Besqaladan shyqqan batyrlar

Fashızmmen kúreste Qazaq­stannyń, qazaq halqynyń eleýli úlesi bar. 1939 jylǵy sanaqta 6 mıllıonnan asqan respýblıka halqynyń 1 mıllıon 200 myńy soǵysqa qatysty. 3500-den asa qa­zaq partızandar qatarynda boldy. 589 myń órenimiz soǵysta qaza tapty. 500-diń o jaq, bu ja­ǵyndaǵy Qazaqstan týmasy batyr ataǵyn alǵan. Sondaı-aq soǵysqa ózge odaqtas respýblıkalardan barǵan qazaqtar da erlik kórsetip, dańqy shyqty.

Qandastarymyz kóp shoǵyr­lanǵan  Besqala jerinen de  (Bes­qala – Horezm oıpatyndaǵy 5 qala, tarıhı derekterde­ qa­zirgi Qara­qalpaqstandy qazaq­tar solaı ataǵan) birneshe batyr shyqqan. Sonyń biri, ulty ózbek bolyp jazylyp júrgen Inııat Naýryzbaev (Inoıat Navrýzbaev, Imat Naý­ryzbaev) týraly «Egemen Qazaq­standa» (2015 jylǵy 4 naýryz) «104-shi qaharman nemese Bes­qaladan shyqqan batyr týraly birer sóz» atty maqala ja­rııa­lap, bul batyrdyń qazaq eke­nin dáleldegen bolatynbyz. Sondyqtan qazir onyń ómir­baıanyn qaıtalaýdy jón kór­medik. Degenmen sońǵy kezde keı­bir besqalalyq batyrlar ómir­baıandaryn burmalaýshylar kóbeıgendikten qujattaǵy derek­terdi alǵa tartyp, olar týraly shyndyqty Jeńistiń 75 jyldyǵy tusynda aıta ketýdiń artyǵy bolmas dep oılaımyz.

Maqash Balmaǵambetov 1914 jyly qazirgi Qaraózek aýdanynyń 6-aýyly aımaǵynda dú­nıege kelgen. Bastaýysh mek­tepti aıaqtap, Ahýnbabaev atyndaǵy ujymsharda 1932 jyldan 1938 jylǵa deıin esepshi, odan keıin kishi tehnık bolyp isteıdi. 1943 jyly qysta Qaraózek aýdan­dyq áskerı komıssarıatynan maı­danǵa attanǵan. Sol jyldyń naý­ryz aıynan bas­tap 72-dıvızııa quramynda so­ǵysqa aralasady. Birde jaralanyp, gos­pı­talda emdelgennen soń Qa­zaqstanda qurylǵan 73-gvardııashy Stalıngrad atqyshtar dı­vızııasy quramyna ótedi. Ol ózi­niń batyrlyǵymen tanylyp, eki ret Qyzyl Juldyz ordenimen marapattalady.

                                                      Maqash Balmaǵambetov

1943 jyldyń 25 qyrkúıeginde serjant Maqash Balmaǵambetov qyz­met etken rota Dneprge jet­ti. Tún qarańǵy bolatyn. Jel­diń ekpini de kúsheıe túsken. Balyq­shylardyń eki qaıyǵyn taýyp alǵan Maqash óz bólimshesimen bi­rinshi bolyp ózennen óte bas­tady. Qatty jeldiń saldarynan es­ki qaıyq Dnepr tolqyndarynda oınaqshyp, jaý oǵy ústerinen zýyl­dap ótip jatqanyna qa­ra­mastan erjúrek komandır Maqash Bal­ma­ǵambetov bastaǵan gvardııa­shylar alǵa jyljı berdi. Biraq ózen­­niń oń jaǵalaýyna ótý gvar­dııashylardyń úsheýine-aq buıyr­dy. Pýlemetpen qarýlanǵan olar Dne­propetrovsk oblysynyń Boro­daevka selosynyń janynda birden urysqa kirisip ketti. Údeı túsken shabýyldarǵa toıta­rys bere otyryp, úsh jaýynger jaýdyń nazaryn ózderine aýdaryp, barlyq bólimsheniń ózennen ótýin qamtamasyz et­ti. Alaıda bulardy jaǵaǵa qa­raı yǵystyrý úshin jaý avtomatshylary iske kiristi. Bir kún ishinde Balmaǵambetov bó­limshesi jaýdyń úsh qarsy shabýylyna toıtarys berip, keshke qaraı onyń ózi tiri qalǵan jaýyngerlerdi shabýylǵa bastap shyqty. Borodaevka selosynyń shetine basyp kirgen Maqash Bal­maǵambetov jekpe-jek aıqasta birneshe soldat pen bir ofıserdi jaıratyp saldy.

