О́nerde de mańyzdy ózgerister bolýy múmkin

Búkilálemdik qaýym­das­tyq­tyń bedeldi bir múshesine aınalǵan Qazaqstan betpe-bet kelip otyrǵan indetpen álem elderimen tize qosa otyryp kúresýde jáne negizgi ustanymy Ata Zańynda jazylǵandaı, «...eń qymbat qazynasy – adam jáne adamnyń ómiri...» bolyp otyr. Respýblıka Prezıdenti Q.Toqaevtyń elimizde tótenshe jaǵ­daı jarııalaýy jáne ony taǵy 11 mamyrǵa deıin uzar­tý týraly sheshiminiń bas­ty maq­saty da – adam ómirin saqtaý, indettiń jappaı taralýyna jol bermeý.

Jalpy, joǵarǵy bıliktiń josparlary, qımyl-qareket­teriniń qoǵam úshin qashanda, al osyndaı kúrdeli kezeńde ásirese mańyzdy. Prezıdent Q.Toqaevtyń 27 sáýirde jasa­ǵan málimdemesinde elimizdegi tótenshe jaǵdaıǵa baılanysty jáne memlekettiń daǵ­darys­qa qarsy jan-jaqty is-shara­lary aıqyn kórsetilip, búgin­gi qoǵamdyq-áleýmettik, ekono­mı­kalyq ahýal barynsha qam­tylǵany qalyń jurtshylyqtyń kóńilinen shyqty. «...Qazirgideı kúrdeli kezde árbir azamat biz­diń nazarymyzda bolady. Mem­leket eshkimdi qıyndyqta qaldyrmaıdy» dedi Prezıdent. Elimizdiń Tuńǵysh Prezıdenti – Elbasy N.Nazarbaev ta 8 sá­ýir­degi jarııalanǵan maqalasynda, bir­de-bir adam, elimizdiń esh­bir azamaty qamqorlyqsyz qalmaı­tynyn atap kórsetken bolatyn. Munyń ózi adamdarǵa senim men kúsh-qýat beredi, ózin qabyrǵaly eldiń azamaty ekenin sezinýge bastaıdy jáne jaýapkershiligin kúsheıtedi.

Málimdemeniń erekshe bir mazmunyn – elimizdiń aldaǵy ómirine, daǵdarystan keıingi kezeńge baılanysty keshendi josparlar men sharalar aıqyn­daıdy. «Biz qazirden bastap daǵdarystan keıingi kezeńge daıyndalýymyz kerek. Bul jóninde Elbasy Qaýipsizdik Keńesiniń 24 sáýirde ótken otyrysynda naqty aıtty. Úkimet pen Ulttyq bank 11 mamyrǵa deıin Ekonomıkalyq damýdy qalpyna keltirý jónindegi keshendi jospardy daıyndaıdy. Onda daǵdarystan zardap shekken salalarǵa qoldaý kórsetý sharalary qamtylady» dedi Prezıdent Q.Toqaev. Sonymen qatar Memleket basshysy, búginde elimiz damýdyń jańa deńgeıine qadam basyp otyrǵanyn, biz endi shyn máninde múlde jańa jaǵdaıda ómir súretinimizdi, sondyqtan da ekonomıkaǵa jáne memlekettik basqarý júıesine aýqymdy ári mańyzdy ózgerister qajettigin erekshe qadap aıtty. Bizdińshe, bul – aldaǵy damýymyzdyń naqty bir sharty.

Ekonomıkaǵa jáne mem­le­kettik basqarý júıesine jasalatyn aýqymdy ári mańyzdy ózgeristerdi qabyldaı bilý – qoǵamnyń asa sergektigin, jańa bilimin, irgeli mádenıetin qajet etedi. Bul tusta meılinshe jasam­pazdyq ról atqarýy tıis óner­diń de damýy, rýhanı aına­lymǵa túsýi, qoǵammen kommýnıkasııasy baǵytynda birtalaı mańyzdy ózgerister júrýi múmkin. Sonymen qatar ónerdi, keıde tipti ómirdi ózinshe proeksııalaıtyn BAQ pen Elektrondy BAQ jáne áleýmettik jelilerde. Árıne bárin ýaqyt kórsetedi. Qalaı degende de aldaǵy kúnnen tek jaqsylyq kútetin, ár nárseni túbinen oılaıtyn, «sabyr túbi – sary altyn deıtin» halyqpyz. Eldiń birligi men berekesi, joǵarǵy bılik pen qoǵamnyń bir maqsat jolynda jumyla qareket etýi – jaqsylyqqa, jarqyn kúnderge bastasyn.

Álııa BО́PEJANOVA,

Qazaqstannyń eńbek sińirgen qaıratkeri,

Halyqaralyq «Alash» ádebı syılyǵynyń laýreaty

ALMATY