Mektep ákimshiligi, ustazdarymyz bárin táptishtep túsindirip, baılanys júıelerin aldyn ala tekserip, daıyndyq jasady. Degenmen alty balanyń kerek-jaraǵyn túgendeý ońaı bolmady. Nesıege teledıdar, smartfon aldyq. Mektep ákimshiligi oqý jylynyń sońyna deıin paıdalanýǵa noýtbýk berdi. Osylaısha sabaqqa kirisip kettik. Mine, eki apta ótti, balalar qashyqtan oqýǵa ábden tóselip aldy. Onlaın oqýdyń utymdy jaǵy da kóp eken. Buryn muǵalim sabaq suraýda barlyq oqýshyny qamtyp úlgermese, qazir ár shákirttiń sabaqqa qatysýy, úlgerimi, jaýaptary kóz aldyńda turady. Shynyn aıtsaq, balalardyń sabaq úlgerimi jaqsara bastaǵandaı.
Elimizde Tótenshe jaǵdaı kezinde tabysynan aıyrylǵandarǵa beriletin 42 500 teńge áleýmettik tólem taǵaıyndala bastaǵanda, aldyńǵylardyń biri bolyp biz de úlesimizdi aldyq. Bul memlekettiń óz azamattaryna jasaǵan úlken kómegi der edim.
Endi múldem kútpegen bizdi aıaq astynan qýanyshqa bólegen oqıǵa týraly aıtaıyn. Sáýirdiń 17-si kúni telefonǵa sms-habarlama tústi: «Prezıdent Jarlyǵyna sáıkes memleket atynan Sizdiń nesıeńizdi óteý úshin 41352 teńge tústi» degen jazbany kórgende óz kózime ózim senbedim. О́ıtkeni esh jerge ótinish jazyp, mundaı kómek suramaǵan edik. Jalma-jan smartfondaǵy nesıe tóleý kestesine qarasam, aldaǵy úsh aıdyń nesıesi tólenip tur eken!
Osynyń bári – qıyn kúnderde janyńnan tabylatyn, qoltyqtan demeıtin memleketińniń bolǵany júrekke óte jyly tıedi eken. Qazir maǵan búkil Qazaqstan jaqsylyq jasaýdan jarysyp jatqandaı kórinedi. Eriktiler de osy istiń aldyńǵy sapynda júr. «Dádem ata» jeke qorynyń dırektory Ǵarıfolla Jambozov degen azamat un, kúrish, makaron ónimderi, ósimdik maıy sekildi kúndelikti óte qajet azyq-túlik jıyntyǵyn jetkizdi. Erikti Aıbolat Qurymbaev bir dorba kartop ákeldi. Olardyń bárine alǵysym sheksiz! «Biz birgemiz!» degen uran jalań sóz emes, shynaıy is-qımyl eken. Biz muny óz shańyraǵymyzda sezinip otyrmyz.
Aqmaral RAHMETOLLAQYZY,
kóp balaly ana
Oral