Kelesi kúni dushpan birneshe ret shabýyldady. Biraq olarǵa toıtarys bergen Balmaǵambetov bólimshesi 20-dan astam fashısti joıyp, ózderiniń rotasy kelgenshe qorǵanys shebin ustap turdy. Al 28 qyrkúıekke qaraǵan túni jaýyngerlerimizdiń alǵa jyljýyna kedergi keltirip tur­ǵan selodaǵy jaý avtomatshylary bekinip alǵan úıge asqan eptilikpen jaqyndap kelgen Ma­qash onyń terezesinen tankige qarsy paıdalanatyn granatty laqtyryp, jaýdyń atys uıasyn joıdy. Bul jaıt bólimsheniń alǵa jyljýyna múmkindik berdi. Sondaı-aq 7 qazanda Boro­daevka mańyndaǵy shaıqasta Bal­maǵambetov bólim­shesi rotadan bólinip qaldy, sonda da bekingen shepterinen ketpeı, dushpannyń qorǵanysty bu­zyp ótýine jol bergen joq. Kúni boıy bólimshe komandıri Maqash Balmaǵambetov óziniń jaýyngerlerimen alty qarsy shabýylǵa toıtarys berip, 30-daı jaý áskerin jaıratyp saldy.

Erjúrek serjanttyń osy jolǵy shaıqasta kórsetken erligi elenip, KSRO Joǵarǵy Keńesi Prezıdıýmynyń 1944 jylǵy 22 aqpandaǵy qaýlysymen Keńes Odaǵynyń Batyry ataǵy berildi. Ol soǵystan aman-esen elge oralyp, Nókis qalasynda eńbek etti. 1977 jyly 29 qyrkúıekte ómir­den ótti. Batyrdyń esimi umy­tylǵan joq. Atap aıtqanda, Nókis qalasyndaǵy Jeńis alleıa­synda eskert­kish ornatylyp, ózi dúnıege kelgen Qaraózek aýdanyndaǵy mektepterdiń biri Maqash Bal­maǵambetov atymen atalady.

Plıs (Bilis) Nurpeıisov 1919 jyly Tórtkúl aýdanynda dúnıege kelgen. Tórtkúldegi eki jyldyq muǵalimder daıarlaıtyn ınstıtýttyń fızıka-matematıka fakýltetin bitirip, Taqtakópir aýdanynda muǵalim bop qyzmet istegen. Áskerge 1940 jyly Taqtakópir aýdandyq áskerı komıssarıatynan shaqyrylǵan Nurpeıisov Melıtopolsk áskerı avıasııa ýchılıshesin bitirip, 2-Belarýs maıdanynyń 4-áýe armııasy, 47-gvardııalyq arnaıy avıasııalyq barlaý polkinde ushqysh-barlaýshy bolady.

                                                            Bilis Nurpeıisov

Aǵa leıtenant Plıs Nur­peıisov jaýdyń 73 qala men portyn, 148 aerodromyn anyq­tap, sýretke túsirgen. Áýede dush­pannyń 3 myńnan asa ushaǵynyń turǵan jerin tapqan. 1944 jyldyń 10 naý­ryzynan 1945 jyldyń 1 sáýirine deıin 106 ret ushyp, sonyń 100-in­­de tapsyrmany oıdaǵydaı oryn­daǵan. 10 ret Berlındi barlaý úshin áýege kóterilgen. PE-2, TÝ-2 ushaqtarymen aýa raıy­nyń qolaısyzdyǵyna qara­mastan ushyp, óz mindetin abyroımen atqara bilgen. 1944 jyl­dyń 21 shildesinde 17 ret áýege kóte­rilip, tapsyrmany sátti oryn­daǵany úshin, 15 tamyzda 14 ret áýege kóterilip, jaý ny­san­daryn anyqtaǵany úshin Qyzyl Juldyz, 1944 jyldyń 12 jel­toqsanynda 19 ret áýege kóte­rilip, dushpannyń nysandary týraly asa qundy aqparat bergeni úshin I dárejeli «Otan soǵysy» ordenimen marapattalǵan.

