Qazaqstan • 05 Mamyr, 2020

Mınıstr 3 oblys aýmaǵyndaǵy joldardyń qurylys barysyn tekserdi

21 retkórsetildi

Qazaqstanda 2020 jyly avtojoldardyń 2600 shaqyrymynda qozǵalys ashylady dep josparlanyp otyr. Mundaı mindetti Mınıstrliktiń aldyna Úkimet basshysy qoıǵan bolatyn. Búgingi tańda joldardy salý jáne qaıta jańartý jumystary elimizdiń ár óńirinde qarqyn alǵan. Indýstrııa jáne ınfraqurylymdyq damý mınıstri Beıbit Atamqulov 3 oblys aýmaǵyndaǵy  joldardaǵy jumys barysymen tanysyp qaıtty.  Bul týraly IIDM baspasóz qyzmeti habarlady.

Birinshi kezekte Mınıstr «Taldyqorǵan – Qalbataý – О́skemen» avtomobıl jolynyń Shyǵys Qazaqstan jáne Almaty oblystaryndaǵy ýchaskelerine bardy. Jol Alakól kýrorttyq aımaǵy mańynda jatatyndyqtan, elimizdiń týrıstik klasterin damytýda úlken mańyzǵa ıe. Bıyl avtojolda tolyqtaı qozǵalys ashylady dep josparlanyp otyr. Jol 1-shi jáne 2-shi tehnıkalyq sanattarǵa sáıkestendirilmek.   

О́ńirge keletin týrıster sanyn arttyrýǵa septigin tıgizetin taǵy da bir joba – Qytaı shekarasyna deıin aparatyn «Úsharal – Dostyq» tasjolyn qaıta jańartý jobasy. Jumystar aıaqtalǵan soń týrıster sany ǵana emes, avtokólikterimen júk tasymalynyń kólemi artady. Bıyl joldyń 60 shaqyrymynda qozǵalys ashylady dep josparlanǵan. Sondaı-aq, oblys úshin úlken múmkindikterge jol ashatyn jobalardyń biri – «Qalbataý – Maıqapshaǵaı» jolyn qaıta jańartý jobasy. Tasjoldyń 415 shaqyrymynda qozǵalys bıyl  ashylady. Bul eldimekender arasyndaǵy barys-kelisti arttyryp, Qazaqstannyń shyǵysynan Qytaıǵa qaraı qosymsha tranzıttik dáliz ashady. Úshinshi tehnıkalyq sanattaǵy jol eki jolaǵy bar ekinshi sanattaǵy jolǵa aınalady.  

Almaty oblysynda Mınıstr «Altyn Orda» bazary mańyndaǵy «Almaty – Bishkek» avtojolynyń 16-19 shaqyrymdaryn qaıta jańartý jumysymen tanysty. Munda qurylys-montajdaý jumystary qarqyn alǵan. Qala mańyndaǵy eldimekenderden Almatyǵa keletin kólik sanynyń kóptigine baılanysty joldyń ótkizý qabilettiligi tómen bolatyn. 2020 jyly bul jolda qozǵalys ashylǵannan keıin másele tolyqtaı sheshimin tappaq.

Munymen qosa, mınıstr Beıbit Atamqulov bastaǵan top «Almaty – Bishkek» jolynyń 18+700 «Asyl Arman» turǵyn úı kesheni ýchaskesindegi jumystardy  tekserdi. Búgingi tańda munda jol ótpesiniń negizin jaılastyrý jumystary jáne Shamalǵan stansııasynyń burma joly arqyly ótetin «RF shekarasy (Ekaterınbýrg) – Almaty» (42 – 49 shaqyrymy) tasjolyn qaıta jańartý jumystary júrgizilip jatyr. Qazir jol ýchaskesinde qurylys-montajdaý jumystary júrip jatyr. Estakada I tehnıkalyq sanatqa saı bolady.

Mınıstr sondaı-aq, qaıta jańartý jumystary júrip jatqan Jambyl jáne Almaty oblystaryndaǵy «Uzynaǵash – Otar» jolynyń ýchaskelerine baryp qaıtty. Jyl sońyna deıin joldyń 56 shaqyrymynda qozǵalys ashylady degen jospar bar. Sondaı-aq, mınıstrlik basshysy «Qordaı» ótkizý beketin qaıta jańartý jumystary barysymen tanysty. Qazir eki eldiń azamattary «Qarasý», «Sortóbe», «Aýqatty» beketteri arqyly shekaradan ótkizilýde. Jańartylǵan ótkizý beketi jyl sońynda paıdalanýǵa beriledi. Qaıta jańartý jumystary aıaqtalǵan soń «Qordaı» beketi táýligine 50 myń adamdy ótkize alady.    

О́ńirde «Merki–Býrylbaıtal», «Kúrti–Býrylbaıtal» jáne «Balqash- Býrylbaıtal» sııaqty taǵy birneshe aýqymdy joba júzege asyrylyp jatyr.  Búgingi tańda nysandarda qurylys jumystary qarqyn alǵan. Joba elimizdiń ońtústik jáne ortalyq óńirlerin baılanystyryp, olardyń tranzıttik jáne týrıstik áleýetin arttyrýǵa septigin tıgizedi. «Merki – Býrylbaıtal» jolynyń 262 shaqyrymynda qozǵalys bıyl ashylýy tıis. «Kúrti – Býrylbaıtal» jáne «Balqash–Býrylbaıtal» joldarynda qaıta jańartý jumystary aıaqtalǵan soń Almatydan Balqashqa deıin 4-5 saǵattyń ishinde jetýge bolady.  

 

Sońǵy jańalyqtar

ForteBank: Bir dollar – 388 teńge

Qazaqstan • Búgin, 15:35

Áke rýhynan qýat alǵan qaısar jan

Rýhanııat • Búgin, 11:54

Abylaıhannyń aq joly

Aımaqtar • Búgin, 10:05

Uqsas jańalyqtar