Búgin, 18 qyrkúıek kúni Qyzylorda qalasynda Qazaq fýtbolynyń 100 jyldyǵyna arnalǵan respýblıkalyq velosherý Qyzylordadan bastaldy. Bul týraly qala ákiminiń baspasóz hatshysy Baldyrǵan Mámen habarlady.
«Qyzylorda qalasynda «Syr súleıleri» alańynda Qazaqstan fýtbolynyń 100 jyldyǵyna arnalǵan respýblıkalyq velosherý bastaldy. Atalmysh sharaǵa Astana qalasy, Qaraǵandy, Pavlodar, Shyǵys Qazaqstan jáne Qyzylorda oblystarynyń veloshabandozdary men sport ardagerleri qatysýda», - delingen habarlamada.
Baspasóz hatshysy budan ári osyǵan arnalǵan saltanatty jıynda Qyzylorda qalasynyń ákimi Nurlybek Nálibaev pen fýtbol sport ardageri Vladımır Aleınıkovtiń sportshylarǵa sáttilik tilep, Qazaq fýtbolynyń 100 jyldyq mereıtoıymen quttyqtaǵanyn aıtady.
Qyzylorda qalasynan sóre tartqan velosherý Qaraǵandy oblysy, Astana jáne Pavlodar qalalary arqyly Shyǵys Qazaqstan oblysynyń Semeı qalasynda 21 qyrkúıekte jetedi. Velosherýge qatysýshylar Qyzylorda jáne Shyǵys Qazaqstan oblystarynyń estelik syılyqtarymen marapattalady.
Qazirgi tańda Qyzylorda qalasynda Qazaqstan fýtbolynyń 100 jyldyǵyna arnalǵan birneshe sporttyq sharalar ótýde.
Aıta keteıik, 9 qazan kúni Ǵ.Muratbaev atyndaǵy ortalyq stadıonda Qazaqstan quramasy men «Qaısar» quramasy ardagerleri arasynda joldastyq kezdesýmen qatar, jasóspirimder fýtbol festıvaliniń aqtyq oıyndary ótedi.
Damır Qojamqul.
