PASHA MEIRAMYMEN QUTTYQTADY

Sizderdi Pasha meıramymen shyn júrekten quttyqtaımyn, delingen Memleket basshysynyń quttyqtaýynda. Bul – mahabbat pen meıirim, túsinistik pen keshirim tárizdi adamı asyl qasıetterdi pash etetin jarqyn mereke. Kóp ulttyń jáne árqıly konfessııanyń ókilderi meken etken Qazaqstanda dinaralyq ózara syılastyqtyń ıgi dástúrleri ornyqty. Bul bizdiń halqymyzdyń keńpeıildiligi men kemeńgerliginiń arqasynda, sonymen birge memle­ketimizdiń qoǵamdaǵy beıbitshilik pen kelisimdi nyǵaıtýǵa, túrli dinı konfessııalar men memleketter ara­syndaǵy jemisti únqatysýdy qol­daýǵa baǵyttalǵan syndarly saıasatynyń nátıjesinde múmkin boldy. Búginde elimizde beıbitshilik pen tynyshtyq ornap otyr. Biz bola­shaq­qa batyl kóz tigip, gúldený men órkendeý ústindegi jasampaz Qa­zaq­standy qurýdamyz. Bizde meshitter men shirkeýler, kostelder men sınagogalar qatar boı kóterýde. Elordamyz álemdik dinderdiń dıalogy ótetin tanymal ortalyqqa aınaldy. Jaqynda Astanada Or­ta­lyq Azııadaǵy eń iri kafedraldy sobor ashyldy. Onyń ashylý saltanatyna óziniń Qazaqstanǵa jasaǵan birinshi sapary barysynda Máskeý jáne kúlli Reseı Patrıar­hy Kırıll kelip qatysty. Bul kún bizdiń ár shańyra­ǵymyzǵa jarqyn úmit pen shynaıy shattyq ákeledi, delingen odan ári Elbasy quttyqtaýynda. Bul tek týǵan-týysqa ǵana emes, qaıyrym men kómekke muqtaj jannyń barshasyna qamqorlyq kórsetip, meıir-shapaǵat tógetin mezgil. Endeshe bir-birimizge meıirimdi de qaıyrymdy bolaıyq! Árqaısymyz­dyń júregimizdegi, otbasymyzdaǵy, ortaq Otanymyz – Qazaqstan Respýblıkasyndaǵy beıbitshilik pen kelisimdi odan ári de nyǵaıta túseıik! Barshańyzǵa, qymbatty meniń otandastarym, baqyt pen densaýlyq, ıgilik pen bereke tileımin, dep aıaqtaıdy Memleket basshysy óziniń quttyqtaýyn.