Meniń anam Baqytjamal qazir 81 jasta. Balalyq shaǵy soǵys ýaqytymen tuspa-tus kelgen anam esinde qalǵandaryn, ájemiz Kábzııanyń tyldaǵy aýyr eńbek beınetin kórgenin únemi bizge aıtyp otyrady. Búgin mine ol kisiniń Ǵabbas atamyz týraly aıtqan áńgimesi esime túsip otyr...
Soǵys jyldary «Barlyǵy maıdan úshin, barlyǵy Jeńis úshin!» uranymen Ǵabbas Ydyryshanov bastaǵan tyl eńbekkerleri qazirgi Aqqýly aýdanynan maıdanǵa kıim-keshek, azyq-túlik jiberýge kóp úles qosqan.
Ǵabbas atanyń qyzy Dámetkenniń aıtýynsha, soǵys jyldary ákeleri qazirgi Aqqýly aýdanynda kolhoz tóraǵasy bolyp qyzmet atqarǵan.
– Ákemiz 1943 jyldyń 19 qańtarynda Keńes ókimetiniń Qorǵanys qoryna tank alý úshin 100 myń som jibergen eken. Memlekettik banktiń №350 eseptik kvıtansııasy, Stalınniń qoly qoıylǵan Alǵys hat oblystyq mýzeıde saqtaýly, – deıdi Dámetken Ǵabbasqyzy.
Mýzeıdiń sarǵaıǵan qujattarynda 1942 jyly pavlodarlyqtardan maıdandaǵy jaýyngerler 1264 sálemdeme alǵany jaıly málimetter bar. Maıdanǵa 10360 jup pıma, 4190 sholaq ton, 10709 tymaq, 1639 teri jeletkeler, 10 myń juptan asa teri qolǵaptar, maqta fýfaıkalar men shalbarlar jáne basqa buıymdar jiberilgen.
Sol jyldary Qaıyrbek Bajeneev, Jaqııa Jańataev, Ǵabbas Ydyryshanov syndy kolhoz basshylarynyń árqaısysy qorǵanys qoryna 100 myń somnan astam aqsha aýdarady. Keıin Ǵabbas Ydyryshanov basqarǵan «Sorevnovanıe» kolhozshylary Qorǵanys qoryna 25 myń som, 21 myń put astyq tapsyrǵan.
Tarıhı qujattarǵa úńilsek, 1952 jyldyń 23 sáýirinde Bronetank jáne mehanızasııalaý bóliminen Keńes áskeri shtaby arqyly hat kelgen. Hatta Ǵabbas Ydyryshanovtyń maıdanǵa jibergen qarajaty arqyly quralǵan tank birneshe ret shabýylǵa shyqqany, onyń jóndeý jumystarynan ótip basqa áskerı bólimderge berilgeni týraly jazylǵan. Shtab basshysynyń orynbasary, ishki ásker general-maıory M.Zelınskıı de alǵys bildirgen.
Búginde Ǵabbas Ydyryshanovtyń 1919 jyly Qyzyl ásker qatarynda bolǵany, basqa da qujattary, marapattary G.Potanın atyndaǵy oblystyq tarıhı-ólketaný mýzeıiniń qorynda saqtaýly tur.
Qyzy Dámetkenniń aıtýynsha, ákeleri óte qarapaıym, meıirimdi, el-jurtyna janashyr adam bolypty. Otbasyndaǵy 9 balasyna qosa, Nesibeli degen qyzdy asyrap alǵan eken.
Qazirgi ýaqytta Ǵabbas atamyzdyń urpaqtary Pavlodar oblysynda turady. Búginde bizdiń keıipkerimizdiń 26 jıeni, 8 nemeresi erjetken.
Pavlodar oblysy,
Aqqýly aýdany
