Májilis Tóraǵasy Nurlan Nyǵmatýlınniń jetekshiligimen ótken palatanyń keshegi jalpy otyrysynda depýtattar Qazaqstan men Qytaı arasyndaǵy munaı qubyryna qatysty máseleni talqyǵa saldy.
Májilis Tóraǵasy Nurlan Nyǵmatýlınniń jetekshiligimen ótken palatanyń keshegi jalpy otyrysynda depýtattar Qazaqstan men Qytaı arasyndaǵy munaı qubyryna qatysty máseleni talqyǵa saldy.
Zań jobasynyń tolyq ataýy «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy «Qazaqstan – Qytaı» munaı qubyryn damytý jáne paıdalaný kezindegi yntymaqtastyqtyń keıbir máseleleri týraly kelisimdi ratıfıkasııalaý týraly» dep atalady. Ol boıynsha Munaı jáne gaz mınıstriniń mindetin atqarýshy Bolat Aqsholaqov baıandap berdi.
Odan málim bolǵandaı, munaı qubyryn damytý men paıdalaný jónindegi jobany Qazaqstan Respýblıkasynyń Úkimetinen – «QazMunaıGaz» ulttyq kompanııasy» AQ, al Qytaı Respýblıkasynyń Úkimetinen – Qytaı Ulttyq munaı-gaz korporasııasy júzege asyratyn bolady.
Taraptar ýákiletti uıymdar múddeleriniń teńgerimin saqtaýdy eskere otyryp, «MunaıTas» soltústik-batys qubyr kompanııasy» AQ pen «Qazaqstan – Qytaı qubyry» JShS-niń aktıvterin Qazaqstanda tirkelgen, jumys istep turǵan nemese jańadan qurylǵan bir zańdy tulǵanyń menshigine biriktirý nemese ózge nysanda birlesken qyzmetti júzege asyrý múmkindigin ýákiletti uıymdardyń qaraıtynymen kelisken.
«Qazaqstan – Qytaı» munaı qubyry arqyly qazaqstandyq munaıdy eksportqa tasymaldaý jónindegi qyzmetterdiń tarıfi munaıdyń «Qazaqstan – Qytaı» munaı qubyry júıesine kirý núktesine qaramastan, biryńǵaı bolyp tabylady jáne munaı tasymaldaý marshrýtynyń uzaqtyǵy esepke alynbaı belgilenedi dep kórsetilipti. Atalǵan munaı qubyry arqyly shıkizatty elimizdiń ishki naryǵyna berý tarıfin Qazaqstan zańnamasyna sáıkes Qazaqstan Respýblıkasynyń ýákiletti memlekettik organdary bekitedi, alaıda, ol eksport tarıfinen aspaýǵa tıis.
Joba sheńberinde kózdelgen nysandar paıdalanýǵa berilgennen keıin jáne «Qazaqstan – Qytaı» munaı qubyry boıynsha Atyraýdan munaı tasymaly bastalǵannan keıin munaı berý kestesin taraptardyń quzyretti organdary jyl saıyn kelisedi. Osy rette Qazaqstan taraby ishki naryqta resýrstardyń jetispeýshiligine ákeletin mán-jaılar týyndaǵan jaǵdaıda tıisti quzyretti organ arqyly jyl saıynǵy kesteni túzetip, ózge taraptyń ýákiletti organyn habardar ete otyryp, munaıdy tasymaldaýdyń aı saıynǵy kestesine ózgerister engizýge quqyly ekendigi de kórinis tapqan.
Osy rette Atasý – Alashańqaı qubyry arqyly jylyna munaı tasymalyn 20 mıllıon tonnaǵa jetkizý kózdelip otyrǵandyǵyn da aıta ketken jón.
Mınıstrdiń mindetin atqarýshynyń sózine qaraǵanda, shıkizattyń munaı qubyry arqyly Pavlodar munaı óńdeý zaýytyna jetkizilýi qamtamasyz etiletin bolady. Sondaı-aq, Pavlodar men Shymkent munaı óńdeý zaýyttarynyń qýatyn arttyrýǵa, elimiz arqyly munaı tranzıti úshin qubyrlar áleýetin paıdalanýǵa jáne jańa jumys oryndaryn ashýǵa múmkindik týǵyzylady dep kútilýde. Eń bastysy, elimizdiń energetıkalyq qaýipsizdigin qamtamasyz etýge oń yqpalyn tıgizetin bolady.
Zań jobasy boıynsha jumys tobynyń jetekshisi Vıktor Rogalev qubyr ótetin jol boıyndaǵy ınfraqurylymdardyń damýy erekshe qarqyn alatynyna nazar aýdardy. Onyń málimetine qaraǵanda, 8 qosymsha sorǵylyq aıdaý stansalarynyń qurylysy júrgiziletin bolady. Munaı qubyry ótetin Atyraý, Aqtóbe, Qyzylorda, Qaraǵandy, Shyǵys Qazaqstan jáne Almaty oblystarynyń damýyna serpin beredi dep kútilýde. Budan basqa, qosymsha 1000 jumys orny ashylatyny da kóldeneń tartyldy. Depýtattar zań jobasyn maquldady.
Sondaı-aq, jalpy otyrysta palata bıýdjet zańnamasyn jetildirý, salyq salý máseleleri boıynsha ózgerister engizý jáne TMD-ǵa qatysýshy memleketterdiń adamdardy memleketaralyq izdestirý shartyna qatysty zań jobalaryna qorytyndy ázirleý merzimin bekitip berdi.
Asqar TURAPBAIULY,
«Egemen Qazaqstan».
