–Balet termınderi men olardyń maǵynasy týraly ne bilesizder? Fýete, an deor, an dedan degenimiz ne? – dep, «Astana Opera» teatry balet trýppasynyń solısi Serik Naqyspekov aýdıtorııaǵa saýal tastady. Ol sabaq barysynda balet óneriniń negizgi qımyl-qozǵalystary týraly baıandap, ózi solardy kásibı joǵary deńgeıde oryndap berdi. Budan bólek, kórermen nazaryna balettik qoıylymdardyń beınetizbesi usynylyp, atalǵan bı elementteriniń qalaı qoldanylatyny kórsetildi.
«Balet jáne onyń qyr-syry» baǵdarlamasynyń kelesi shyǵarylymy zamanaýı horeografııaǵa arnalmaq. Bul túsirilimde jurtshylyq bı plastıkasymen qandaı emosııalar berilýi múmkin ekeninen habardar bolady.
Taǵy bir aıta ketetin jaıt, tikeleı efır arqyly balet juldyzdarymen tanysyp, tildesýge múmkindik týǵyzylǵan. Mysaly, 12 sáýir kúni Qazaqstannyń eńbek sińirgen qaıratkeri Gaýhar Ýsına teatrdyń Instagram paraqshasyndaǵy oqyrmandar qoıǵan suraqtarǵa jaýap bergen bolatyn. Kórermenniń súıikti ártisterimen ınternet-baılanys jasaý tájirıbesi tyń jobanyń suranysqa ıe ekenin kórsetedi.
Balet trýppasynyń tanymal ártisteri Baqtııar Adamjan men Áıgerim Beketaevanyń shyǵarmashylyǵyna qyzyǵýshylyq tanytqan kórermenge 22 sáýirde taǵy bir tosyn syı ázirlenýde. Bıshiler «Karantındegi juldyzdar» jobasyna qatysady. Bul joba jetekshi solısterdi aýdıtorııasyna burynǵydan da jaqyndata túsedi dep kútilýde. Ártister qoıylym janrynan tys óner kórsetip qana qoımaı, ózderiniń negizgi kásibimen úılestire otyryp, sheshendik óner daǵdylaryn pash etpek.
Karantınge qaramastan balet ártisteri kún saıyn sahnalyq qalyptaryn saqtaýǵa, bekzat ónerdiń ásem ıirimderin aıshyqty jetkizýge tyrysyp baǵady. Ol úshin ózderiniń ustazdarymen túrli jattyǵýlar men kombınasııalardy oryndaı otyryp, kúndelikti klassıkalyq bı sabaqtaryna qashyqtan jattyǵady. О́ner maıtalmandary júrgizetin sabaqtardyń áleýmettik jelilerde jarııalanýy balet ónerin tańdaǵan keıingi jastar úshin biliktilik arttyrý alańyna aınalýda.
