Oblysymyzdaǵy muqtaj jandarǵa antıseptık, medısınalyq betperde jáne kóptegen azyq-túlik ónimderin tegin jetkizip berip jatyr. Maǵan ózderin volontermiz dep tanystyrǵan eki jas bala birsypyra dúnıe berip ketti. Ishinde antıseptıkalyq zattar, sabyn, medısınalyq maska, makaron, qaraqumyq, kúrish, qant, ósimdik maıy, shaı, tuz, pechene deısiz be, kúndelikti qajetti zattyń bári bar. Bul qamqorlyǵy úshin Úkimet pen jergilikti bılik oryndaryna alǵys aıtamyn. Bul az ǵana kómek bolǵanymen, memleket tarapynan múmkindigi shekteýli adamdarǵa kórsetilip otyrǵan úlken qamqorlyq.
Osy Qostanaı oblysynyń ózinde qanshama otbasy memleket qamqorlyǵyn kórip otyr. Endi elimiz aman, zaman tynysh bolyp, qalypty ómirge qaıta oralsaq, bala-shaǵamyz oqýyn, jumysyn jalǵastyryp, baıtaq otanymyzdyń damýyna úles qossa, sanaly bolsa dep tileımiz. Sol berekeli tirshiliktiń ortasynda marqaıyp júrsek deımiz.
Tolqyn QANYBEKOVA,
II top múgedegi
Qostanaı
