Aımaqtar • 05 Mamyr, 2020

Jambyl oblysy: Aýdan ákimderine aıtylǵan syn az emes

490 retkórsetildi

Jambyl oblysynyń ákimi Berdibek Saparbaev aýdan ákimderimen beıneselektorlyq jıyn ótkizip, jıyn barysynda koronavırýsqa qarsy kúres, kóktemgi dala jumystary, azyq-túlik taýarlarynyń baǵasyn retteý jáne «Jumyspen qamtýdyń jol kartasy» baǵdarlamasyn júzege asyrýǵa qatysty birqatar máseleler talqylandy. Koronavırýs indetimen kúresten bólek, óńirde kúnnen-kúnge baǵalar birtindep ósip, Úkimet belgilegen shekti deńgeıden asqandyǵy da aıtyldy. Aýdandardaǵy jaǵdaı birshama basqasha. Degenmen, sıyr eti, taýyq eti, sút, pııaz, kartoptyń quny boıynsha aıtarlyqtaı ósim oryn alǵan.

Aýdan ákimderimen áńgime kezinde oblys ákimi birqatar josparly sharalardyń oıdaǵydaı oryndalmaı otyrǵandyǵyn atap ótti. Baǵalardy retteý boıynsha mobıldi toptardyń jumysynyń álsizdigi óz aldyna, barlyq aýdandarda «Jumyspen qamtýdyń jol kartasy» memlekettik baǵdarlamasy boıynsha jobalar áli kúnge bastalmaǵan. Sondaı-aq, qant qyzylshasy, júgeri jáne maıly daqyldardyń keıbir túrlerin egý boıynsha belgilengen mejeniń oryndalýy da nashar. Bul oraıda Berdibek Saparbaev aýdan ákimderi aǵymdaǵy jyly aımaqtaǵy egis alqabyn keminde 710 myń gektarǵa jetkizýdi eskerý qajettigin aıtty. Sonymen qatar, ákim paıdalanylmaı jatqan jerlerdi aýylsharýashylyq aınalymyna qaıtarý boıynsha bergen óz tapsyrmasynyń tıisinshe oryndalmaı otyrǵandyǵyn da aıtty. Budan keıin Taraz qalasynyń ákimi Aıtqazy Qarabalaev qazirgi ýaqytta qaladaǵy 420 adam turatyn kóppáterli turǵyn úılerdiń 15 kireberisi juqtyrý oshaqtary retinde jabyq ekendigin jetkizdi. Dúısenbi kúni karantın kezeńiniń aıaqtalýyna baılanysty 6 kireberisti ashý josparlanǵan. Sonymen qatar, Baızaq aýdanynyń ákimi Nurjan Nurjigitov 5 mamyr kúni egin egý jumystaryn aıaqtaýdy josparlap otyrǵandyǵyn aıtsa, Jambyl aýdanynyń ákimi Sáken Arýbaevtyń aıtýynsha, «Aısha-Bıbi» keden beketine koronavırýsty anyqtaýǵa 700 ekspress-test bólinip, aýdandaǵy 33 kásiporyn birtindep jumysyn jalǵastyra bastaǵan. Al, óńirde kartop ósirýmen aty shyqqan Jýaly aýdanynda kartop baǵasy qymbattaýda eken. Sonymen qatar, Qordaı aýdanynda qantpen qatar pııaz jáne sábiz baǵalary da ósken. Berdibek Saparbaev atalǵan aýdandarda qant qyzylshasy men maıly daqyldardy egýdiń tómen kórsetkishterin negizge aldy.

Merki aýdanynyń ákimi Meıirhan О́mirbekov 15 pavılonnyń ashylǵandyǵyn alǵa tartyp, nátıjesinde alypsatarlardyń joly kesilgendigin, et baǵasynyń kelisi 1770 teńge deńgeıinde turaqtaǵanyn atap ótti. Kóp uzamaı «Merki-Shý-Býrylbaıtal» tasjolyndaǵy jol qurylysy saldarynan buzylǵan 13 úıge jóndeý jumystary bastalatynyn jetkizdi. Biraq, Berdibek Saparbaev Merkide kókónister men júgeri egý jumystarynyń baıaý júrip jatqanyn eskertti. «Jergilikti óndiris oryndarymen tyǵyz baılanysta jumys jasańyz. Irimshik zaýyttary men et kombınattaryna, shaǵyn jáne orta kásiporyndarǵa jıi bas suǵyńyz», dedi.  

Al tuzdyń kóp mólsheri óndiriletin Moıynqum aýdanynda atalǵan ónim baǵasy ósse, T.Rysqulov aýdanynda baǵalar turaqty, tek ımporttalǵan qaraqumyqtyń baǵasy qymbattaǵan. Keıbir sharýashylyqtar júgeri ósirýden bas tartyp, ony maıly daqyldarmen almastyrǵan. Sarysý aýdanynyń ákimi Qanatbek Mádibektiń aıtýynsha, aýdanda jyljymaly aýylsharýashylyq jármeńkelerin ótkizý jolǵa qoıylǵan. Sondaı-aq, Talas aýdanynyń ákimdigi «Aqkól» kólindegi dambany qalpyna keltirý, «Bógetkólge» qosymsha ylǵal tartý máselelerine qatysty alańdaýshylyq bildirýde. Shý aýdanynyń ákimi Jarylqasyn Aıtaqovqa smetany asyra baǵalaý faktilerine nazar aýdarýy tıistigi aıtyldy. Aýdanda mektepti kúrdeli jóndeý jumystaryna 480 mıllıon teńgeden astam qarajat bólingen.

Sonymen qatar, Berdibek Saparbaev kórshi Túrkistan oblysynda týyndaǵan tótenshe jaǵdaıǵa alańdaýshylyq tanyta otyryp, jergilikti sý qoımalaryndaǵy sýdyń deńgeıin úzdiksiz qadaǵalap otyrýdy tapsyrdy. Sonymen qatar, aýdandardaǵy aýyl sharýashylyǵy salasyn jandandyrý kerektigin aıta kelip, aýdan ákimderiniń «Eńbek» baǵdarlamasyn júzege asyrý boıynsha jumys júrgizýge qulyqsyz ekendigin synǵa aldy. «Eger bólinetin granttar men  shaǵyn nesıelerdiń kólemi oıdaǵydaı bolmasa, kásipkerlikti qalaı damytpaqpyz? Jumyssyzdardyń az bóligi aqyly qoǵamdyq qyzmetke tartylǵan. Jastar praktıkasy nashar damyǵan. Sondaı-aq, eldi mekenderdi abattandyrý men kógaldandyrý sharalary nazardan tys qalmaýy kerek. Tabysqa jetýdiń kilti – qarjylyq jáne eńbek tártibin qatań saqtaý, jóndeý jáne qurylys jumystarynyń sapasyna qatań qoǵamdyq baqylaý. Eshkim bizge qalpyna keltirýge ýaqyt bermeıdi. Biraq bólingen qarajatty ıgerýge degen talap óte joǵary», dedi Berdibek Saparbaev.

 

Jambyl oblysy

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar