alýshylardy taýyp berýdi suraǵan kórinedi. Al tanysy sol boıda polısııaǵa habar salǵan. Qazan aıynda esirtki saýdagerin batys óńirlik uıymdasqan qylmyspen kúres basqarmasynyń qyzmetkerleri esirtki satpaqshy bolǵan polıseıdi qamaýǵa aldy.
Qylmystyq ister jónindegi aýdanaralyq mamandandyrylǵan soty H.Nurymovqa múlkin tárkileýmen qatar, qatań rejımdegi kolonııada 10 jylǵa bas bostandyǵyn aıyrýǵa úkim shyǵardy. Sot jaza taǵaıyndaý kezinde onyń jazasyn jeńildetýde Nurymovtyń buryn sottalmaǵanyn, sonymen qatar jumys ornynan berilgen oń minezdemeni qaperge aldy.
Qurysh NURYMBET.