Ol eki ret Berezın jáne Drýt ózenderi mańyndaǵy bekinisterdi sýretke túsirý úshin arnaıy tapsyrmamen ushqanda 10 ret kúshti atqylaýǵa ushyrap, 5 ret jaýdyń joıǵysh ushaqtary izine túskenine qaramastan odan aman qutylyp, komandovanıege asa mańyzdy derekter jetkizdi. Osy eki tapsyrmany oryndaý barysynda ol jaý qolyndaǵy aımaqtyń ústinde 56 saǵat ushyp, 16 myń shaqyrym qashyqtyqty kóktep ótken bolatyn. Sondaı mańyzdy tapsyrmalardy oryndaý barysynda, 1945 jyly 23 sáýirinde kezekti ret aspanǵa kóterildi. Alaıda ol bul joly oralmady. Erlikpen qaza tapqan soń oǵan 1945 jyldyń 18 tamyzynda Keńes Odaǵynyń Batyry ataǵy berildi.

Bir kezderi Plıs Nurpeıisovtiń ózi alǵashqy qarlyǵashy bol­ǵan oqý orny búginde Ájinııaz atyn­daǵy Qaraqalpaq memle­kettik pedagogıkalyq ınstı­tý­tyna aınalǵan. Onda ba­tyr­ǵa memorıaldyq taqta orna­tylǵan. Jeńis alleıasyna eskert­kishi qo­ıyl­ǵan. Taqtakópir aýda­nyn­daǵy orta mektepterdiń bi­ri­ ­Plıs Nurpeıisov esimimen ata­­­­lady. Reseıdiń 47-barlaý­shy­ áýe polkiniń bir ushaǵy – SÝ-24MR, Kalınıngradtaǵy bir kó­she batyr atynda. 1954 jy­ly qa­raqalpaqstandyq qazaq qalam­geri Aman Orazovtyń qaharman ómi­­rinen syr shertetin «Aýyr kún­derde» atty derekti kitaby basylyp shyqty.

Juman Qaraqulov 1921 jyly qazirgi Shymbaı aýdany aı­maǵynda týǵan. 1942 jyly 17 aqpanda ol Soltústik Kavkaz maıdanyna kelip, Qyzyl týly gvardııalyq 128-Túrkistan taý atqyshtary dıvızııasynyń 327-gvardııalyq taý atqyshtary Sevastopol polkine avtomatshylar rotasynyń qatardaǵy jaýyngeri bolyp qa­byl­dandy.

                                                             Juman Qaraqulov

Karpat-Dýkl operasııasy so­ǵys tarıhynda úlken mańyzǵa ıe. 4-Ýkraına maıdany áskerleri men Chehoslovak armııasynyń korpýsy 1944 jylǵy qazan aıy­nyń basynda Karpat-Dýkl operasııasyn júzege asyra otyryp, Karpat taýlarynan asyp, Dýkl asýyn aldy da, 6 qazanda Chehoslovakııa aımaǵyna ótti. Keńes áskerleri men chehoslovak korpýsynyń shabýyly óte aýyr jaǵdaıda, 7 qazanda qaıta bas­talyp, birneshe kúnge sozyldy. 1944 jylǵy 17 qazanda Zvala eldi mekeni aımaǵyndaǵy 762-bıiktik qoldan-qolǵa kóshti. Bıiktiktegi shepti alý qıynǵa soqty, nemister jaýdyrǵan oq shabýyl jasaýshylardy keıin yǵystyra berdi. Osy shabýyldardyń birinde rota bıiktik bókterinen óte bergen kezde Juman Qaraqulov jaýyn­ger Romanovskıı ekeýi alǵa sýy­rylyp shyǵyp, nemis transheıasyn basyp aldy. Olar osy transheıany dushpan shabýylynan úsh saǵat boıy qorǵady. Bi­raq bólimshe transheıaǵa óte al­mady. Sondyqtan olarǵa keıin qaıtýǵa buıryq berildi. 18 qazanda rota jańa shabýylǵa kóshkende Juman taǵy da alǵa shyqty. Nemis beki­nisiniń aldyńǵy qataryndaǵy okopty basyp alyp, kúshi basym jaýmen taǵy da birneshe saǵat boıy urys júrgizdi. Alaıda rota onyń bul jolǵy áreketin de ilgeri jyljý úshin paıdala­na almady. Juman taǵy da keıin qaıtýǵa májbúr boldy. Aqyry rota úshinshi ret shabýylǵa shyq­qan kezde qatardaǵy gvardııa­shylar Qaraqulov pen Sar­­­kı­s­ıa­­nov jaý transheıasyna basyp kirip, avtomattarynan oq jaý­dyryp, rotanyń ilgeri basýyn­ qamtamasyz etti. Kútpegen jer­­­den jaýdyń bir búıirdegi pý­le­metinen oq jaýdy. Juman Qaraqulov qolyna granat alyp, atys uıasyna qaraı týra umtyldy da, ony keýdesimen jaýyp, granatty laqtyryp úlgerdi. Sonyń arqasynda bólimsheniń shabýyldaýyna jol ashyldy.

