Toǵyzynshy synyp oqyp júrgen kezinde aýylǵa aty ańyzǵa aınalǵan batyr aǵasy Raqymjan Qoshqarbaev kelgen. Qyzylsaıa aýylynyń eńkeıgen kárisinen, eńbektegen balasyna deıin Reıhstagtyń tóbesine qyzyl tý qadaǵan has batyrmen kezdesýge jınalǵan. Raqymjan aǵa barynsha qarapaıym, sypaıy eken. Keýdesin soǵyp, men sóıtkenmin dep maqtanǵan da joq. Janǵa jaǵymdy, samal jeldeı esken, tyńdaǵan jannyń janyn eriksiz baýraıtyn qońyr únimen maıdan týraly baıandaǵan. О́zinen góri ózgeni kóp aıtty. Qarýlastarynyń erligine súısindi.
Mine, sol sátten bastap bolashaq sýretshiniń maıdan taqyrybyndaǵy sýretteri salyna bastady dese de bolǵandaı. Alǵashqy sýreti «Reıhstag» dep ataldy. Quzǵyndardyń uıasynyń qaýsaı qıraǵan sáti. Tórtkúl dúnıe taǵatsyzdana tosqan Jeńistiń atoılaǵan kórinisi. Sodan bastap bir ádemi qııal alǵa qaraı jeteledi de otyrdy. Tula boılarynan parasat lebi, órlik pen batyrlyqtyń soraby aıqyn ańǵarylyp turatyn jampoz jaýyngerlerdiń máńgi ólmes asyl beınesi keıingi urpaqty dál sondaı bıik murattarǵa jetelese, ǵanıbet emes pe?!
Arqalyq qalasyndaǵy pedagogıkalyq ınstıtýttyń kórkemsýret fakýltetin bitirip, joǵary oqý orny basshylarynyń talaby men talantynan úmit kútip, ınstıtýtta oqytýshy bolyp qaldyrǵan kezinde de baıaǵy shoq juldyzdaı shaǵyn aýylda kókireginde tutanǵan maqsat-murattyń mazdaǵan oty qolamtanyń shoǵyndaı qyzdyryp, shabyttyń shyraıyn shalqyta túsken. Sóıtip, Qyzylsaıa aýylynan qan maıdanǵa attanyp, el qorǵaǵan erlerdiń beınesin birinen soń birin sala bastady.
– Ol kezde aýylda ardagerler kóp edi. Bálkim júzge jýyq bolar. Soǵys zardabyn tartqandar da az emes. Syńar aıaq, molaq qol. Biraq, báriniń máni Jeńis degen jalǵyz aýyz sózge syıyp tur, – deıdi Qazaqstan Sýretshiler odaǵynyń múshesi Ibragım Isenov, – alpysqa jýyǵyn saldym. Týǵan aýylymyzdaǵy mekteptegi murajaıǵa tartý ettim. Qazir kópshiligin aǵaıyn-týystary at-túıedeı qalap alyp ketipti.
Mine, keneptegi sýrette Moldash Tilegenov aqsaqaldyń beınesi. Ekinshi dúnıejúzilik soǵysta qaıtpas qaısar erlik kórsetken maıdanger. Keıingi urpaqqa jadyraı qaraǵan júzinen adamgershilik pen parasattylyqtyń taby esip tur.
Ibragım salǵan sýretter kórermen kóńilinen shyqqany anyq. Ásirese maıdan taqyrybyndaǵy sýretteri arqyly aýyldas maıdangerlerdiń tutas galereıasyn jasap shyqty. Myna bir sýret Malken Aıtpaevtiki. «Qyzyl Juldyz» ordeniniń ıegeri atanǵan maıdanger soǵystan oralǵan soń uzaq jyl muǵalim bolyp jumys istedi. Al, mynaý jaýynger Qaıyrken Sádýaqasov. Bul kisi de «Qyzyl Juldyz» ordeniniń ıegeri.
Qylqalam sheberi myna bir sýretti sala bastaǵanyna jıyrma jyl ýaqyt ótken. Kenep betinde bir jasar ulynyń alaqan tańbasy beınelengen. Al qasyndaǵy ekinshi sýrette balasynyń 20 jastaǵy qoltańbasy. Osylaısha bir kartınada 20 jyl ýaqyt qamtylǵan. Bul sýret beıbit ómir haqynda. Azat, egemendi eldiń ósý-órkendeýi, kemeldenýi men qalyptasýy ret-retimen órilmek.
Qylqalam sheberiniń qolynan 3 myńnan astam týyndy shyǵypty. Negizinen portretter men natıýrmorttar. Barlyǵy maıly boıaýmen salynǵan. О́ner týyndylarynyń geografııasy Qazaqstan, Marokko, Ispanııa, Grekııa, Germanııa, Malta, Koreıa, AQSh tárizdi elderdi qamtyǵan. Alda áli kóptegen jańa oı bar. Jasampaz eldiń jarqyn bolashaǵy, máńgilik eldiń muraty tóńiregindegi qııaldan góri naqty ómirge jaqyn taqyryptar.
