Keshe Batys Qazaqstan oblysy aktıviniń jınalysy bolyp ótti. Osynaý alqaly basqosý aımaqtar men óńirlerde ár aı men toqsan saıyn ótkizilip jatatyn kezektegi aktıvterge qaraǵanda túbegeıli ózgesheligimen erekshelendi.
Ony ornyqtyrýda Elbasy N.Á.Nazarbaevtyń úlesi qomaqty
Keshe Batys Qazaqstan oblysy aktıviniń jınalysy bolyp ótti. Osynaý alqaly basqosý aımaqtar men óńirlerde ár aı men toqsan saıyn ótkizilip jatatyn kezektegi aktıvterge qaraǵanda túbegeıli ózgesheligimen erekshelendi.
Atap aıtqanda, aktıv Elbasy N.Á.Nazarbaevtyń syrtqy saıasattaǵy qadamdary men álemdik aýqymdaǵy toleranttyq tujyrymdamalarynyń halyqaralyq qaýymdastyq pen álemdik jurtshylyq tarapynan qoldaý taýyp otyrǵanyna arnaldy. Sonyń ishinde batysqazaqstandyqtar jahandyq únqatysýdyń jańa júıesi «G-Global» jobasyn qoldaýǵa jáne júzege asyrýǵa baılanysty óz oı-pikirlerin ortaǵa saldy.
Aktıvti ashqan Batys Qazaqstan oblysynyń ákimi Nurlan Noǵaev Elbasy bastamalarynyń ómirsheńdigi men ózektiligine toqtaldy. Sóz joq, táýelsizdikti kózdiń qarashyǵyndaı saqtaý, jyldar ótken saıyn onyń tuǵyry men irgetasyn bekite túsý, ár memlekettiń ózine ǵana tán damý ereksheligin aıqyndaý qajet-aq. Sonymen birge, búgingi jahandaný dáýirinde bir de bir el, bir de bir memleket ózgelermen aralaspaı, ıntegrasııalyq baılanystar men qarym-qatynastarǵa túspeı oqshaý ómir súre almaıdy. Ári bir de bir memleket álemde bolyp jatqan joǵary-tómen balldy ózgeristerden tys tura almaıdy da. Al munyń búgingi basty joly men pishini – jahandyq únqatysýlar men úndeýler bolyp tabylady. Mine, Elbasymyz bárimizge osyndaı jańa úlgi-pishin usynyp otyr. Munyń ózi álemdik qaýymdastyqty biriktirýge arnalǵan kóp qyrly tuǵyrnama bolyp tabylady, dep oı qorytty oblys basshysy.
Al oblys aktıvine arnaıy kelip qatysyp sóz sóılegen Parlament Senatynyń depýtaty Serik Nógerbekov «G-Global» jobasy dúnıejúzilik aýqymdaǵy ekonomıkalyq jáne qarjylyq máselelerdi talqylaıtyn kommýnıkatıvtik joba ǵana emes, sonymen birge bul halyqaralyq deńgeıdegi barlyq baǵaly bastamalardyń konsentrasııalyq jıyntyǵy degen oı qorytty.
Aktıvte Qazaqstan ıadrolyq qarýdy qoldanýǵa qarsy qımyl-qozǵalystyń birden-bir kóshbasshysy ekeni atalyp ótildi. Qazaqstan basshysy Nursultan Nazarbaev sonaý 1989 jyly Semeı atom polıgonyn jabý jónindegi Jarlyqqa qol qoıýy arqyly osy turǵydaǵy álemdik qozǵalystyń etek alýyna bastamashy boldy. Mine, eki onjyldyqtan astam ýaqyt boıy Qazaqstan álemdik qaýymdastyq tarapynan qoldaýǵa ıe kóptegen kúrdeli halyqaralyq problemalardyń sheshimi tabylýyna bastamashyldyq tanytyp keledi.
Bulardyń ishinde EQYU Sammıti ótkizilýiniń, Islam Yntymaqtastyǵy Uıymyna tóraǵalyq etýiniń, Álemdik jáne dástúrli dinder kóshbasshylary sezderiniń orny aıryqsha. Sondaı-aq búginde bir júıege túsken Astana ekonomıkalyq forýmy men álemdik daǵdarysqa qarsy konferensııa da jahandyq dıalogtyń taptyrmaıtyn kópirine aınala alǵany kópshilikke aıan. BUU-nyń Bas Assambleıasy men onyń Bas hatshysy osy únqatysýlardy múltiksiz uıymdastyrýǵa qatysty joǵary baǵa bergeni de Qazaqstan úshin úlken mártebe, joǵary senim.
Sondaı-aq, aktıvte sóz sóılegender 2007-2010 jyldary oryn alǵan álemdik ekonomıkalyq daǵdarys kezinde kóptegen damyǵan elderdiń ekonomıkasy mınýsqa ájeptáýir kirip ketkeni, tek Qazaqstan ǵana mundaı daǵdarys saldarynan aman qalǵany jóninde áńgime qozǵady. Bul eń aldymen álemdik daǵdarys salqynyn aldyn-ala sezinip, oǵan aldyn ala qam jasaı bilýdiń nátıjesi, dedi olar.
Bir sózben aıtqanda, jahandyq úderister aldyndaǵy Qazaqstannyń jaýapkershiligi jyldan-jylǵa artyp keledi. Mundaǵy tamasha, balamasy joq ıdeıalarǵa halyqaralyq qaýymdastyq tereń túsinistik tanytýda. Sonyń biri, joǵaryda atalyp ótkendeı, osydan on jyl buryn tusaýy kesilgen dinder sezi bolyp tabylady. Talas joq, Qazaqstan taǵdyry álemniń ózge aımaqtary men elderinen, ári olardyń taǵdyrlarynan tys tura almaıdy. Al taǵdyrlardy tek ortaq túsinistikter arqyly ǵana birge keshýge bolady. Bul turǵyda «G-Global» qazaqstandyqtardyń álemdik turǵydaǵy oılaý júıesiniń taptyrmas bir tetigi bolyp qala bermek.
Temir QUSAIYN,
«Egemen Qazaqstan».
Batys Qazaqstan oblysy.
–––––––––––––––––––––
Sýretti túsirgen
Rafhat HALELOV.