Juman Qaraqulov Zvala el­di mekeniniń soltústik-batys ja­ǵyna jerlengen. Qazir bul jer Slovakııa Respýblıkasy, Pereshovskıı ólkesi, Snına aýda­nyna tıesili. Chehoslovakııa jerinde óshpes erlik kórsetken ójet ulǵa 1945 jyldyń 24 naýryzynda Keńes Odaǵynyń Batyry ataǵy berildi.

Qaraqalpaqstan Respýb­lıkasy Shymbaı aýda­nyndaǵy mektep pen bir­ kóshe Juman Qara­qulov esimimen atalady. Nókis qala­syndaǵy Jeńis alleıasynda ba­tyrǵa eskertkish ornatylǵan.

Jumaǵalı Qaldyqaraev 1922 jyly Ivanjap degen jerde, qazirgi Hojeli aýdany Kátep aýylynyń aımaǵynda dúnıege kelgen. Sol aýyldaǵy Taras Shevchenko atyndaǵy mektepte 4-synyptyq bilim alǵan. 1938 jyly otbasy Túrikmenstannyń Tashaýyz oblysy, Kalının aýdany, Kırov ujymsharyna kósh­kendikten, sol jaqta qys­qa kýrsty oqyp, traktorshy ma­man­dyǵyn ıgeredi. Soǵys bas­talǵannan keıin óz aýdanynan áskerge bólingen jylqyny aıdap Sharjaý qalasyna baryp, úıine oralmastan erikti túrde maıdanǵa attanǵan. Gvardııalyq 7-atty ásker korpýsynyń 7-dıvı­zııasynyń quramynda Orel, Kýrsk, Belgorod, Harkov úshin bolǵan shaıqastarǵa qatysqan. Ásirese Dneprden keship ótý kezinde erekshe belsendilik tanytqan. 1943 jylǵy tamyz aıy men qyrkúıektiń birinshi jartysynda soǵysa júrip, 200-300 shaqyrymǵa deıin jol júrgen Dalalyq maıdan áskerleri ózen­nen ótýge qyzý ázirlendi. Maı­dan quramalary ózenge ja­qyndaǵan saıyn komandırler ózennen ótetin jerlerdi belgiledi ári Vorskla, Orel arqyly ótkel quraldaryn toptastyrý sharalary júrgizildi. Áskerler jaýdy qýa otyryp, qajetti zattardyń bárin ózderimen birge ala júrdi. Jumaǵalı Qaldyqaraev urymtal tusta asa tapqyrlyq kórsetti. Arǵy betke tutqıyldan ótý je­ńiske jetýdiń basty sharty ekenin ol jaqsy túsindi. Son­dyqtan 26 qyrkúıektiń keshinde dıvızııa jaǵaǵa jetken kezde tankige qarsy atatyn qarýdyń úsh raschetymen birge jolda bastalǵan sal jasaý jumysyn bitirdi de, jaýdyń boraǵan zeńbirek oǵynyń astymen ózennen óte bastady. О́zen ortasynda jaý snarıady jarylyp, sal qırady. Biraq Jumaǵalı sasqan joq. Qarý-jaraǵyn túgel asynǵan ol qalǵan jaýyngerlerdi sońynan ertip júze jóneldi. Oń jaǵalaýǵa júzip jetken soń jaýyngerlermen birge dereý shabýylǵa shyqty. Jaý transheıalaryna granat laqtyryp, qolaıly shepti tartyp aldy. Dushpannyń myqty bekinisine tutqıyldan jasalǵan osy batyl shabýylda Qaldyqaraevtyń ózi 8 fashıstiń kózin joıdy.

