Keshe Astanada ulttyq sport túrimizdiń biri – kókpardan tuńǵysh ret ashyq Azııa chempıonatynyń jalaýy jelbiredi.
Keshe Astanada ulttyq sport túrimizdiń biri – kókpardan tuńǵysh ret ashyq Azııa chempıonatynyń jalaýy jelbiredi.
Bul básekege bizdiń elden basqa Qyrǵyzstan, О́zbekstan, Mońǵolııa, Túrkııa, Tájikstan, Reseı men Qytaı elderiniń ulttyq quramalary qatysýda.
Azııa chempıonaty Ulttyq sport túrleri qaýymdastyǵynyń uıymdastyrýymen Astananyń mańyndaǵy «Qazanat» atshabarynda ótýde. Chempıonat tórt kúnge sozylyp, 15 qyrkúıek kúnine deıin ótedi. Osy kúni fınaldyq synda eki myqty komanda ózara Azııa chempıonyn anyqtaıdy. Qazir bul mártebeli ataqty qaı eldiń komandasynyń jeńip alatynyn aıtý qıyn. Degenmen, basqa quramalarǵa qaraǵanda, Qazaqstan men Qyrǵyzstannyń Azııa chempıony atanýǵa múmkindigi kóp delinýde. Ony ózge elderdiń quramalary da jasyrmaıdy. Al Qazaqstan men Qyrǵyzstan kókparshylary qazirdiń ózinde fınaldyq synda kezdesýge alaqandaryn ysqylap daıyndalyp jatqan sııaqty. Oǵan dálel retinde keshe chempıonattyń alǵashqy kúni ulttyq quramamyzdyń Tájikstan komandasyn 9:3, Qyrǵyzstan kókparshylarynyń О́zbekstan quramasyn 11:1 esebimen jeńgenin aıtýǵa bolady. Osy kúni Reseı men Qytaı elderiniń ókilderi de qarsylastaryn aıqyn basymdyqpen utty. Reseı Mońǵolııany 13:0, Qytaı Túrkııany 8:0 esebimen jeńdi.
Al búgin Qazaqstan men Reseı kezdesse, Tájikstan men Mońǵolııa, Qyrǵyzstan men Túrkııa, О́zbekstan men Qytaı komandalary kúsh synasady. Aıta ketetin bir nárse, Azııa chempıonatyna sheteldiń quramasy sapynda qatysyp jatqandardyń bári – ózimizdiń qarakóz baýyrlarymyz. Mysaly, Reseıdiń ulttyq quramasy Altaı respýblıkasynan jasaqtalsa, Mońǵolııa komandasynda qandastarymyz kóp turatyn Baıan-О́lgıı aımaǵyndaǵy baýyrlarymyz óner kórsetýde. Al Qytaı quramasynda Shyńjań-Uıǵyr avtonomııalyq aýdanynyń qazaqtary oınap jatyr. Tek onda komandanyń jetekshisi ǵana qytaı azamaty.
Keshe chempıonattyń ashylý saltanatynda Sport jáne dene shynyqtyrý isteri agenttiginiń tóraǵasy Erlan Qojaǵapanov, «Nur Otan» HDP Tóraǵasynyń birinshi orynbasary Baýyrjan Baıbek, Ulttyq sport túrleri qaýymdastyǵynyń tóraǵasy Qaırat Satybaldy, onyń orynbasary Bekbolat Tileýhan, «Samuryq-Qazyna» UÁQ» AQ basqarýshy dırektory Darhan Káletaev Azııa chempıonatynyń máni men mańyzyn aıta kelip, onyń júlde qoryna 20 mln. teńgeniń bólingenin, sonyń ishinde birinshi orynǵa 10 mln. teńge, ekinshi orynǵa 6 mln. teńge, al úshinshi orynǵa 4 mln. teńgeniń beriletinin jetkizdi.
Azııa chempıonaty kún saıyn 15 qyrkúıekke deıin saǵat 10.00-den 14.00-ge deıin ótetin bolady. Oǵan jarystyń sharty boıynsha ár toptan 10 adam qatysady. Qazir 20 mınýttyq eki taımnan turatyn oıynǵa ár toptan tórt oıynshy kúsh synasýda. Tartys eki shetine birdeı qazan qoıylǵan, aýdany 200/80 bolatyn alańda ótýde. Oıynshylardyń mindeti – serkeni jerden alyp, qarsylas toptyń qazanyna salý.
Dastan KENJALIN,
«Egemen Qazaqstan».
––––––––––––––––––––
Sýretti túsirgen
Erlan OMAROV.
