Mınıstrdiń aıtýynsha, koronavırýs pandemııasy ekonomıkaǵa jáne eńbek naryǵyna teris áser etýde. Osyǵan baılanysty Úkimet qabyldap jatqan mańyzdy sharalardyń biri — jańa «Jumyspen qamtýdyń jol kartasy».
«Baǵdarlamanyń negizgi sharttary – qyzmet kórsetýshilerdiń jáne paıdalanatyn qurylys materıaldarynyń kem degende 90%-y otandyq óndirýshiler men merdigerlerden bolýy tıis, qurylyp jatqan jumys oryndaryna jumyssyz júrgen, ásirese jumyssyz jastardyń kem degende 50%-y jumyspen qamtý ortalyqtary arqyly tartylýy tıis», — dedi B. Nurymbetov.
Jalpy ákimder «Jumyspen qamtýdyń jol kartasy» aıasynda 6 506 jobany usyndy. Onyń ishinde 2 703 joba — áleýmettik ınfraqurylymǵa, 1 039 joba — turǵyn-úı sharýashylyǵyna, 1 799 joba — ınjenerlik-kólik ınfraqurylymyna jáne 695 joba eldi mekenderdi abattandyrýǵa qatysty.
Atalǵan jobalardy iske asyrý aıasynda barlyǵy 255 myń jumys orny qurylady. Iske asyrylǵan jobalar ekonomıkanyń túrli salalarynda 100 myńnan astam turaqty jumys oryndaryn qurýǵa yqpal etedi.
«Jol kartasynda iriktelgen jobalar ýaqytsha jumyspen qatar áleýmettik mańyzdy máselelerdi sheshýge, ekonomıkalyq tıimdilikti arttyrýǵa, aralas salalardy damytýǵa, turaqty jumys oryndaryn qurýǵa yqpal etedi», — dep atap ótti mınıstr.
Sonymen qatar, «Jol kartasy» aıasynda 80 jańa bilim berý mekemesi salynady. О́z kezeginde, bul apatty jáne úsh aýysymdy mektepterdiń problemasyn sheshýge, aýyldaǵy balalardyń bilim alýyn qamtamasyz etýge, muǵalimderge 7 myń jańa jumys ornyn ashýǵa múmkindik beredi. Jańa otbasylyq dárigerlik ambýlatorııalar aýyldyq jerlerdegi halyqtyń densaýlyǵyn jaqsartýǵa, medısınalyq saqtandyrý júıesin jetildirýge, aýyldyq jerlerde dáriger-mamandardyń turaqty jumyspen qamtylýyn qamtamasyz etýge jol ashady.
Budan ózge, birqatar oblystarda jumys istep turǵan sýarmaly keshenderdi qaıta jańartý sýarmaly jerlerdiń kólemin ulǵaıtýǵa, halyqtyń eginshilikpen, mal sharýashylyǵymen aınalysý múmkindikterin keńeıtýge jol ashady. Esep boıynsha, atalǵan jobalar aralas salalarda 77 myń turaqty jumys ornyn ashýǵa múmkindik beredi.
«Barlyq 6 506 jobanyń 2 410-y respýblıkalyq bıýdjette qarastyrylǵan qarajat esebinen iske asyrylýda. 1 mamyrdaǵy jaǵdaı boıynsha memlekettik satyp alý boıynsha konkýrstar aıaqtaldy, 1 779 joba boıynsha (nemese 73,8%) merdigerler anyqtaldy», — dedi B. Nurymbetov.
Bul baǵytta Jambyl, Shyǵys Qazaqstan, Pavlodar, Qaraǵandy, Almaty, Túrkistan oblystary alda keledi. Birqatar óńirlerde 1 265 joba boıynsha jumys bastaldy, 17 myńnan astam jumys orny quryldy, 10 332 jumysshy qabyldandy.
Eńbek jáne halyqty áleýmettik qorǵaý mınıstrligi «Jol kartasyn» iske asyrý monıtorınginiń tetigin ázirledi. Árbir oblys, qala, aýdan jáne aýyl boıynsha esep júrgiziledi, árbir joba boıynsha onyń «pasporty» ázirlendi. «Pasportta» jobanyń ataýynan bastap, onyń maqsaty, qol jetkizý tıisti túpkilikti josparly kórsetkishi, oryndalý merzimi, merdiger týraly málimetter, qurylatyn jumys oryndarynyń sany, jumyspen qamtý ortalyǵy arqyly qabyldanǵandardyń jalaqy mólsheri kórsetiledi.
Búgingi barlyq baǵdarlamalardyń áleýetin eskere otyryp, 2020 jyly 1 mln 220 myń adamdy jumysqa tartýǵa múmkindik bar.