                                                             Jumaǵalı Qaldyqaraev

Dneprden óterde kórsetken erligi úshin 1944 jyly 15 qańtarda Jumaǵalı Qaldyqaraevqa Ke­ńes Odaǵynyń Batyry ataǵy berildi. Alaıda sol jyldyń 25 qańtarynda Mozyr qalasy úshin bolǵan aýyr shaıqasta qaza taýyp, «Altyn Juldyzdy» keýdesine taǵyp úlgermedi.

1967 jyly batyrdyń Hojeli aýdanynda turatyn aǵasy Qýan­ǵalı Belorýssııanyń Mozyr qalasyna baryp, inisiniń esimi sondaǵy kóshege berilý sharasyna qatysty. Sheıit ketken bozdaqtyń qabirinen topyraq ákelip, anasy Márııamǵa, sol jyly QQAKSR Mınıstrler Keńesiniń 337-qaýlysymen Jumaǵalı Qaldyqaraev aty berilgen Hojeli aýdanyndaǵy 32-mektep ujymyna tabystady. 1975 jyly eskertkish taqta ornatyldy. Murajaıdyń irgetasy da sol jyly qalanǵan. Nókistegi Jeńis alleıasynda batyrdyń eskertkishi bar.

Solaısha, I.Naýryzbaev, M.Bal­maǵambetov, B.Nurpeıisov, J. Qaraqulov, J.Qaldyqaraevtar «Keńes Odaǵynyń Batyry» ataǵyn alsa, solarmen birdeı erlik kórsetken taǵy bir qazaq – «Dańq» ordeniniń tolyq kavaleri Álimbaı Amanbaev edi. Ol 1922 jyly 23 qazanda Túrikmen KSR-i, Tashaýyz oblysy, Kóne Úrgenish aýdanynyń Kóne Úrgenish aýylynda dúnıege kelgen. Orta mektepte bilim alǵan soń «Iskra» kolhozynda esepshi bolyp istedi. Alaıda aıaq astynan bastalǵan Ekinshi dúnıejúzilik soǵys − qatarlastary sııaqty Álimbaıdyń da arman-mura­tyn basqa arnaǵa buryp ji­berdi. Erikti túrde áskerı komıssarıatqa barǵan onyń ótinishi qanaǵattandyrylyp, 1941 jyldyń jeltoqsan aıynda ásker qataryna alyndy. 1942 jyldyń sáýirine deıin Sharjoý qalasynda áskerı daıyn­dyqtan ótti. Sóıtip ol osynda jasaqtalyp jatqan №3 túrikmen ulttyq kavalerııa dıvızııasynyń quramyna kirdi. Dıvızııa munan soń Novo­cherkassk qalasyna jiberilip, polk­tiń artıllerıster daıyndaıtyn mektebinde mamandandyryldy. Gvardııa serjanty shenin alǵan Álimbaı Amanbaev 1942 jyly 2-Belarýs maıdany, 48-armııa, 15-jeke tankige qarsy ar­tıllerııalyq-joıǵysh brıga­dasynyń 101-gvardııalyq polki qura­mynda soǵysqa kiristi. Ol zeńbirek komandıri retinde kóptegen shaıqasta sheshýshi ról atqardy. 1944 jyldyń qońyr kúzinde nemisterdi Polsha je­rinen tazartý operasııasy júrip jatqan-dy. 10-15 qazan kún­deri Makýv qalasynyń (qa­zirgi Makýv-Mazoveskı qala­sy) ońtústik shy­ǵysyndaǵy Lesn-Hylın eldi mekenin azat etý úshin shaıqasýǵa týra keldi. Á.Amanbaev qarsy shabýyldarda erekshe kózge túsip, jaýdyń 2 tanki men 2 pýlemetin jo­ıyp, qarýlastaryna jol ash­ty. Dál osy erligi úshin oǵan 1944 jyldyń 23 qarashasynda III dáre­jeli «Dańq» ordeni (№ 303906) berildi. 1945 jyldyń 26 qań­tarynda 2-Belarýs maıdanynyń 3-kavalerııalyq korpýsy sapynda Shyǵys Prýssııadaǵy Vartenbýrg (qazirgi Polshanyń Barchevo qa­lasy) qalasyna shabýyl barysynda jaýdyń 6 pý­lemetiniń únin óshirip, tankisin ór­tep jiberedi. 2 aqpan kúni de munyń boraǵan snarıadtardyń sebebinen jaý tankteri qorǵanys shebin buzyp óte almaı, orasan zor shyǵynǵa batady. Onyń erligin eskergen áskerı basshylyq 1945 jyldyń 16 sáýirinde II dárejeli «Dańq» ordenimen (№ 5804) marapattaıdy.

                                                                  Álimbaı Amanbaev

Keıin brıgadasy men polki óz rettik nómirlerin saqtap 70-ar­­mııanyń quramyna ótken Á.Amanbaev 1945 jyldyń 20 sáýi­­rinde Germanııanyń Grı­fın­­hagen qalasy mańynda (qazirgi Pol­shanyń Gryfıno qa­lasy) Álimbaı Amanbaev óz zeńbiregimen nemisterdiń 2 pý­lemetin isten shyǵaryp, 15­ áskerin jaıratyp saldy. Sóıtip atqyshtar bólim­shesi­niń Oder ózenin kesip ótýine jaǵ­daı jasady. Plasdarmdy ke­ńeıtý barysynda 21 sáýir kúni qa­rýlastarymen birge jaýdyń 3 pý­lemeti men bir vzvod áskerin, 24 sáýirde jeke ózi 2 pýlemet pen 10 áskerdi joıdy. Osyndaı jan­qııarlyq batyrlyǵy úshin 1945 jyldyń 2 maýsymynda oǵan II dáre­jeli «Dańq» ordeni taǵy bir ret berildi.

Soǵys kezinde Álimbaıdyń ot­basy Qaraqalpaqstanǵa qonys aýdarǵan edi. Sondyqtan ol 1946 jyly Nókis qalasyna kelip, kóp ýaqyt ótpeı №166 qurylys bas­qarmasyna júrgizýshi bolyp jumysqa ornalasty. 1948-1952 jyldary ishki ister salasynda qyzmet etti. Biraq sońynan №166 qurylys basqarmasyna qaıta oralyp, ekspedıtor boldy. Zeınetke shyqqansha osy mekemede eńbek etip, ınjener laýazymyna deıin kóterildi. Ol 1950 jyly Álıma Alǵazıevaǵa úılenip, 5 ul, 3 qyz ósirdi. 

«Dańq» ordeniniń kez kelgen dárejesi bir adamǵa eki ret beril­meýge tıis eken. KSRO bas­shy­lyǵy kesh te bolsa qate­sin túzetti. 1968 jyldyń 7 maý­sy­mynda KSRO Joǵarǵy Soveti Prezıdıýmy Álimbaı Aman­baevtan II dárejeli «Dańq» orde­niniń bireýiniń ornyna I dárejeli «Dańq» ordenin (№2995) berý týraly qaýly shyǵardy. Sóıtip batyr ul «Dańq» ordeniniń tolyq kavalerine aınaldy. Ol budan bólek I, II dárejeli «Otan soǵysy», sondaı-aq «Oktıabr revolıýsııasy», Qyzyl Juldyz ordenderimen qosa birneshe me­dalmen de marapattalǵan. Soǵysta kórsetken erliginiń ar­q­asynda eldiń qurmetine bó­lengen Álimbaı Amanbaev 1990 jyly dúnıeden ótti. Baýyrlas Qaraqalpaq eliniń basshylyǵy Nókis qalasyndaǵy bir kósheni qazaqtyń osy bir batyr ulynyń esimimen ataýdy uıǵardy. Ol turǵan úıge eskertkish taqta ornatyldy.

...Taǵdyrdyń qalaýymen ózge elde týyp-ósse de ulttyq namysyna syzat túsirmeı, óz halqynyń dańqyna dańq qosqan besqalalyq alty batyr da ata­jurtynda dáriptelýge ábden laıyq. О́ıtkeni jer betindegi ár qa­zaqtyń jetistigi bar qazaqqqa ortaq qýanysh, ortaq maqtanysh!

Begabat UZAQOV,

Qazaqstan Jazýshylar odaǵynyń múshesi