Keshe elimizdiń Memlekettik hatshysy Marat Tájın Amerıka Qurama Shtattarynyń Qazaqstandaǵy Tótenshe jáne ókiletti elshisi Kennen Feırfaksty qabyldady.
Keshe elimizdiń Memlekettik hatshysy Marat Tájın Amerıka Qurama Shtattarynyń Qazaqstandaǵy Tótenshe jáne ókiletti elshisi Kennen Feırfaksty qabyldady.
M.Tájın AQSh elshisin Qazaqstandaǵy dıplomatııalyq mıssııasynyń aıaqtalýymen jáne Atom energııasy jónindegi halyqaralyq agenttiktiń atqarýshy dırektorynyń orynbasary laýazymyna taǵaıyndalýymen quttyqtady. Memlekettik hatshy K.Feırfakstyń AQSh-tyń Qazaqstandaǵy Tótenshe jáne ókiletti elshisi retinde jemisti eńbek etkenin, sondaı-aq, osy qyzmetke taǵaıyndalǵan eki jyldyń bir kúndegideı syrǵyp ótip ketkenin atap óte kele, memleketaralyq baılanystardy jandandyrýǵa qosqan úlesi úshin alǵysyn bildirdi.
Kezdesý barysynda taraptar Qazaqstan men Amerıka arasyndaǵy kópqyrly strategııalyq áriptestiktiń joǵary deńgeıin, eki memleket basshylary arasynda dostyq qarym-qatynas qalyptasqanyn atap ótti.
K.Feırfaks saıası jáne ekonomıkalyq áriptestikti ilgeriletý, Qazaqstan-AQSh qarym-qatynasyn odan ári ınstıtýttandyrý boıynsha birlese atqarylǵan jumystardyń nátıjelerine qanaǵattanýshylyǵyn bildirdi.
Kezdesý sońynda amerıkalyq dıplomat jýrnalısterge suhbat berdi. «Biz kóptegen máselelerdi, sonyń ishinde sońǵy jyldary atqarylǵan jumystar shoǵyryn jáne osy jumystardyń nátıjelerin talqyladyq. Máselen, kezdesýde qaýipsizdik jáne lańkestikke qarsy kúres júrgizý baǵytynda yntymaqtastyq ornatýdyń jaıy qaraldy. Iаdrolyq qarýdy taratpaý, ártúrli jahandyq strategııalyq máseleler tóńireginde Qazaqstan men AQSh bir-birine uzaq jyldar boıy ózara qoldaý tanytyp, yntymaqtastyq ornatyp kele jatqany barlyqtaryńyzǵa belgili. Buǵan qosa, sońǵy jyldary quqyq salasynda da tyǵyz áriptestiktiń jolǵa qoıylǵanyn atap ótýge bolady. Máselen, eki eldiń quqyq qorǵaý organdarynyń ókilderi terrorızmge qarsy kúres salasynda tájirıbe almasyp, tyǵyz qarym-qatynas ornatqan bolatyn», dedi sóz oraıynda ol.
Sondaı-aq, K.Feırfaks ekijaqty kezdesý barysynda sońǵy ýaqytta Qazaqstanda bolǵan saıası oqıǵalar men is-sharalardyń jáne Qazaqstannyń demokratııalyq ınstıtýttardy damytý men áleýmettik damý máseleleri tóńireginde qolǵa alǵan josparlarynyń talqylanǵanyn atap ótti.
«Meniń AQSh-tyń Qazaqstandaǵy Tótenshe jáne ókiletti elshisi retindegi mıssııamnyń merzimi aıaqtalǵanyn bilesizder. Soǵan qaramastan, men Qazaqstanmen búgingi kúnge deıin qalyptasqan tyǵyz baılanys jibin úzbeı, jalǵastyra beretin bolamyn. Dálirek aıtsam, endigi kezekte Atom energııasy jónindegi halyqaralyq agenttikte qyzmet atqara júrip «Jasyl kópir», EKSPO-2017 jobalary boıynsha ekijaqty yntymaqtastyqty jandandyrýǵa aıryqsha nazar aýdaratyn bolamyz», dedi elshi óz sózinde.
Láıla EDIQYZY,
«Egemen Qazaqstan».
