Muny byltyr da, bıyl da balyqtyń qyrylýymen baılanystyryp otyrmyz. Atyraý oblysyndaǵy Prımorskıı kanalynda balyqtyń ólgeni 21 sáýirde belgili bolǵan edi. Kaspıı teńiziniń Jaıyq ózenine quıar saǵasyndaǵy kanal boıynan bastapqyda 1 tonnadaı balyq óleksesi jınap alyndy. Odan keıin 4 tonnadaı óli balyq taǵy jınaldy.
Osyǵan oraı kanal sýynan, topyraqtan synama alynyp, zerthanaǵa joldandy. Mamandardyń boljamyna sáıkes, sýdan alynǵan alǵashqy synamada otteginiń shekti mólsherden eki esedeı az ekeni anyqtaldy. Sý quramynan zııandy qospalar men munaı ónimderiniń qaldyǵy kezdespedi.
«Qazgıdromet» RMK-nyń habarlaýynsha, 27 sáýirde «Aqjaıyq» memlekettik tabıǵı rezervatynyń aýmaǵyndaǵy Prımorsk kanalynda balyqtardyń ólý faktisi qaıta anyqtalýyna baılanysty Atyraý oblysy boıynsha fılıalynyń qyzmetkerleri úshinshi ret sý synamalaryn jospardan tys irikteý uıymdastyrylypty.
– Gıdrologııalyq derekter boıynsha 26-27 sáýir aralyǵynda Jaıyq ózeni sýynyń deńgeıi 2020 jylǵy 25 sáýirdegi sý deńgeıiniń kóterilýinen keıin tómendeýi baıqalady (táýlik ishindegi sý deńgeıi 5-17 sm tómendedi).
Sý sapasyn taldaý basty ıondar, bıogendi, organıkalyq jáne organıkalyq emes zattar, aýyr metaldardy qosa alǵanda, 39 kórsetkish boıynsha júrgiziledi. Taldaý nátıjeleri boıynsha sý laılanǵan, sýdyń temperatýrasy 15-17ºS sheginde, sýtegi kórsetkishi – 6,97- 7,48, erigen ottegi – 7,1-7,2 mg/dm3, ottegimen qanyǵý – 71,7- 73,8 %, móldirligi –5,5-7,0 sm, túsi –19,5-20 gradýs, tabıǵı sýǵa tózimdi emes ıis tabylǵan joq. Sý sapasynyń biryńǵaı jiktemesiniń shekti normasynyń asyp ketýi jalpy temir boıynsha – 0,5 mg/dm3 (1,7 ese asyp ketý) Prımorsk kanaly irikteý núktesinde, «Aqjaıyq» beketinen aǵys boıynsha 6 km tómen, ekinshi núktede norma sheginde tirkeldi, -dep habarlady «Qazgıdromet» RMK.
