Boljam boıynsha, oblys ortalyǵyndaǵy kásiporyndardyń jumysyn jandandyrý úshin 2019-2023 jyl aralyǵynda 28,7 mlrd teńge ınvestısııa jumsalýy tıis. Byltyr bul baǵytta ıgerilgen qarjy 2 mlrd teńgeni qurady. Nátıjesinde, jańadan 3 óndiris orny iske qosylyp, 2 kásiporynnyń qýaty artqan. Al turaqty jumys ornyn ashý kórsetkishi 47-ge jetti. Bıyl óndiristi órkendetýge 6,6 mlrd teńge jumsalmaq. Investısııalyq jobalardyń arasynda birneshe iri óndiris orny bar. Máselen, «Jetisý Majıko» agrokeshenine qarasty zaýyt qurylysynyń birinshi kezeńi aıaqtaldy. Jobanyń quny 5,8 mlrd teńge shamasynda. Alǵashqy kezeńde 45 adamdy turaqty jumyspen qamtıtyn kásiporyn tolyq iske qosylǵannan keıin 355 jumys ornyn ashady. Al keramıkalyq granıt taqtalaryn shyǵaratyn «Almaz keramıks» zaýytynyń jumysy sáýir aıynda bastalmaq. Investısııalyq jarǵylyq qory 13,9 mlrd teńgeni quraıtyn joba 2023 jyly tolyqtaı aıaqtalady. Alǵashqy kezeńniń ózinde 100 adamdy jumysqa qabyldaıtyn kásiporynnan túbinde 338 jumysshy nápaqasyn tappaq. Sondaı-aq «Taldyqorǵan» ındýstrııalyq aýmaǵynda iske qosylatyn «Lýnıýan Jetisý» et óńdeý zaýyty men «Green Technology Partners» seriktestiginiń qurǵaq jem zaýytyna da jalpy quny 9 mlrd teńge ınvestısııa jumsalǵan. Bıyl «JLC Sút» zaýytynyń qosalqy sehynyń qurylysy bastalady, bul úshin qala aýmaǵynan 6 gektar jer telimi bólingen. О́ndiris iske qosylǵanda jańadan 290 jumys orny ashylýy tıis.
Jaqynda Taldyqorǵandaǵy ındýstrııalyq aımaqta táýligine 500 tonna maıly daqyl óńdeıtin jańa zaýyt iske qosyldy. Bul óndiriske jalpy 5,8 mlrd teńge shamasynda ınvestısııa quıylǵan.
«Jetisý-Majıko» agrokesheniniń bul óndirisine 4,4 mlrd teńge jumsaldy. Birinshi kezeńde 50 jumys orny ashyldy. Aldaǵy ýaqytta kásiporyn tolyq qýatyna qosylyp, zaýyt irgesi keńeıgen soń 500 adamǵa turaqty kásip tabylmaq. Qazir iske qosylǵan zaýyt ystyqtaı syǵymdaý tásilimen ósimdik maıyn shyǵarady. Táýligine 500 tonna raps jáne 400 tonna kúnbaǵys óńdeıdi, sonyń nátıjesinde ósimdik maıy men jom óndiriledi. О́ndiris shıkizatpen 100 paıyz qamtylǵan, nemis óndirýshileriniń qural-jabdyqtary ornatylǵan, sol arqyly alynatyn ónim sapasyn jaqsartý úshin maıly daqyl tuqymdaryn ekstrýzıondy tehnologııamen óńdeý qoldanylady. Daıyn ónim jergilikti naryqqa shyǵarylady, sonymen qatar taıaý bolashaqta Qytaıǵa eksporttalady.
– Biz óz tarapymyzdan oblysta birneshe ındýstrııalyq aımaq quryp, ony qajetti ınfraqurylymmen qamtamasyz ettik. Jalpy memleket qoldaýynyń jáne qabyldanǵan sharalar arqyly ótken jyly Almaty oblysynyń ónerkásip óniminiń jalpy kólemi 1 trln teńgege jýyqtady. Jetisýlyqtar bir kisideı jumylyp, Memleket basshysy Qasym-Jomart Toqaevtyń júktegen mindetterin oryndaý maqsatynda jumys istep keledi. Bul jumystar ınvestısııa tartýǵa, jańa tehnologııamen jumys isteıtin zamanaýı óndiris oryndaryn ashýǵa, jańa jumys oryndaryn qurýǵa baǵyttalǵan. Taldyqorǵan qalasynyń aýmaǵynan ashylyp otyrǵan zaýyt – sonyń aıqyn aıǵaǵy. Jaqyn arada Taldyqorǵan qalasynda jalpy quny 22,9 mlrd teńge bolatyn taǵy 3 iri ınvestısııalyq joba júzege aspaq. Nátıjesinde 528 adamdy jumyspen qamtımyz, – deıdi oblys ákimi Amandyq Batalov.
Almaty oblysy
